Het
jy al die Roxette liedjie: “She’s got the look” gehoor? Dit beteken
seker iets soos “sy lyk goed” en “haar uiterlike is mooi”. Ek wil
dit nou sommer so bietjie verdraai en sê : “Sy het die kyk, die
regte manier van kyk”. Wat beteken “kyk”? Wat sien jy wanneer jy
kyk? Wat sien jy in ander wanneer jy na hulle kyk? Wat sien ander in
jou? Wat DINK jy sien ander in jou wanneer hulle na jou kyk? Kom ons
vat dit nou bietjie verder en sê: “He’s got the look” en dan praat
ons van hóé die Here kyk. Wat sien Hy? Wat dink jy sien die Here as
Hy na jou kyk?
Lense as kyk-instrumente
Mens kry verskillende lense vir verskillende gebruike, bv.
·
Om te vergroot word ’n mikroskoop gebruik
·
Om dinge nader te bring word ’n zoemlens of ’n verkyker
gebruik
·
Om dinge verder weg te neem kan ons ’n wyehoek lens op ‘n
kamera gebruik
·
Om dinge bietjie makliker te sien, gebruik ons ’n bril wat
doelgemaak is vir jou oë, of spesiale kontaklense
·
Om onder die water te kyk, gebruik ons ’n duikbril. Dié lense
is plat glas en dien ook as beskerming onder die water
·
’n Motor se voorruit is ’n neutrale lens maar is van baie,
baie sterk glas
·
As jy die beeld wat ’n spieël weerkaats bietjie wil verander,
kan jy ’n gebuigde spieël gebruik– dit kan jou maerder of wyer laat
lyk
·
Dan is daar ook gekleurde lense wat sekere frekwensies
uitfilter en dinge anders laat lyk as wat dit werklik is.
Elke tipe lens / glas het ‘n
bepaalde doel. Die gebruik daarvan is vir ‘n spesifieke doel en kan
nie sommer vir enige toepassing gebruik nie. Ek kan nie met ‘n
verkyker na ‘n mier se saamgestelde oog kyk nie. ‘n Mikroskoop werk
ook nie mooi om na diere in die veld te kyk nie. ‘n Duikbril is
selde ‘n goeie leesbril en ‘n kontaklens beteken niks op ‘n duur
kamera nie.
Daar is ‘n spreekwoord wat
sê: “Deur watter bril kyk jy?”
Dié spreekwoord beteken dat ek
en jy dinge in die lewe verskillend kan sien omdat ons uit
verskillende raamwerke kyk. So kan ‘n negatiewe mens dalk nie iets
snaaks in ‘n situasie sien nie want niks is vir hom snaaks nie,
terwyl ‘n ander ou rondkruip van die lag oor dieselfde situasie.
Iemand wat arm grootgeword het sien besittings in ‘n ander lig as
iemand wat in oorvloed grootgeword het. Daarom sal jy dikwels kry
dat mense wat min het, baie meer waarde heg aan ‘n klein geskenkie
as iemand wat in oorvloed lewe. ‘n Verliefde ou sien ‘n meisie ook
anders as iemand wat nie verlief is op haar nie.
So gaan ons deur die lewe met
verskillende sienings omdat ons deur verskillende brille kyk.
Ongelukkig bring dit dan ook mee dat mense met ‘n swak selfbeeld glo
niemand het agting vir hom nie. Hy het dus ‘n dowwe bril op namens
iemand anders, en vorm ‘n mening oor homself. Omdat hy dus glo dat
ander nie van hom hou nie, sien hy homself deur ‘n verwronge lens en
kan hy homself naderhand ook nie meer verdra nie.
Hoe kyk jy na jouself? En
hoeveel beïnvloed jou mening jou gedrag? As jy met ‘n verkyker
probeer diepseeduik sal jy naderhand niks meer van die wonder van
die skepping raaksien nie want jy het die verkeerde toerusting. As
jy dus objektief na jouself wil kyk moet jy van ‘n paar verkeerde
lense ontslae raak.
Hoe sien jy die Here?
·
As ‘n wrede God wat net wil straf?
·
As ‘n God wat nie kan wag om jou voor die regterstoel te kry
nie?
·
‘n Perfeksionis wat net met 100% tevrede is?
·
‘n God wat die heeldag jou sondes in Sy swart boekie opskryf?
·
Een wat daarvan hou om ou koeie uit die sloot te grou?
·
‘n God wat afwesig geraak het soos ‘n afwesige pa?
·
Een wat jou so gemaak het en so laat staan het?
·
‘n God met ‘n swak geheue wat heeltemal van jou vergeet het?
Ex 32 : 30 – 35 Die
volgende dag het Moses vir die volk gesê: “Julle het 'n ernstige
sonde gedoen, maar ek klim nou na die Here toe op en miskien kry ek
by Hom vir julle vergifnis vir julle sonde.” Moses het toe na die
Here toe teruggegaan en gesê: “Hierdie volk het 'n ernstige sonde
gedoen deur vir hulle 'n god van goud te maak. Vergewe tog hulle
sonde. As dit nie kan nie, moet U my naam maar uitvee uit die boek
wat U geskrywe het.” Maar die Here het hom geantwoord: “Nee, Ek sal
hulle wat teen My gesondig het, se name uit my boek uitvee. Gaan lei
jy nou die volk na die plek toe waarvan Ek met jou gepraat het. My
engel sal voor jou uit gaan. Op die dag dat Ek rekenskap eis, sal Ek
die volk straf oor hulle sonde.” Die Here het die volk met 'n ramp
getref oor die kalf wat Aäron op hulle aandrang gemaak het.
Hierdie klink inderdaad na ‘n
moeilike storie van ‘n onverbiddelike God. Sodra jy iets verkeerd
doen, sal Hy jou staf. Mense kom sê maklik met roekelose uitsprake
soos: “Jy is siek oor onbelyde sondes, of dinge in jou verlede, of
sondes van jou voorvaders”. As ons die wet van God lees, lyk dit ook
maar moeilik. Luister bv hierna: “Jy mag die Naam van die Here
jou God nie misbruik nie, want die Here sal die een wat sy Naam
misbruik, nie ongestraf laat bly nie.”
Wel, ons weet dat God heilig is
en baie ernstig oor sondes is. Hy kan dit nie aanvaar, of net
daarvan vergeet nie nie. Wat is die persentasie van volmaaktheid wat
goed genoeg sal wees om jou te kwalifiseer vir die hemel? 10% - 30%
- 50% - 70% - 90 % of dalk 100%? God wil 100% hê! Maar hoe nou
gemaak, want niemand van ons kan vol punte by God behaal nie?
Deur watter bril kyk jy na
God?
As jy deur ‘n ou Testamentiese bril kyk lyk dit of enige faling jou
gaan laat les opsê. Dis óf 100%, óf niks.
Gal 3:10 Maar almal wat
staatmaak op die onderhouding van die wet, val onder die vloek, want
daar staan geskrywe: “Daar rus 'n vloek op elkeen wat nie stiptelik
alles doen wat in die boek van die wet geskrywe staan nie.”
Eish, dis moeilikheid! Dit lyk
of 100% al is wat gaan werk! Indien dit so is, is ons verdoem!
Maar, kom ons kyk nou na die
Here en wel deur die bril genaamd Jesus Christus. Indien ons
dit regkry, lyk die beeld ewe skielik heeltemal anders, want dan
sien ons die ware aard van God se liefde.
1 Joh 4:8 “Wie nie liefhet
nie, het geen kennis van God nie, want God is liefde.”
Dit lyk dus of ons dalk net die
liefdevolle aard van God kan mis as ons deur die verkeerde bril
kyk.
Kom ons sit dus nou die
“Jesus-bril” op. As ek my hart vir Jesus gee “lyk” alles skielik
heeltemal anders. Skielik verval die erns van die oordeel op grond
van Rom 8:1 “Daar is dus nou geen veroordeling vir dié wat in
Christus Jesus is nie.”
Gal 3:11 “En dat niemand op
grond van die wet deur God vrygespreek word nie, is duidelik, want
“hy wat deur God vrygespreek is omdat hy glo, sal lewe.” Omdat
hy GLO en dit is geloof in Jesus!
Gal 3:13 “Christus
het ons losgekoop van die vloek wat die wet meebring, deur in ons
plek 'n vervloekte te word. Daar staan naamlik geskrywe: “Vervloek
is elkeen wat aan 'n hout opgehang is.”
Nou is dit maklik om te
verstaan. Sonder die Jesus-bril lyk God soos Een wat net wil straf,
maar met die Jesus-bril sien ons Sy genade!
Nou is die vraag, hoe sien
God vir jou en my? Hy sien jou ook deur die Jesus-bril.
Jesus, as Sy enigste Seun, wat Hy gestuur het vir jou en my, gee jou
onmiddellik ‘n 100% punt. Nie omdat jy dit verdien nie, maar omdat
Hy dit namens jou verdien het.
Kan jy sien dat dit ‘n
tweerigting glas is? Een wat die effek van sondes volmaak uitfilter,
soos wat ‘n donker lens die skadelike strale van die son wegkeer. As
jy te lank in die son te kyk, sal jy jou oë beskadig, maar as jy met
die regte toerusting kyk, is die probleem egter opgelos. ‘n Sweiser
sweis nie sonder ‘n sweisbril nie, want hy sal sy oë beseer en later
sy sig verloor. ‘n Diepsee duiker duik nie sonder sy duikbril nie,
want hy wil nie water in sy oë hê as meneer haai nader kom nie. ‘n
Wetenskaplike kyk nie deur ‘n verkyker as hy ‘n virus wil isoleer
nie. ‘n Jagter soek nie ‘n bok in die vêrte met sy leesbrilletjie op
nie.
God kyk nie na jou met
dieselfde bril as waarmee jy na jouself kyk nie. As Hy dit gedoen
het, sou Hy jou gesien het soos wat jy jouself sien as jy
inmekaargetrek van skuldgevoel sit. Wanneer Hy egter deur die Jesus-bril
na jou kyk, sien Hy ‘n volmaakte wese. Jesus neem nie die sonde as
sulks weg nie, Hy neem die skadelike effek van die sonde weg, soos
wat ‘n sweisbril die skadelike effek van die sterk sweisvlam
wegneem.
Die kuns is om jouself dus op
die regte manier te sien. Die punt is net, omdat ons nie vir Jesus
kan sien nie, moet ons dus staatmaak op ons geloof, soos wat die
volgende teks sê: Heb 11:1 “Om te glo, is om seker te wees van
die dinge wat ons hoop, om oortuig te wees van die dinge wat ons nie
sien nie.”
Jesus is die “ultimate” lens
waardeur ons na God kan en moet kyk, en waardeur God na ons kyk. Ons
sien ’n volmaakte, maar liefdevolle God en Hy sien ‘n volmaakte mens,
Sy kind.
As jy die volle impak hiervan
kan verstaan en glo, MOET jou lens verander waardeur jy na jouself,
en na ander mense kyk.
Hier is God se versie vir
jou, om te bewys wat Hy sien:|
Sef 3:17 “Die Here jou God is by jou, Hy, die krygsman wat
red. Hy is vol vreugde oor jou, Hy is stil-tevrede in sy liefde. Hy
jubel en juig oor jou”