Spr.
3:27
Moenie 'n weldaad weerhou van
iemand aan wie dit toekom, terwyl dit in jou mag is om dit te bewys
nie.
Wat is die woord wat jy as kind die meeste gehoor het by jou ouers?
As ek nou terugdink was dit waarskynlik die woord “nee”. Jy mag nie
dit nie, jy mag nie dat nie, moenie, hou op, stop dit! Dit gaan
seker maar oor ’n mens se willetjie wat nie altyd goed is vir jou
nie. Dis nou maar hoe dit is, ’n kind moet nee hoor. As hulle dan
grootword lyk dit my nee is so ingeprent, dat hulle sommer ook vir
alles nee sê. Dan kry mens ja-broers. Hulle sê ja, maar dan doen
hulle nee. My pa het baie nee gesê, maar daar was definitief ook ’n
plek vir ja. As hy vir my ’n opdrag gegee het en ek sê: “Ek kan nie”,
het ek gehoor: “Kannie is dood van kruiwa stoot.” Daarmee het hy
eintlik bedoel: “Ja jy kan, ja jy het die vermoë, ja ek vertrou jou
daarmee, ja dis goed vir jou.”
Soos wat mens ja-broers kry, kry
jy nee-mense. Hulle is eintlik aan dieselfde kant van die draad as
die ja-broers. Dit maak nie saak wat jy hulle vra nie, die antwoord
is altyd nee. Nee, nie nou nie, nee, ek kan nie, nee, ek doen reeds
te veel, nee, it’s not my cup of tea, nee, ek sal dink en terugkom
na jou toe of ek sal eers daaroor bid en dan terugkom na jou toe.
Natuurlik moet mens bid oor ’n saak, maar nog nooit het een enkele
persoon wat so gesê het teruggekom na my toe en gesê: “Die Here het
vir my gewys dit moet nee wees nie.” Miskien bid hulle nog steeds.
Nee-mense kry nie veel gedoen nie.
Talente word onder die maatemmer gelos, daar word geen uitdagings
aanvaar nie en sulke mense se lewens is nogal leeg en oninteressant.
As Billy Graham, of Angus Buchan, of Moeder Theresa nee-mense was,
sou die wêreld ’n arm plek gewees het. Nou ja, mens sê verseker ook
nie vir alles net ja nie. Ons moet nee sê vir sonde, nee vir
verkeerde verhoudinge, nee vir misdaad, nee vir die verleidinge van
satan, nee as dinge nie in my beste belang is nie, nee as ek weet
dit gaan my in die moeilikheid laat beland, nee vir skinderpraatjies
en goor houdinkies.
Die wêreld en die Here soek egter
ja-mense. ’n Ja-mens werk onder Fil. 4:4 “Ek is tot alles in
staat deur Hom wat my krag gee”. Dis mos nou kragtig, man. Ja,
ek sal, ja ek wil, ja ek gaan probeer, ja ek vat hierdie uitdaging.
As die Here vir sê: “Ek het jou nodig vir ’n jobbie”, dan sê jy:
“Ja, Here, ek vertrou dat U my sal toerus. Ja, Here, ek is regtig
bang, maar met U kan ek enige iets doen”. Hulle sê mos: “God doesn’t
call the equipped, He equips the called.” Ek vra eendag vir my
vriend, Buks Moolman: “As jy dink jy hoor die Here se stem, wat doen
jy?” Toe sê hy: “Ek doen dit dadelik en vra die vrae later.” Buks is
’n ja-mens. En boeta, hy move!
Ja-mense is mense wat uitdagings
aanvaar, of dit jou klein is of groot. Weet jy waartoe jy in staat
is? Dit hang af of jy dít oefen wat nodig is. Wat is die verskil
tussen:
·
My en Arnold
Schwarzenegger?
Hy oefen en ek nie.
·
Piet
Pompies Golfer en Earnie Els? Earnie Els oefen beslis meer.
·
Mnr. Nee
en my vriend, Buks? Buks doen en vra later vrae. Mnr. Nee is net
eenvoudig te bang.
Ja-mense onderskat nie hulleself
nie. ’n Ja-persoon sê nie: “Ek kan nie", hy sê dalk: “Ek het nog nie,
maar watch my.” Ken jy die spreekwoord: “Rather aim for perfection
and miss it, than to aim for failure and hit it?” Mense wat groot
hoogtes behaal, spesifiek op geestelike vlak, is mense wat bereid is
om foute te maak. Gaan preek êrens, al is jy nie ’n opgeleide
prediker nie. Weet jy hoe doen jy dit? Jy gaan vertel net wat jy glo.
Jy hoef nie eers die versies uit jou kop uit te ken nie, vat sommer
net jou Bybel saam.
Matt. 5:34-37
Maar Ek sê vir julle: Moet glad nie 'n eed aflê nie, nie by die
hemel nie, want dit is die troon van God; nie by die aarde nie, want
dit is die rusplek vir sy voete; nie by Jerusalem nie, want dit is
die stad van die groot Koning. Jy moet ook nie jou kop op die spel
plaas as jy 'n eed aflê nie, want jy kan nie een haar wit of swart
maak nie. Laat julle ‘ja’ eenvoudig ‘ja’ wees en julle ‘nee’, ‘nee’.
Wat meer gesê word as dit, kom van die Bose.”
Matt. 21:28-31
“Wat sê julle hiervan? Daar was 'n man met twee seuns. Hy het vir
die een gaan sê: ‘Seun, gaan werk vandag in die wingerd.’ ‘Ek wil
nie!’ antwoord hy, maar later het hy spyt gekry en tog gegaan. Die
man het toe na die ander seun toe gegaan en vir hom dieselfde gesê.
Hy het geantwoord: ‘Goed, Pa,’ maar hy het nie gegaan nie. Wie van
die twee het gedoen wat hulle pa wou hê?” Hulle sê: “Die eerste.”
Toe sê Jesus vir hulle: “Dit verseker Ek julle: Tollenaars en
prostitute gaan eerder as julle in die koninkryk van God in.
Ja-mense is dáár vir ander mense.
Spr. 3:27 Moenie 'n weldaad
weerhou van iemand aan wie dit toekom, terwyl dit in jou mag is om
dit te bewys nie.
Ja-mense kan voortgaan, al is daar
nie meer lig in die tonnel nie. Hulle is dié wat ander se hande vat
en hulle lei, al sukkel hulle dalk self om te sien.
Die voordele daarvan om ’n
ja-mense te wees:
·
Hulle leer elke dag meer en meer.
·
Hulle leer hulle eie sterk punte ken en werk aan hulle
swak punte.
·
Hulle self-waarde neem by die dag toe en hulle oorkom
minderwaardigheid.
·
Hulle beweeg vorentoe in die lewe.
·
Hulle is ’n bate vir ander, ’n bate vir die Here en ’n
bate vir Sy Koninkryk hier op aarde.
·
Hulle is goeie vriende vir ander en hulle is
betroubaar.
·
Hulle kan deur die Here gebruik word.
·
Hulle maak die beste van elke situasie.
·
Hulle maak ’n verskil.
Die nee-mens vs. die ja-mens:
Ek kan nie |
Ek sal uitvind hoe |
Ek het nie tyd nie |
Gee my ’n minuut, dan is ek daar |
Ek sal daaroor dink |
Wanneer kan ek begin |
Ek kan geen verskil maak nie |
Ek sal my beste doen |
Ek het my eie probleme |
Ek sal jou help met ’n oplossing |
Help my met my laste |
Ek is daar vir jou |
Ek kan nie op my eie voete staan nie |
Twee vaar beter as een |
Ek het die einde van die pad bereik |
Ek is tot alles in staat deur Hom wat my
krag gee |
Toets jouself bietjie hieraan:
·
Kan jy ja sê vir iemand sonder om te aarsel?
·
Kan jy ja sê vir die Here sonder om te wonder of jý
die regte persoon is?
·
Is jy bereid om nuwe waters te toets?
As jy vandag op die water wil
loop, klim uit die boot uit! Hou op met verskonings sê: “Ja!”