34 jaar gelede
klim Willempie mos trein “army” toe in Potch, want dit was my beurt. Baie
army-praatjies gehoor, ouens se verhale ingedrink en my kop heeltemal reg
gekry. En baie uitgesien! Ouboet was al daardeur, en ek het gedink ek is
voorbereid vir wat op my wag. Hulle sê mos die army is nie vir sissies
nie, en ek is g’n sissie nie.
Maar genugtig!
Kry ek die ontnugtering van my lewe toe ek daar aanland. Hierdie klomp
korporale was wild; hulle vloek jou, jou ma, jou hond en sommer alles
waaraan hulle kon dink. Dit was ontnugtering, so uit die boek! Ek glo ons
almal kan getuig van tye waar ons ontnugter was omdat dinge net honderd
maal erger was as wat ons kon dink.
So terloops, as
jy dalk een van dié mense is wat so uit onkunde praat van ons tronke as ‘n
5-ster hotel, daag ek jou uit om jouself daar te gaan inboek. Jy sal
ontnugterd wees met hoofletters. Jy het géén idee hoe erg dit daar is
nie.
So sal baie mense
se oorgang na die lewe hierna met ontsettende, skokkende, verwoestende
ontnugtering gepaard gaan, want dit wat vir party mense voorlê, sal die
army en die tronk soos ‘n speelparkie laat lyk. Daar is baie menings oor
wat anderkant hierdie lewe se drempel lê, en die Bybel praat baie duidelik
oor ‘n hel, ‘n bose vuur wat wag – verskrikking. Sommige mense verwys
slegs daarna as ‘n toestand wat net deur God verlate is. Ek dink nie dis
net dit nie. Hoe dit ookal mag wees, ek gaan nie ‘n kans vat nie – ek wil
NIE daar wees nie.
Die
teenoorgestelde van ontnugtering kan net verwondering wees. Het jy al by
‘n plek gekom wat net eenvoudig jou asem wegslaan, dat jy nie kan glo dat
iets so ongelooflik besonders is nie? Iets wat jou wildste verwagtinge
oortref, beter as in jou grootste, beste drome?
Elke wedergebore
Christen glo dat daar so ‘n plek moet wees soos die hemel. Weereens is
daar verskeie interpretasies. Die meerderheid glo dit is ‘n ander plek as
die aarde, ander glo die aarde sal net in ‘n “nuwe aarde” omskep word,
waar God sal afdaal uit die hemel en by die mense kom woon. Beide
groeperinge staaf hulle sieninge uit die Bybel en glo hulle sieninge word
oorweldigend ondersteun deur die skrif.
Ek dink die
verwondering wat dié wat in die hemel kom sal beleef, sal “out of this
world” wees.
Jy sien, jy kan
nie ‘n fout maak deur hierdie opsie te kies nie. Die Here gee nie regtig
baie detail oor die twee opsies in die Bybel nie, maar dat daar ‘n breë
afstand tussen hierdie twee plekke is, is duidelik.
As dit vir jou
ontnugtering is, gaan dit ‘n woeste ontnugtering wees. En as die
verwondering is, sal jy jou oë nie kan glo nie.
Luk 16:22-31
“Toe die arm man te sterwe kom, is hy deur die engele weggedra na die
ereplek langs Abraham. Die ryk man het ook gesterwe en is begrawe. Toe hy
in die doderyk in pyn verkeer, kyk hy op en sien vir Abraham daar in die
verte en vir Lasarus langs hom en hy roep: ‘Vader Abraham, ontferm u oor
my. Stuur tog vir Lasarus dat hy net die punt van sy vinger in water steek
en my tong afkoel, want ek ly verskriklik in hierdie vuur.’ Maar Abraham
sê: ‘My kind, onthou dat jy in jou leeftyd altyd die goeie gekry het en
Lasarus die slegte. Nou gaan dit hier goed met hom, maar jy word gepynig.
En buitendien is daar 'n groot kloof tussen ons en julle, sodat dié wat
hiervandaan wil oorgaan na julle toe, nie kan nie, en dié wat dáár is, ook
nie na ons toe kan oorkom nie.’ Toe sê hy: ‘Ek smeek u dan, vader, stuur
hom tog na my pa se huis toe. Ek het nog vyf broers. Laat hy hulle
dringend gaan waarsku sodat hulle nie ook in hierdie plek van pyniging
beland nie.’ Maar Abraham sê: ‘Hulle het die woorde van Moses en die
profete. Laat hulle daarna luister.’ Hy antwoord egter: ‘Nee, vader
Abraham, maar as iemand uit die dood na hulle toe gaan, sal hulle hulle
bekeer.’ Maar hy sê vir hom: ‘As hulle na Moses en die profete nie luister
nie, sal hulle nie oortuig word nie al sou iemand uit die dood opstaan.’ ”
Hierdie ryk man
was ontnugter, meer as wat hy ooit in sy lewensbestaan kon dink. Jy sien,
hy het elke dag van sy lewe geleef vir “vandag”. Miskien was hy ‘n
roekelose, goddeloses ou, wat geen saak met die Here gehad het nie. Dalk
was hy ‘n uitgesproke ateïs. Miskien sommer net traak-my-nie-agtig, en het
hom min gesteur aan waarskuwings van ander. Dalk het hy selfs gereeld
tempel toe gegaan en gedink dit sou hom kwalifiseer – net ingeval daar ‘n
hemel en ‘n hel was. Miskien het hy gesoek na God, maar niemand het hom
vertel van die Verlosser nie. Dalk het hy geglo die hel-stories is sommer
net bangmaak-goggatjies. Miskien het hy geglo hy sal maar eendag sy lewe
met God regmaak, want nou sal dit dalk net sy pret bederf. Toe kom die
ontnugtering, ‘n ongelooflike skok. Interessant genoeg, probeer hy nie
daar uit kom nie, want hy het geweet daardie hekke is vir ewig toe, die
kloof net te wyd. Hy wou egter nie hê sy broers moet op dieselfde manier
ontnugter wees nie. Die skok was vir hom een te erg. Hy het nie besef wat
Rom 14:11 beteken nie: “So seker as ek lewe, sê die Here, voor My sal elke
knie buig, en elke tong sal bely dat Ek God is”. Lasarus het sy knie voor
sy dood gebuig, en bely dat Jesus die Here is, en hy het gekwalifiseer vir
die hemel. Die ryk man het sy knie voor God gebuig met sy afsterwe, en of
hy wou of nie, bely dat Jesus die Here is .... maar dit was te laat. Wat
‘n ontnugtering!
Openbaring
21:9-27
Toe het een van die sewe engele wat die sewe bakke het waarin die sewe
laaste plae was, gekom en met my gepraat. “Kom,” het hy gesê, “ek sal jou
die bruid wys, die vrou van die Lam.” Ek is toe deur die Gees meegevoer en
die engel het my na 'n groot hoë berg toe geneem en die heilige stad
Jerusalem vir my gewys, wat van God af uit die hemel uit afkom. Die stad
het die heerlikheid van God: sy glans is soos dié van die kosbaarste
edelsteen, soos 'n kristalhelder opaal.
Die stad
het 'n groot hoë muur met twaalf poorte. By die poorte is daar twaalf
engele, en op die poorte is daar name geskrywe, dié van die twaalf stamme
van die volk Israel. Aan die oostekant is daar drie poorte, aan die
noordekant drie, aan die suidekant drie en aan die westekant drie. Die
stad se muur het twaalf fondamente, en daarop is daar ook twaalf name, dié
van die twaalf apostels van die Lam. Die engel wat met my gepraat het, het
'n goue meetstok gehad om daarmee die stad self, sy poorte en sy muur te
meet. Die stad is vierkantig, net so lank as wat hy breed is. Hy het die
stad toe met die meetstok gemeet. Die lengte, die breedte en die hoogte
daarvan is dieselfde, twaalf duisend kilometer.
Hy het ook die
muur om die stad gemeet. Dit is honderd vier en veertig meter hoog. Die
engel het die mate van mense gebruik. Die muur is met opaal gebou en die
stad self met suiwer goud wat soos 'n skoon spieël lyk. Die fondamente van
die stadsmuur is met allerhande edelstene versier: die eerste fondament
met opaal, die tweede met saffier, die derde met agaat, die vierde met
smarag,
die
vyfde met sardoniks, die sesde met karneool, die sewende met chrisoliet,
die agste met beril, die negende met topaas, die tiende met chrisopraas,
die elfde met hiasint en die twaalfde met ametis. Die twaalf poorte is
twaalf pêrels. Elkeen van die poorte is uit een pêrel gemaak. Die strate
van die stad is van suiwer goud, blink soos 'n spieël. 'n Tempel het ek
nie in die stad gesien nie, want sy tempel is die Here God, die Almagtige,
en die Lam. Die stad het nie die son en die maan nodig om hom te verlig
nie, want die heerlikheid van God het hom verlig, en die Lam is sy lamp.
Die nasies sal in die stad se lig lewe, en die konings van die aarde
verleen luister daaraan. Die
poorte daarvan word gedurende die hele dag nooit toegesluit nie: daar sal
nie meer nag wees nie.
Die mense sal
die luister en die rykdom van die nasies daarheen bring.
Niks
onreins en niemand wat iets losbandigs en vals doen, sal ooit daarin kom
nie, maar net dié wie se name in die boek van die lewe, die boek van die
Lam geskrywe staan.
Verwondering! Wat
meer is daar om te sê? Ek dink wanneer ons die dag DIT sien, sal ons ons
hande saamslaan in verwondering. Ek kies hierdie kant. Nee, ek verdien dit
nie, ek kies dit. Jesus sê: kies My, en jy kry dit. Jy weet baie goed hoe
daardie keuse lyk: as jy roekeloos lewe, kies jy hierdie verskriklike
ontnugtering. As jy vir Jesus aanneem, kry jy hierdie ongelooflike
verwondering .... jou keuse.
|