Wat beteken hierdie stelling vir
jou: Die kerk wat God liefhet?
Daar is twee aspekte:
1. Die kerk wat vir God lief is.
2. Die kerk vir wie God lief is.
Hierdie twee kante kom beide mooi
saam in:- Die kerk wat God liefhet. Wat beteken dit vir jou? Kan ons weet
hoe die kerk lyk vir wie God regtig lief is? Of sal ons sê "Die Here
is lief vir elke kerk?" Dis seker waar. Maar is die kerk - elke kerk
- werklik lief vir God? Sjoe, dis 'n gevaarlike vraag. En omdat dit so
gevaarlik is, sal ons maar die antwoord in die Bybel moet soek. Maar eers
moet ons definieer wat "kerk" beteken. Jy is in 'n kerk en ek is
in 'n kerk. Ja of nee? Ek dink die woordkeuse is verkeerd. Ek en jy is in
'n gemeente, van 'n spesifieke denominasie, 'n lidmaat, of jy neem daar
deel aan 'n geloofsgemeenskap. Maar primêr, is ek en jy kerk. Die kerk
van die Here Jesus Christus is 'n bondel individue, wat saam in die
liggaam van Christus as kerk funksioneer. As ons elkeen deelneem en ons
take uitvoer en ons gawes uitleef. As …..
1 Kor 12 : 12 - 28a
12 Net soos die liggaam 'n eenheid is en baie lede het, en soos al die
lede saam, al is hulle baie, een liggaam vorm, so is dit ook met die
liggaam van Christus.
13 Omdat ons almal een liggaam geword het, is ons almal met die een Gees
gedoop, of ons nou Jood of Griek is, slaaf of vry. Ons is almal van die
een Gees deurdrenk.
14 Die liggaam bestaan ook nie net uit een lid nie, maar uit baie.
15 As die voet sou sê: Omdat ek nie 'n hand is nie, is ek nie deel van
die liggaam nie, hou hy om dié rede tog nie op om deel van die liggaam te
wees nie.
16 En as die oor sou sê: Omdat ek nie 'n oog is nie, is ek nie deel van
die liggaam nie, hou hy om dié rede eweneens nie op om deel van die
liggaam te wees nie.
17 As die hele liggaam oog was, hoe sou hy kon hoor? En as die hele
liggaam oor was, hoe sou hy kon ruik?
18 Maar nou het God die lede, elkeen van hulle afsonderlik, in die liggaam
gevoeg soos Hy dit wou hê.
19 As almal saam net een lid was, hoe sou daar 'n liggaam kon wees?
20 Nou is daar wel baie lede maar net een liggaam.
21 Die oog kan nie vir die hand sê: Ek het jou nie nodig nie. Die kop kan
weer nie vir die voete sê: Ek het julle nie nodig nie.
22 Inteendeel, die lede van die liggaam wat as die swakste voorkom, is
juis noodsaaklik,
23 en dié wat vir ons minder mooi lyk, klee ons met groter sorg. So word
ons minder aansienlike dele besonder mooi gemaak,
24 terwyl die aantreklike dele dit nie nodig het nie. God het die liggaam
so saamgestel dat Hy groter eer gegee het aan die lid wat eer kortkom,
25 sodat daar nie verdeeldheid in die liggaam sou wees nie, maar dat die
lede gelyke sorg vir mekaar dra.
26 As een lid ly, ly al die lede saam; en as een lid geëer word, is al
die lede saam bly.
27 Julle is die liggaam van Christus, en afsonderlik is elkeen 'n lid
daarvan.
28 En in die kerk is daar mense aan wie God 'n bepaalde taak gegee het.
Ten eerste is daar apostels, ten tweede profete, ten derde leraars; verder
is daar dié wat wonderdade kan doen
Dit is wat kerk beteken. Definitief
nie 'n gebou nie, of 'n beweging, of 'n kerkraad nie, maar mense, wat deur
God aangeraak is, wat doen wat die Here se bedoeling met kerk is. Die
vraag is, werk dit?
1. Die kerk wat God liefhet, is 'n
kerk (geloofsgemeenskap) waar daar eenheid is. Volkome eenheid, met 'n
gemeenskaplike doel en fokus. En as daar verskille kom, dan word dit met
volwassenheid en liefde hanteer, totdat die verskil uit die weg geruim is.
Gal 5 : 14 - 15
14 Die hele wet word in hierdie een gebod saamgevat: Jy moet jou naaste
liefhê soos jouself.
15 Maar julle byt en verskeur mekaar; pas op dat julle mekaar nie later
heeltemal verslind nie.
En is dit nie maar daagliks aan die
orde van die dag nie. Lidmaat teen lidmaat, gemeente teen gemeente, leraar
teen leraar, lidmaat teen leraar, en anders om. Dikwels oor snert. Dan
wonder ek maar net hoe lief ons vir die Here, en vir Sy saak is. Jy sien,
hierdie liggaam van Christus, kan nie werk as ons nie saam staan in
ons geestelike werk nie. Ons moet toleransie hê vir mekaar en ons
moet 100%
saamstem. Iemand maak eendag hierdie opmerking: "Die Christene is
die enigste weermag wat sy eie soldate skiet". En dit is 'n baie baie
ernstige aantuiging teen ons as kinders van die Here. Dan, as goed nie
werk nie, begin ons nog 'n kerk.
Eenheid beteken om 'n
gemeenskaplike doel na te jaag, wat die Here behaag. Het jy al die
stelling gehoor "Ek gaan sit nie in die kerk tussen al daardie
skynheiliges nie"? Wel, skuus, ek is een van hulle want ek is 'n
sondaar, totaal onvolmaak, met baie foute. Maar ek is gered deur Jesus se
genade. Moet tog nie kies om die Ewige Lewe te mis as gevolg van my sondes
nie.
Die kerk wat God liefhet, is die
kerk waar die Woord van God in sy totaliteit sentraal staan en as die
volle en enigste waarheid voorgehou word. Is dit nie sleg dat die kerk vir
jare sukkel om te verstaan wat dit beteken as die Here sondes in die Bybel
uitwys nie. Dan kom ons op die punt wat ons as mense dan besluit dat die
Bybel seker verkeerd is, of verkeerd vertaal is, of nou anders
geinterpreteer moet word. Jy sien, God het elke sondaar lief, daarom
spreek Hy netelige sake in die Bybel aan, want dan kan ons aan hierdie
goete begin werk. Die Here het ons heeltemal te lief, om ons te los soos
ons is. Daarom het Hy Sy Woord vir ons gegee. Ons hoef nie te besluit of
God ernstig was toe Hy Sy Woord saamgestel het nie. Is Hy dan so 'n
onmagtige Vader dat Hy nie Sy eie Woord in stand kan hou nie. Hy wat die
hele skepping in stand hou, kan sekerlik Sy Woord instand hou, vir vandag,
totaal relevant.
2 Tim 3 : 16
"Die hele Skrif is deur God ge-inspireer en het groot waarde om in
die waarheid te onderrig, dwaling te bestry, verkeerdhede reg te stel en
'n regte lewenswyse te kweek, sodat die man wat in diens van God staan,
volkome voorberei en toegerus sal wees vir elke goeie werk.".
En dit sê alles. Die hele Skrif is
deur God geinspireer. Vir vandag, vir die verlede, en vir die toekoms.
Die kerk wat God liefhet, staan op Sy Woord, en lees dit, en leef dit.
Die kerk wat God liefhet, is die
kerk wat Jesus as die enigste Saligmaker erken en verkondig. Dis die kerk
waar mense tot bekering kom, omdat die Weg na Saligheid verkondig word.
Die kerk wat groei, nie omdat nuwe mense intrek nie, maar omdat mense
buite die kerk bereik word. Hier, 'n bietjie verder, nog verder, tot aan
die uithoeke van die wêreld. Jerusalem, Judea, Samaria, tot aan die
uithoeke van die wêreld. En nee, nie deur die pastoor of die dominee nie,
maar deur my en jou.
Die kerk wat die Here liefhet, is
die een waar die lidmate toegerus, bemagtig en vrygestel (release) word,
om Jesus se opdrag te gaan uitvoer.
Matt 28 : 19 "Gaan dan na
al die nasies toe, en maak die mense my dissipels."
Ek en jy moet dit doen - ons - die
kerk.
Komaan kerk, kom ons gaan maak 'n
verskil, ons wat vir God lief is.
|