Ons
almal het dae van benoudheid en bekommernis; tye wanneer mens voel
jy het géén beheer nie, jou kop is suf planne gemaak, jy sien geen
uitkoms nie en die maagswere groei geil. Die vraag wat ek jou wil
vra is: dink jy dis ‘n sonde om jou te bekommer? Of moet ons sê: Die
Here weet alles, en ons moet net roekeloos op Hom vertrou; Hy weet
beter; Hy sal voorsien? Wel, dis dalk maklik om dit te beaam, maar
die realiteit is dat ons net mens is, en dat ons ons bekommer! Ek
dink min mense het regtig die krag om in tye van nood alles
onvoorwaardelik net te aanvaar en alles net in die Here se hand oor
te laat. Hoe moet ons bekommernis hanteer? Die Here sê in Sy Woord:
Vertrou My. Maar ons weet dat dit maar nag kan wees totdat die
deurbraak kom. As daai vrees mens so beetpak, dat jy voel of jy van
jou verstand af raak …
Kom ons kyk hoe het Jesus opgetree in Sy donkerste
uur:
Matt 26:36-46 Daarna kom
Jesus met sy dissipels by 'n plek met die naam Getsémané, en Hy sê
vir hulle: "Sit hier terwyl Ek daar gaan bid." Hy het vir Petrus en
die twee seuns van Sebedeus saamgeneem. Toe het Hy bedroef en beangs
geword en vir hulle gesê: "Ek voel doodsbenoud. Bly hier en waak
saam met My." Hy het 'n entjie verder gegaan en daar gekniel met die
gesig teen die grond en gebid: "My Vader, as dit moontlik is, laat
hierdie lydensbeker by My verbygaan. Moet nogtans nie doen soos Ek
wil nie, maar soos U wil." Daarna kom Hy na die dissipels toe terug
en kry hulle aan die slaap. Hy sê toe vir Petrus: "Kon julle nie
eens een uur lank saam met My waak nie? Waak en bid, sodat julle nie
in versoeking kom nie. Die gees is gewillig, maar die vlees is swak."
'n Tweede keer het Hy gaan bid en gesê: "My Vader, as hierdie
lydensbeker nie by My kan verbygaan sonder dat Ek dit drink nie,
laat u wil geskied." Toe Hy terugkom, kry Hy hulle weer aan die
slaap, want van die vaak kon hulle nie hulle oë oophou nie. Hy het
hulle weer alleen laat bly en 'n derde keer gaan bid en dieselfde
woorde gesê. Toe kom Hy na die dissipels toe terug en sê vir hulle:
"Slaap en rus julle nog? Die uur het gekom. Die Seun van die mens
word in die hande van sondaars oorgegee. Staan op, kom ons loop. Kyk,
die man wat My verraai, is hier naby."
As ek hierdie deel lees, dan sê dit vir my baie oor
hoe om bekommernis te hanteer. Selfs Jesus was doodsbenoud, beangs,
bedroef ... Luk 22:44 sê Sy sweet het soos bloeddruppels op die
grond geval. Dit lyk my Jesus was waarlik diep bekommerd. Hy het
beslis geweet wat kom; Hy het reeds vir Sy dissipels daarvan vertel.
En Hy was doodbang vir wat voorlê – kan jy jou in daardie situasie
indink?
Ek dink ons kan ‘n klomp dinge leer uit hierdie
gebeurtenis:
-
Jesus het vriende
saam met Hom geneem - Petrus en die twee seuns van Sebedeus. Jy
sien, die Bybel is baie sterk daarop dat mens jou medemens kan
vra om jou laste te help dra. Al gehoor van die uitdrukking:
“tell someone”? ‘n Mens voel altyd beter as jy jou las met
iemand deel. Net om dit vir iemand te sê laat jou beter voel.
Maar Jesus doen meer. Hy vra: bid saam met My. Hoekom doen Hy
dit? Hy is dan sélf God. Die antwoord is seker in die Bybel: die
gebed van ‘n gelowige het groot krag.
-
Jesus sê in vers
38: “Ek voel doodsbenoud”. Hy erken dat Hy swaarkry onder die
druk van hierdie omstandighede. Ons sê mos altyd net: “Dit gaan
uitstekend, dankie! Bitter goed!”, en dan gaan dit meer bitter
as goed, en ons jok vir onsself. Om jou probleme te ontken is om
soos ‘n volstruis met die kop in die sand te staan. Dit help
niks, want dan skram ons weg van die probleem, en word dikwels
passief en depressief. Selfs al vertrou ons die Here 100%, het
ons nog steeds ‘n verantwoordelikheid. ‘n Dominee het eendag
eintlik ‘n mooi perspektief hierop gegee – hy het gesê jy moet
alles doen wat jy kan en moet, voor jy bid vir uitkoms, want
soms is die uitkoms in elk geval voor die hand liggend. Erken
die feit dat dit swaar gaan, sodat jy nie in passiwiteit verval
nie.
-
“My Vader, as dit
moontlik is, laat hierdie lydensbeker by my verbygaan”. Jesus
vra vir uitkoms. Hy weet wat moet gebeur, maar in Sy vrees vra
Hy vir uitkoms. So kan ons ook by die Here pleit vir genade, vir
‘n oplossing, vir ‘n uitkoms – dan gee ons erkenning daaraan dat
dit binne Sy vermoë is om uitkoms te bring.
-
“.. nogtans nie
soos Ek wil nie, maar soos U wil”. Die Here weet tog alles.
Hoekom moet ons dan sò bid? As ons so bid, dan onderwerp ons
onsself aan Sy wysheid en insig en almag, en ons gee erkenning
daaraan dat situasies mag ontstaan waar Hy nie antwoord soos ons
wil hê nie. Goddank, dat Hy nie altyd ons gebede verhoor nie;
Goddank dat Hy nie die lydensbeker by Jesus weggevat het nie.
Goddank dat Sy wil geskied het. Wil ons regtig hê dat die Here
altyd alles moet doen soos ons dit wil hê? Ons kan miskien so
dink, maar gelukkig doen Hy dit nie. Om jouself onvoorwaardelik
aan God se wil te onderwerp, is nie maklik nie. En dis nie
noodwendig ‘n lekker en gladde pad nie. Baie keer sê die Here
“nee”. Interessant hoe hierdie situasie daar in die tuin
afgespeel het – God die Vader het nie met ‘n stem of met ‘n
teken geantwoord nie. Hy het stilgebly. So gebeur dit mos maar
gewoonlik met ons ook. Dan maak Hy sy wil deur omstandighede
bekend. Kan ons Hom regtig genoeg vertrou om te bid: “Laat U wil
geskied”?
-
Jesus aanvaar
dadelik God se antwoord, daarom sê Hy: “Staan op, kom ons loop.
Kyk die man wat My verraai is naby”. Sy gebed is nie verhoor nie
… of is dit? Dit is! “Laat U wil geskied” is beantwoord. So kan
ek en jy ook net sê: “Goed, Here, met U krag gaan ek hierdie
ding aanvaar, en die bul by die horings pak”. Nie ‘n maklike pad
nie, vriend, maar die Here is dáár. In beheer. Op Sy troon.
As jy dalk vandag in ‘n moeilike situasie sit,
probeer die volgende:
-
Neem vriende in
jou vertroue en vra hulle om saam met jou te bid
-
Erken dat daar ‘n
probleem is
-
Vra vir die Here
vir uitkoms
-
Aanvaar dat God se
wil geskied
-
Pak die bul by die
horings, staan op en begin daadwerklik optree
Mag ek jou vandag bemoedig met Haggai 2:4-5?
Maar nou …. skep moed, sê die Here! Begin met die
werk, want Ek is by julle, sê die Here die Almagtige. My belofte wat
Ek met die uittog uit Egipte aan julle gemaak het, sal Ek nakom: my
Gees sal altyd by julle bly. Moenie bang wees nie!
Sien jy, skep moed! Begin met die werk. Doen wat jy
moet doen … alles wat jy kan. Gaan staan by die fontein van moed,
Jesus Christus, druk jou hande in hierdie fontein en skep hande vol
moed. Jesus gee die moed. Skep dit, drink dit in. Die Here weet
altyd wat die beste is. Hy is die bron van moed. Moet nie eers dink
aan selfmoord nie, want by Jesus is geen probleem te groot om op te
los nie. Dis juis omdat Jesus NIE die kruis vrygespring het nie, dat
ons moed kan hê … kom skep!
|