Ps
121:1-2
Ek kyk op na die berge: waarvandaan sal
daar vir my hulp kom? My hulp kom van die Here wat hemel en aarde
gemaak het.
Hierdie klink vir my soos 'n smeekgebed wat ons tans
vir Suid-Afrika kan laat opgaan? Dit voel asof dit nie goed gaan
hier nie, ons sukkel met sóveel slegte dinge in die land. Ek dink
ons almal sou die volgende wil uitroep:
Ps 126:1-3
Toe die Here die lot van Sion verander het,
was dit vir ons soos 'n droom.
Ons het gelag en gesing. Onder die nasies het hulle gesê: "Die Here
het groot dinge aan hierdie mense gedoen."
Die Here hét groot dinge aan ons gedoen; ons was bly.
Ek glo jy sit dalk ook met so 'n bietjie ongeloof in
jou gemoed oor hierdie Psalm. Here, waar is U? Hoor U dan nie die
stem van U dienaars nie? Hoe lank moet dit nog so aangaan Here? Sien
U dan nie ons swaarkry en ellende raak nie? Wanneer sal U ingryp
Here? Wat het ons gedoen om dit te verdien? Here, ons God, ons het U
so bitter nodig. Ons land gaan so vinnig agteruit. Gister se mooi en
vrede is verby, Vader, en dit lyk of ons dit nooit weer gaan sien
nie. Here, wat sal van ons kinders word, ons kry swaar met sóveel
armoede om ons. Here, ons sien niks goeds wat voorlê op die horison
nie. Here, ons God, wáár is U as die volk U nodig het? Here, verskyn
tog in U almag, kom, red U volk. Vader, kom red U land. …… 'n Psalm
van Willem. 'n Smeekgebed.
Wie sal ons land kom red? Ons bid tot die Here en só
antwoord Hy:
2 Kron 7:12-22
Daarna verskyn die Here een nag aan Salomo
en sê vir hom: "Ek het jou gebed verhoor en hierdie plek vir My
gekies as die plek waar daar vir My offerandes gebring kan word.
As Ek die hemel gesluit hou sodat daar geen reën is nie, of as Ek
die sprinkaan beveel om die land kaal te vreet, of as Ek pes onder
my volk stuur,
en my volk oor wie my Naam uitgeroep is, toon berou en bid en vra na
my wil en draai terug van hulle bose weë af, sal Ek luister uit die
hemel en hulle sonde vergewe en hulle land laat herstel.
Ek sal hierdie plek nou onder my sorg neem en ontvanklik wees vir
elke gebed hiervandaan.
En nou kies Ek en heilig Ek hierdie tempel sodat my Naam altyd daar
sal wees, en dit altyd my sorg en my liefde sal geniet.
"En jy, as jy soos jou vader Dawid leef volgens my wil en alles doen
wat Ek jou beveel, en my voorskrifte en bepalings nakom,
sal Ek jou heerskappy bestendig. So het Ek met jou vader Dawid
ooreengekom: Nooit sal dit jou ontbreek aan iemand om oor Israel te
regeer nie.
"Maar as julle wegdraai en my voorskrifte en my gebooie wat Ek julle
gegee het, verontagsaam en julle gaan dien ander gode en buig voor
hulle,
sal Ek julle wegdryf uit my land wat Ek julle gegee het, en sal Ek
hierdie tempel wat Ek vir my Naam geheilig het, voor My wegvee. Ek
sal daarvan 'n spot en 'n skimp maak onder al die volke.
Ja, hoe verhewe hierdie tempel ook al was vir elke verbyganger, die
verbyganger sal dan sy asem intrek en sê: 'Waarom het die Here dit
gedoen aan dié land en dié tempel?'
En die mense sal sê: Omdat daardie volk vergeet het van die Here die
God van hulle voorvaders, wat hulle uit Egipte gebring het. Hulle
het hulle aan ander gode verbind en voor hulle gebuig en hulle
gedien. Daarom het Hy al hierdie groot rampe oor sy volk gebring."
My vriend, kan jy sien dat die Here reeds hierdie
smeekgebed van ons antwoord? Kan jy sien hoe die Here smag na 'n
land wat herstel word? Weet jy dat die Here ons gebed wíl verhoor?
Jes 30:19-26
Jy, volk in Sion, jy wat in Jerusalem woon,
jy hoef nie meer te huil nie. Die Here sal jou genadig wees as jy na
Hom roep om hulp, Hy sal jou gebed verhoor sodra Hy dit hoor.
Die Here het jou honger en dors laat ly, maar Hy wou jou leer, en Hy
sal Hom nou nie meer afsydig hou van jou nie; jy sal self sien dat
Hy die Een is wat jou leer.
Wanneer jy die regte koers verlaat, sal jy agter jou 'n stem hoor
sê: "Hier is die pad, loop hierlangs."
Dan sal jy besef dat jou afgode, jou beelde wat jy met silwer en
goud oorgetrek het, onrein goed is, en jy sal hulle weggooi soos 'n
mens 'n smerige lap weggooi; jy sal sê: "Weg met hulle!"
Dan sal die Here reën gee op die saad wat jy in die land gesaai het,
en sal jou grond kos vir jou lewer wat ryk en voedsaam sal wees. Jou
kleinvee sal wei in uitgestrekte grasveld.
Die beeste en die donkies waarmee jy die grond bewerk, sal kragvoer
kry om te vreet wat met graaf en gaffel gemeng is.
Dié dag wanneer die vyand by die duisend sal sneuwel en wanneer die
torings omval, sal daar op elke hoë berg, elke hoë heuwel, spruite
vol water wees.
Dié dag wanneer die Here die wonde van sy volk verbind en die
seerplekke genees waar Hy hulle geslaan het, sal die maan so helder
skyn as die son en die son sewe maal so helder as die lig van sewe
dae saam.
Die Here sal jou genadig wees as jy na Hom roep om
hulp!
Wat vra ons van die Here? Dalk iets soos: "Here,
herstel asseblief ons land"?
Wat vra die Here van ons? Kom terug na My toe, en Ek sal uit die
Hemel julle gebed hoor, en die land herstel.
My vriend, kom ek vra vir jou: "Het jy nog die land,
en die grond lief waaruit jy gevorm is? Dalk is jy een van dié wat
dit gaan maak om uit te kom, te immigreer. Maar miljoene van ons kán
nie gaan nie - ons is te oud, of ons kan dit nie bekostig nie, of
ons wil nie gaan nie… en dié wat bly soek so angstig na die aangesig
van die Here.
Wat gebeur as 60 000 mans gaan saamtrek op 'n plaas?
Of duisende dié naweek in Vanderbijl? Of Loftus volgepak word vir
Jesus? 'n Mens moet stokblind wees - veral geestelik blind - as jy
nie sien wat gebeur nie.
2 Kron 7:14
As My volk oor wie My naam uitgeroep is,
berou toon en bid, en vra na My wil en terugdraai van hulle bose weë
af, sal Ek luister uit die hemel en hulle sonde vergewe, en hulle
land herstel.
Ek, Willem Botha, glo dat God ernstig is oor sy
verwagtinge van sy volk, en hulle weer vreugde en vrede wil gee. Ek
glo dat God sy beloftes hou, soos altyd, en dat Hy ons land gaan
herstel.
Vriend, het jy 'n hart vir hierdie land? Is jy bereid
om saam met my terug te draai na die Here toe? Is jy bereid om te
kies om positief te wees, ten spyte van alles? Is jy bereid om saam
te werk om die gety te laat draai? Glo jy dat God kan, en sal doen
wat Hy belowe het? Sal jy saam bid daarvoor?
Waar moet ons begin?
Open 2:1-7
Skrywe aan die leraar van die gemeente in
Efese: So sê Hy wat die sewe sterre in sy regterhand vashou en wat
tussen die sewe goue lampe rondgaan:
Ek weet alles wat julle doen. Ek ken julle onvermoeide arbeid en
julle volharding. Julle kan nie slegte mense verdra nie. Julle het
ondersoek ingestel na die mense wat voorgee dat hulle apostels is,
en dit nie is nie, en gevind dat hulle leuenaars is.
Verder volhard julle ook; julle het baie vir my Naam verduur, en
julle het nie moeg geword nie.
Maar Ek het dít teen julle: julle het My nie meer so lief soos in
die begin nie.
Dink daaraan hoe ver julle al agteruitgegaan het. Bekeer julle en
doen weer wat julle in die begin gedoen het. Anders, as julle julle
nie bekeer nie, kom Ek na julle toe en sal Ek julle lamp van sy plek
af wegvat!
Maar dít het julle darem in julle guns: julle verafsku wat die
Nikolaïete doen, net soos Ek dit ook verafsku.
Elkeen wat kan hoor, moet luister na wat die Gees vir die gemeentes
sê. Aan elkeen wat die oorwinning behaal, sal Ek te ete gee van die
boom van die lewe, wat in die paradys van God is.
'n Paar punte:
1) God vra liefde. Eerstens liefde vir Hom, maar ook vir mekaar.
2) Die Here vra van ons 'n skoon lewe. Ons kan nie ander veroordeel,
maar self maak wat ons wil nie. Is ek en jy régtig gehoorsaam?
3) Kom ons ons beloftes aan die Here na?
4) Ons het so baie kritiek omdat Godsdiens uit die skole gehou word,
en dat Godsdiens uit die parlement gehou word - maar hoe lyk ons eie
geestelike lewe?
Ek vertrou die Here vir die volgende vir Suid-Afrika:
1) Dat regverdigheid sal terugkom
2) Dat ons meer en meer sien hoe ál Sy kinders Hom saam dien.
3) Dat armoede verlig sal word.
4) Dat miljoene na Hom toe sal terugdraai.
5) Dat vrede meer en meer sal terugkom, en misdaad ál hoe minder sal
word.
Ons sal net weet dat die Here al is wat ons nodig
het, as dit al is wat ons het!
|