ONS PERSOONLIKE
AGTERGROND
My naam is Willem Botha en vroulief se naam is Wilna. Ek
was vanaf 2004 tot 2013 by ‘n plaaslike radiostasie,
genaamd Radio Rippel 90.5 betrokke met die aanbieding
van Geestelike programme. (Rippel 90.5 is Aug 2013
oorgeneem deur GrootFM 90.5)
Ons is lidmate van NG
gemeente Moreletapark waar ons beide in verskillende
bedieninge betrokke was, onder andere met die aanbied
van Mannekampe wat gestrek het oor ‘n tydperk van meer
as tien jaar.
KAMPE VIR GESTREMDES
In 2009 het ons besef dat daar ‘n groot leemte onder
gestremde persone bestaan in terme van kampe en ander
aktiwiteite en het ons in 2009 die eerste kamp aangebied.
Om so ‘n kamp aan te bied hou natuurlike groot
uitdagings in omdat dit moeilik is om ‘n gestremde
persoon te versorg in terme van persoonlike- en ander
behoeftes. Die oplossing het daarin gelê dat die
gestremde persoon ‘n helper saambring om daardie rol te
vervul, asook om vervoer moontlik te maak.
HELPERS
Ons het
voorts onmiddellik reaksie gekry van persone wat
aangebied het om deel van die aanbiedingspan te wees om
alles te fasiliteer en ons het tans ‘n span van 10
ywerige mense bymekaargekry wat onbaatsugtig deelneem
aan die projek.
FINANSIES
Ons volgende uitdaging was om finansiële hulp te kry,
omdat die meeste huise waar gestremdheid voorkom, onder
geweldige finansiële druk gebuk gaan. Boonop moet daar
twee persone uit een huishouding gehuisves word wat dit
bykans onmoontlik maak om die kampe bekostigbaar aan te
bied. Ons het met die tyd skenkings uit verskeie oorde
ontvang en het tot op datum 13 kampe gratis aangebied.
Keer op keer is ons verstom oor die wonderwerke wat
gebeur en elke kamp is meer geseënd as die vorige een.
Die gemiddelde totale
koste van so ’n kamp beloop tans R17 000, wat alles
insluit, van kos en verblyf, tot ander bederfies wat dit
lekker maak vir die kampers; dit sluit egter nie vervoer
in nie.
GESTREMDES
Die kampers word beperk tot persone bo 18 wat die kamp
sinvol kan ervaar, ongeag die aard van die gestremdheid
en het ons tot op hede persone met bykans enige vorm van
gestremdheid op die kampe gehad, o.a. blindes, dowes,
mense met Downs sindroom, verstandelik gestremdes,
hemipleë, kwadrupleë, ens.
INHOUD VAN KAMPE
Die inhoud van die kampe is Geestelik en interkerklik,
sodat enige persoon van enige denominasie tuis behoort
te voel. Elke kamp het ’n spesifieke tema en al die
praatjies en aktiwiteite word hiervolgens beplan en
aangebied. Elke kamp is ook volgepak met baie pret en
speel en buitelug aktiwiteite, wat gewoonlik die
hoogtepunte van die naweek is. Die kamp strek oor twee
dae, van Saterdag oggend tot Sondag middag en is altyd
‘n hoogtepunt in hierdie persone se lewe.
KAMPTERREIN
Die kampe word aangebied by Deo Volente Bush
Adventures en die span by Deo Volente gaan uit hulle pad
om die kamp so probleemvry as moontlik te hanteer en het
al menige verbeteringe aangebring om die geriewe
rolstoel vriendelik te maak. Die maksimum aantal persone
wat gehuisves kan word is veertig.
HEUNING BEDIENINGE
Ons het ‘n vrywillige assosiasie gestig, nl. Heuning
Bedieninge waaronder ons tans die kampe aanbied. Heuning
Bedieninge bestaan uit drie bestuurslede: Willem Botha,
Dennis Engelbrecht en Advokaat Matthew Klein. Willem en
Dennis is deel van die bedieningspan, terwyl Matthew as
‘n onafhanklike persoon deel is van die bestuur.
Daar is en was uit die aard van die saak geen
persoonlike of finansieële voordeel vir enige van die aanbieders of
organiseerders nie.
FOTO’s EN GETUIENISSE
Klik hier om getuienisse en foto's
te sien van die vorige 15 kampe wat aangebied is >>
KONTAKBESONDERHEDE
Indien enige persoon of instansie voel om deel te wees
van hierdie projek, kan ons gekontak word by wilna@heuning.co.za
Ons glo dat die kampe ‘n
verskil maak in mense se lewens en sal graag wil sien
dat hierdie inisiatief voortgaan.
~ Willem & Wilna |