Is jy ook vasgevang in
dié ding wat die rotresies genoem word, hierdie
gejaag na nêrens?
Prediker 2 : 1 - 11 Ek
het by myself gedink: laat ek my oorgee aan plesier, laat ek die lewe
geniet! Maar ook dit het niks opgelewer nie. 2 Van lag moes ek sê: dis
sinloos, en van plesier: wat bring dit? 3 Ek het gewonder wat sal gebeur
as ek my aan wyn oorgee maar tog nog op soek bly na wysheid, as ek soos 'n
dwaas leef totdat ek vasgestel het wat die beste is waarmee 'n mens hom sy
lewe lank in hierdie wêreld besig kan hou. 4 Ek het groot ondernemings
aangepak: ek het vir my huise gebou en wingerde geplant. 5 Ek het vir my
tuine en parke aangelê en allerhande soorte vrugtebome daarin geplant. 6
Ek het vir my damme gemaak om die lappe jong bome nat te lei. 7 Ek het
slawe en slavinne aangeskaf, en hulle het kinders gekry wat ook my slawe
was. Ek het baie beeste en kleinvee gehad, meer as almal voor my in
Jerusalem. 8 Ek het vir my silwer en goud opgegaar wat ek gekry het van
konings en provinsies. Ek het vir my sangers en sangeresse gewerf, talle
mooi meisies met wie ek die lewe kon geniet. 9 Ek was magtiger en ryker as
almal voor my in Jerusalem. My wysheid het my goed te pas gekom. 10 Alles
wat ek begeer het, het ek my veroorloof; ek het my geen plesier ontsê
nie. Alles waarmee ek my besig gehou het, het my plesier verskaf. Dit was
my beloning vir al my inspanning. 11 Maar toe ek goed nadink oor alles wat
ek gedoen het en oor alles waarmee ek my met soveel sorg besig gehou het,
het ek gesien dat alles niks was, 'n gejaag na wind. In hierdie wêreld
bevredig niks nie.
Ek dink ek sien so
iets van hierdie rotresies reeds by die Prediker. Soveel so dat hy sê in
Pred 1 : 9 -11 "Wat was, sal weer wees, wat gebeur het, sal weer
gebeur. Daar is niks nuuts in hierdie wêreld nie. Kan jy van iets sê dit
is nuut? Nee, dit was lankal daar, lank voor ons tyd. Wat verby is, word
vergeet, en ook wat later kom, sal vergeet word deur die wat daarna
kom". Baie interessant dat Prediker 'n paar duisend jaar gelede
presies hierdie tendens beskryf waarmee ons vandag sukkel. Niks van
hierdie rotresies is nuut nie, dit was nog altyd en sal altyd met ons
wees. Die begin van 'n nuwe jaar lê al amper weer voor ons en ons almal het seker een of ander verwagting
vir 'n nuwe jaar, en ek dink dis goed om bietjie te besin oor wat voorlê.
Ek het gesê ons is
maar almal slagoffers van hierdie probleem, en as ek vandag sou beweer dat
ek 'n klinkklare oplossing het, dan kan jy maar ophou lees,
want dan is ek 'n leuenaar. Die doel van hierdie onderwerp is egter om net
te probeer om 'n bietjie balans hierin te soek.
Wat is die rotresies?
Ek wil net sê, moet nou asseblief nie dink ek sê enigiemand is rotte
nie, dis net 'n vergelyking. Waar begin ons? Die rotresies is 'n vreeslike
ding. Dis 'n klomp rotte wat verwoed teen mekaar wedywer in 'n sekere
rigting, waar elkeen voor die ander een wil wees. Almal hardloop, bots
teen mekaar, byt mekaar en probeer naarstigtelik om voor te kom. Almal
dink hulle het 'n misie, maar niemand besef hulle is maar net pionne van
mnr Hoofrot nie (wat of wie hy/sy ookal mag wees). Daar is egter 'n paar probleme
met hierdie ding.
Eerstens, almal
hardloop en dink hulle hardloop vorentoe, maar intussen is daar nie 'n
vorentoe nie. Daar is ook nie 'n wenstreep nie, en verseker ook nie
wenners nie. Dis 'n gejaag na wind. Wat die arme rot nie weet nie, is dat
hy in mnr Hoofrot se span hardloop en nie vir homself hardloop nie. Hy
hardloop tot voordeel van iemand anders, maar word wysgemaak dat dit vir
homself is. Die arme rot verstaan ook nie dat sy stamina opraak nie en hy
homself naderhand in 'n hartaanval of beroerte inhardloop nie. Die arme
drommel geniet dit ook nie, inteendeel, hy haat elke oomblik daarvan. Weet
jy hoekom? Uit vrees, blote wrede vrees. Want ons almal word gedryf deur
òf vrees, òf begeerte ("greed"), en soms 'n kombinasie van die twee. Jy sien, mnr
Hoofrot het soveel mag oor die rot, deurdat hy bang is hy word uit die
span geskop. Mnr Hoofrot se wapen is bloot om te dreig dat as jy nie hard
hardloop nie, word jy deur 'n jonger, fikser rot vervang, wat baie
vinniger en goedkoper hardloop. Die arme dierasie het uitendelik niks meer
van die lewe oor nie, en hardloop maar net tot hy dood neerslaan.
Pred 2 : 17 - 19 Ek
het die lewe gehaat, want alles wat in hierdie wêreld gebeur het, het vir
my sleg afgeloop. Alles kom tot niks, dit is 'n gejaag na wind. 18 Ek het
alles gehaat waarmee ek my in hierdie wêreld met soveel sorg besig gehou
het, want ek moet dit nalaat aan dié een wat ná my kom, 19 en wie weet
of hy 'n wyse of 'n dwase mens sal wees? Dit kom dus ook tot niks.
En ook vers 23 Elke
dag bring vir hom pyn en elke onderneming ergernis; selfs snags kom hy nie
tot rus nie. Ook dit kom tot niks.
Miskien is hierdie
lawwe verhaaltjie van die rotte nie vir jou waar nie, dan is ek baie bly saam met jou.
Maar ek dink almal van ons kan seker so 'n bietjie hiermee saamstem. Kom
ons toets dit.
1. Geniet jy jou werk
en is jy baie gemotiveerd?
2. Hou jy van jou baas en dink jy jy verdien wat jou toekom? Salaris,
voordele, vakansies?
3. Het jy 'n lewe vir jouself en vir jou gesin?
4. Is daar tyd vir jou geestelike lewe? Tyd vir stiltetyd?
5. Voel jy soms of jy net nie meer kan nie?
6. Voel jy dat jy jouself teen 'n plafon bevind?
7. Sê jy soos Prediker "Ek het die lewe gehaat"?
As jy so voel, kan ek
maar net sê, dis hoe dit met die meeste mense gaan. Maar wat is die
antwoord? Is daar 'n klinkklare oplossing? Ek dink nie dis so eenvoudig
nie. Ons gesin sit gister laatmiddag op 'n koppie in die ooste van
Pretoria en ek sien in my geestesoog die beeld van die klomp rotte
(duisende) wat almal in een rigting beur in die oggend. By punt B
aangekom, werk almal naarstigtelik om so bietjie kos bymekaar te maak.
Laatmiddag storm almal in die teenoorgestelde rigting om maar net 'n
bietjie van die kos te eet, te rus en terug te beur more-oggend. Wat 'n
lewe? Heen en weer, dag na dag, jaar na jaar.
Hier is tog so 'n
klein ligpuntjie:
Pred 2 : 24 - 26a
Dit is nie aan die mens self te danke dat hy kan eet en drink en onder
al sy arbeid nog die goeie kan geniet nie. Ek het ingesien dat dit 'n gawe
uit die hand van God is. 25 Wie kan eet, wie kan geniet as Hy dit nie
moontlik maak nie? 26 Vir die mens met wie se lewe God tevrede is, gee Hy
wysheid, kennis en blydskap. Maar die een met wie Hy nie tevrede is nie,
kry die taak om op te gaar en bymekaar te maak en dit dan te gee aan een
met wie God tevrede is
Pred 3 : 12 Ek het
tot die insig gekom dat daar vir 'n mens niks beter is nie as om vrolik te
wees en die goeie van die lewe te geniet.
Kom ons probeer so
bietjie prakties raak. Ons almal het 24 uur in 'n dag. Is dit nie dalk
moontlik om die tyd wat jy oortyd werk te beperk nie? Jy weet, daardie tyd
wat jy in elk geval nie ekstra geld voor kry nie. Dalk is 'n bietjie beter
beplanning in die dag net die oplossing. Oortyd werk word 'n gewoonte. Hoe
gereeld sê jy vir jou kinders "nee, ek moet werk"? Moet jy nie
dalk soms vir die baas sê "nee, ek het kinders", nie?
Daardie gereelde
"golf-uitstappies", vir werk, jy weet! Moet dit nie dalk eerder
plek maak vir jou gesin nie? Wat van 'n roetine, waar jy met dieselfde
ywer wat jy gewoonlik jou werkdag beplan, ook aktiwiteite vir jou gesin beplan? Het
jy geweet dat jy jou huwelik kan verloor, en jou verhouding met jou
kinders, ter wille van jou baas? Weet jy hoe maklik hy jou kan aflê, en
nie in ag neem watter pyn jou gesin dalk deurgaan nie? Dalk is dit tyd om
net een keer vir jou gesin te vra wat hulle sou kies: Die nuwe 4X4,
golfstel, huis teen die bult, of dalk 'n eenvoudiger lewe met 'n pa en ma
in die huis. Of is dit dalk net goedkoop woorde?
Ons het sewe jaar
gelede hierdie stap geneem en weliswaar dalk lewensstandaard prysgegee.
Maar die lewenskwaliteit wat ons op die koop toe gekry het, kan nie in
woorde beskryf word nie. Ons het 'n wonderlike lewe!
Dis moontlik om die
lewe te geniet, ten spyte van alles, maar dit gaan bietjie eerlikheid vra.
Jaag ek dalk omdat dit my pas? Dit gaan ook besluite vra, en nuwe
"commitments", ook beloftes aan my gesin. En dan bo alles, om
God te vertrou om dit moontlik te maak. Sodat jy in Sy span kan hardloop,
want die beloning is uit hierdie wêreld uit. Sterkte daarmee vriend.
|