KEN DIE VYAND
Ons stryd is nie teen vlees en bloed nie, maar die bose geeste in die lug.
Glo jy dit? Glo jy dat daar magte en kragte teenwoordig is wat ons nie kan sien nie? Wel, glo dit!! Dit is daar, ongeag of iemand dit glo of nie. Glo jy dat Satan bestaan? Wel, glo dit!! Want as dit nie so was nie, is God 'n leuenaar, en kan ons die Bybel in die asblik gooi. Dink jy die Bybel is waar? Wel, glo dit!! Want ons oppermagtige God het sekerlik die vermoë om Sy Woord in stand te hou.
Ons het Maandag-oggend gepraat oor God se almag en grootheid. Dis dan sekerlik nodig om soms te praat van die vyand. Satan, genoem die verleier, vader van die leuen, owerste van die wêreld, die draak, die dier uit die see, versoeker, vors van die onsigbare magte, dier uit die aarde, ons.
Hoekom moet ons daaroor praat? Wel, dis sekerlik nodig om die vyand te ken. Want as ons hom ken, en sy strategie ken, sy vermoëns, sy metodes, sy geskiedenis, dan kan ons mos meer paraat wees teen die kalant.
Moenie 'n fout maak nie, Satan is oorwin aan die kruis, toe Jesus gesterf en opgestaan het, maar hy is nie weg nie, hy het nie opgehou om ons te verpes nie, Hy is daar, alive and well!! En hy het baie demone in sy weermag. Wees maar op die uitkyk, hy loer agter elke tweede bos uit.
Al is hy oorwin deur Jesus. Dis goeie nuus.
Waar kom hy vandaan?
Openb 12 : 7 - 9
7 Daar het toe oorlog gekom in die hemel: Migael en sy engele moes oorlog
voer teen die draak. Die draak en sy engele het oorlog gevoer,
8 maar hulle is verslaan. In die hemel was daar geen spoor meer van hulle
te vind nie,
9 want die groot draak, die slang van ouds, wat die duiwel en die Satan
genoem word en wat die hele wêreld verlei, is uit die hemel uit gegooi.
Hy is op die aarde gegooi en sy engele saam met hom.
Satan was in die hemel, en is uit die hemel uitgegooi omdat Hy in opstand gekom het teen God.
2 Petr 2 : 4 "God het selfs die engele wat gesondig het, nie gespaar nie. Hy het hulle in die hel gestort en hulle laat boei om in die duisternis gevange gehou te word vir die oordeel."
Dit is dus duidelik dat hy/hulle nie meer in die hemel is nie, in die hel gestort is en nooit weer daar kan uitkom nie. Probleem is net, hy is nie beperk tot die hel nie. Inteendeel, net na Jesus se doop - dis waar Hy vir Sy werk op aarde in Sy amp ingestel is, kom Satan op die toneel. Jitte, lyk my hy kon nie wag nie, toe is hy by Jesus.
Matt 4 : 1 - 11
1 Toe is Jesus deur die Gees die woestyn in gelei om deur die duiwel
versoek te word.
2 Veertig dae en veertig nagte het Hy niks geëet nie en naderhand het Hy
honger geword.
3 Die versoeker het toe gekom en vir Hom gesê: "As U die Seun van
God is, sê hierdie klippe moet brood word."
4 Maar Hy antwoord: "Daar staan geskrywe: 'n Mens leef nie net van
brood nie maar van elke woord wat uit die mond van God kom.
5 Daarna neem die duiwel Hom na die heilige stad toe en laat Hom op die
hoogste punt van die tempel staan
6 en sê vir Hom: "As U die Seun van God is, spring af! Daar staan
mos geskrywe: Hy sal sy engele oor jou opdrag gee Op hulle hande sal hulle
jou dra, sodat jy nie jou voet teen 'n klip3 sal stamp nie.
7 Jesus sê vir hom: "Daar staan ook geskrywe: Jy mag die Here jou
God nie op die proef stel nie.
8 Toe neem die duiwel Hom na 'n baie hoë berg toe, wys Hom al die
koninkryke van die wêreld met hulle prag
9 en sê vir Hom: "Dit alles sal ek vir U gee as U neerval en my
aanbid."
10 Maar Jesus sê vir hom: "Gaan weg, Satan, want daar staan
geskrywe: Die Here jou God moet jy aanbid en Hom alleen dien.
11 Daarna het die duiwel Hom met rus gelaat, en daar het engele gekom en
Hom versorg.
Hy gaan bied sommer vir Jesus al die koninkryke van die wêreld aan. So asof dit aan hom behoort. Kan jy sien dat hy nie sommer 'n ou lammertjie is nie? Hy gaan vat vir Jesus trompop aan. Asof daar geen vrees vir Jesus is nie. Net so, vandag, vir jou en my.
Hoe gaan hy vandag te werk? Die Bybel het talle aanhalings oor die duiwel se metodes. Hy probeer alles.
1. Hy is totaal in beheer van die sondige wêreld.
1 Joh 5 : 19 "Ons weet dat ons aan God behoort, en dat die hele sondige wêreld in die mag van die duiwel is."
Moet wees, dis tog sekerlik nie God wat sonde laat gebeur nie.
2. Hy verlei gelowiges om te sondig.
Matt 16 : 21 - 23
21 Van toe af het Jesus dit vir sy dissipels duidelik begin stel dat Hy
Jerusalem toe moet gaan en baie moet ly onder die familiehoofde, die
priesterhoofde en die skrifgeleerdes, en dat Hy doodgemaak moet word, en
die derde dag uit die dood opgewek moet word.
22 Petrus het Hom toe opsy geneem en Hom begin berispe: "Mag God dit
verhoed, Here! Dit sal beslis nie met U gebeur nie."
23 Maar Jesus het na Petrus toe gedraai en vir hom gesê: "Moenie in
my pad staan nie, Satan! Jy is vir My 'n struikelblok, want jy dink nie
aan wat God wil hê nie, maar aan wat die mense wil hê."
Daar lees ons van Petrus wat vir Jesus wil verseker dat hy nie sal toelaat dat Jesus se heilsplan uitgevoer word nie.
Jesus sê: "Moenie in my pad staan nie Satan! Jy is vir my 'n struikelblok, want jy dink nie aan wat God wil hê nie, maar aan wat die mense wil hê."
Hand 5 : 3 "Petrus sê vir hom:- Ananias, hoekom het jy jou deur die satan laat omhaal om vir die Heilige Gees te lieg en van die verkoopprys van die grond vir jouself agter te hou?"
3. Hy probeer mense weerhou om vir Jesus te aanbid en kennis te versamel.
Matt 13 : 19 "Die Bose kom by elkeen wat die woord van die koninkryk hoor maar dit nie verstaan nie, en vat dan weg wat in sy hart gesaai is."
4. Hy vermom homself as die engel van die lig.
2 Kor 11 : 14 "En geen wonder nie, Satan self doen hom voor as 'n engel van die lig."
Ja, hy het baie planne, hy is baie slinks, en jy sal hom agter elke hoek en draai kry. Kuier in die donker, daarom doen hy homself voor as die engel van die lig.
Hoe dan nou gemaak?
Wel, Satan kan jou net van een ding aankla, en dis oor jou verlede. Verlede is daardie tyd tot 'n sekonde gelede. Hy herinner jou konstant aan jou verlede. En as hy dit doen, herinner hom aan sy toekoms. Want dis waar hy vir homself 'n standplaas bekom het.
Hoe oorwin ek hom?
1. Deur geloof.
Ef 6 : 16 "Daarby moet julle altyd geloof as skild in die hand hê, want daarmee sal julle al die brandpyle van die bose kan afweer."
2. Aanvaar die oorwinning van Jesus oor die Satan, en maak dit jou eie.
Joh 12 : 31 "Nou kom die oordeel oor hierdie wêreld, nou sal die owerste van hierdie wêreld, die Satan, uitgegooi word buitentoe."
3. Staan hom teë.
Jak 4 : 7 "Onderwerp julle dan aan God. Staan die duiwel teë en hy sal van julle af wegvlug."
Moenie toegee nie, nie aan versoekinge nie, nie aan sondes nie. En hy sal van jou af wegvlug!! Sien jy hoeveel mag het jy oor hom? Want, hy het net jou verlede. Maar ons? Ons het'n toekoms in Christus. Halleluja - dis ons oorwinning.