Ek neem jou terug na ‘n paar momente in ons
geskiedenis (toemaar, dit het niks met politiek te make nie, al mag dit
dalk aanvanklik so klink). Baie jare gelede hou ons ‘n referendum en die
land moet stem: ja of nee. Ons moet besluit in watter rigting die regering
moet gaan. Ongeag wat jy gestem het, was daar dalk ‘n gevoel van vrees.
Nelson Mandela word vrygelaat en later word hy die president. Weer beleef
baie van ons ‘n mate van vrees. Swart bemagtiging volg, mense sing: skiet
die boer, plase word afgeneem en alles raak meer en meer onseker.... en
hier sit ons nou vandag, steeds onseker en dalk vol vrees.
Ek weet nie wat vandag in jou hart aangaan nie, maar
as mens dink aan dinge soos finansies, huweliksprobleme, gesondheid,
werkloosheid, toekoms, pensioen, misdaad, kinders, skole en opvoeding kan
mens dalk vrees voel opstoot in jou binnekant.
1 Sam 7:7-12
Die Filistyne het verneem dat die Israeliete by
Mispa bymekaargekom het, en die Filistynse regeerders het teen hulle
opgetrek. Toe die Israeliete dit hoor, was hulle bang vir die Filistyne.
Die Israeliete sê toe vir Samuel: “Moenie ophou om die Here ons God vir
ons om hulp te smeek nie, sodat Hy ons uit die mag van die Filistyne kan
red.” Samuel het 'n
suiplam gevat en dit in sy geheel aan die Here as brandoffer geoffer. Hy
het ook die Here om hulp gesmeek vir Israel, en die Here het sy gebed
verhoor. Samuel was nog besig om te offer, toe kom die Filistyne nader om
teen Israel te veg. Op daardie dag het die Here 'n groot donderweer oor
die Filistyne laat losbars. Die Here het hulle verwar, en hulle is deur
die Israeliete verslaan. Die Israeliete het van Mispa af die Filistyne
agtervolg en hulle verdryf tot onderkant Bet-Kar.
Samuel het toe 'n klip
gevat en dit regop gesit tussen Mispa en Sen. Hy het die plek Eben-Haeser
genoem, “want,” het hy gesê, “tot nou toe het die Here ons gehelp.” (Die
naam Eben-Haeser hou verband met die Hebreeuse woorde vir “klip” en
“help”.)
Na ‘n tyd van onsekerheid en vrees kom die
oorwinning, en Samuel sê: tot nou toe het die Here ons gehelp. ‘n
Wonderlike kragtige belydenis. ‘n Belydenis wat vloei uit terugkyk, die
Here raaksien, Hom innig bedank, ‘n “altaar” oprig en erkenning gee aan
die Here.
Ons leef in ‘n tyd van “doom and gloom”. Weet jy wat
is ons probleem? Ons spartel te veel oor die onsekerheid van die toekoms,
en kyk nooit meer terug na die oorwinnings van die verlede nie. Het jy al
ooit oor die verlede gevrees? Natuurlik nie, dit sou sinneloos wees, dis
bekend en verby. Onthou, die toekoms van dinge waaroor jy lank gelede
gevrees het, is nou alreeds verlede tyd. En dalk was dit toe nie eers so
sleg as wat jy gedink het dit sou wees nie. Nou vra ek jou: waar is jou
klip-monumente? Jou Eben-Haesers? Het jy al by sulke plekke van intense
dankbaarheid in jou lewe gekom waar jy gesê het: tot nou toe het die Here
ons gehelp? As jy terugkyk, sien jy sulke monumente op jou lewenspad? Of
is daar net klaagstasies?
Jy sien, ons as Christene is op geen manier gevrywaar
van moeilike tye nie, en as jy dink die lewe is een groot gladde oseaan
sonder storms, maak jy ‘n groot fout. Voorts dink ek die uitdagings vir
oorlewing is vandag so groot dat ons nie eers meer moeite doen om die lewe
te geniet nie, wat nog van stilword en besin oor ons huidige toestand.
Eben-Haeser. “Tot nou toe het die Here ons gehelp”,
maak plek vir “Here, hoe nou vorentoe? Gaan U daar wees? Dink U nog aan
my? Waar is U Here?
Toe Samuel gesê het "Eben-Haeser, tot nou toe het die
Here ons gehelp", was sy manskappe dalk besig om hulle eie mense se lyke
bymekaar te maak. Weet jy wat gebeur in oorlog? Mense gaan dood. Daar was
waarskynlik ‘n erge verlies aan lewens. Eben-Haeser beteken nie daar was
geen swaarkry tot nou toe nie. Dit beteken nie dat daar geen letsels is
nie, of lewensverlies, of dat jy jou werk verloor, of dat daar
huweliksprobleme kom nie. Eben-Haeser beteken te midde van dit alles, ten
spyte van swaarkry, het die Here my gehelp. Dit is daardie tye toe jy net
die een ry spore in die sand gesien het en gevra het: “waar was U Here?”,
en Hy geantwoord het: “dis My spore terwyl Ek jou gedra het”.
Die Here is nie weg in moeilike tye nie, Hy het jou
nie verlaat nie, Hy het nie Sy gesig weggedraai nie, Hy is waarskynlik nie
besig om jou te straf nie, Hy het jou nie vergeet nie. Hy was daar, Hy is
daar en Hy sal daar wees, maak nie saak wat nie. Eben-Haeser vra vir
terugkyk, raaksien, besef, onthou, besin en dan... om erkenning te gee en
dankbaar te wees. Ons probeer te veel om die huidige omstandighede te
verander en te probeer swaai om ons te pas. Dalk moet jy vandag begin om
dit te aanvaar, selfs besluit om daarmee saam te leef, en die Here se hand
voortdurend in alles raak te sien. Dan kan jy dalk jou klip-monument
neersit en sê: “tot hier toe het die Here my gehelp”.
Met Eben-Haeser kan ek vorentoe gaan. Ja, met vrees,
onsekerheid en kommer, maar steeds in my geestesoog in die toekoms die
klip-monumente raaksien. Soos telefoonpale op die oop pad wat voor jou
uitstrek in die toekoms in. Moenie probeer om net een reuse een voor jou
te sien wat aan die einde van jou lewenspad geplant is nie. Toe Samuel die
plek Eben-Haeser genoem het, was dit om erkenning aan die Here te gee, Hy
het nie gesê: “tot nou toe het ek reggekom” nie. Ek kry mense so jammer
wat net op hulle eie kragte staatmaak, want ek dink hulle kry bitter
swaar. Wanneer jy jou klip regop staan maak, sê jy nie net: “tot nou
toe...” nie, jy sê: “Here, ek is reg vir die volgende entjie”. Al is dit
net een week of een maand vooruit.
Ons spartel onsself oor ‘n mik om ‘n seepgladde
toekoms vir onsself te verseker. Na die oorwinning by Mispa was daar nog
baie oorloë, soms vernedering, soms oorwinning, maar Samuel het nie sy kop
daaroor gebreek nie; dit was ‘n probleem vir ‘n ander dag.
- Kan jy terugkyk oor jou lewe en sê:
“dankie Here, tot nou toe het U ons gehelp”?
- Het jy genoeg dankbaarheid in jou lewe om vir die Here daardie erkenning
te gee?
- Kan jy vorentoe kyk en die Here genoeg vertrou tot by die volgende
klip-monument?
- Kan jy aanvaar dat oorwinning vandag, en die Here se altyd teenwoordige
helpende hand nie net gladde waters beteken nie?
- Is jy bereid om jou klip-monument openlik as ‘n getuienis uit te pak,
sodat ander hoop daaruit kan put?
Sit ‘n klip sigbaar op jou lessenaar of in jou huis vir ander om te sien.
As iemand jou daaroor uitvra, dan sê jy dis my Eben-Haeser, want tot nou
toe het die Here my gehelp. |