PAULUS - 'N SKETS
Ons praat vanoggend oor Paulus, voorheen Saulus. Sommer net so 'n klompie interessanthede oor een van die merkwaardigste mense in die nuwe Testament. 'n Ou waarin daar woeste transformasie plaasgevind het, toe Jesus hom tref. Net so kan Jesus vandag ons oortref soos vir Paulus. God het vir Paulus nodig gehad vir 'n spesifieke taak, en toe hy nie self wou draai nie, toe draai die Here hom. En Hy transformeer hom van -
Vervolger - Navolger
Godsdienstige - Na Christen
Van 'n fanatiese, farisiër, wat christene wild vervolg het, na 'n ou wat
dikwels bykans doodgemartel is.
Woeste ou, maar sy bedoelings was aanvanklik goed. Hy het geglo die Christendom was 'n bedreiging vir die Judaïsme. O jitte, maar toe ontmoet hy die lewende Jesus!!!
Maar eers so 'n paar feite oor Paulus.
1. Hy was 'n toegewyde Fariseër, en het die
ou-Testamentiese geskrifte goed geken. Hy was 'n student van Gamalië 1,
en het goeie opleiding gehad. Dus 'n redelike geleerde man.
2. Sy naam was eers Saulus en word toe Paulus genoem, en nie direk na sy
bekering nie. 'n Lang tyd het verloop voordat hy Paulus genoem word.
3. Hy was nooit getroud nie, en het homself onderhou deur tente te maak.
4. Ons lees nêrens dat hy ooit vir Jesus fisies ontmoet het, toe Jesus op
aarde was nie.
5. Paulus was nie 'n dissipel nie. Hy was 'n apostel wat deur God
aangestel was.
6. Paulus het 13 van die 27 boeke van die nuwe Testament geskryf. Bykans
die helfte.
7. Ons lees nêrens in die Bybel hoe Paulus gesterf het nie, maar volgens
buite Bybelse bronne is hy onthoof vir sy geloof.
'n Baie baie merkwaardige man.
In die Bybel begin Paulus (oftewel Saulus) se verhaal in Hand 7 : 8 waar hy by was met Stefanus se dood. "Die getuies het hulle klere neergesit by 'n jongman met die naam Saulus". En dan Hand 8 : 1 "Ook Saulus het hierdie moord goedgekeur."
Hand 8 : 1 - 3
1 Ook Saulus het hierdie moord goedgekeur.Daardie dag het daar 'n hewige
vervolging van die gemeente in Jerusalem begin. Al die gelowiges behalwe
die apostels is uitmekaar gejaag en verstrooi oor die gebiede van Judea en
Samaria.
2 Godvresende mense het vir Stefanus begrawe en daar is baie oor hom
gerou.
3 Saulus het die kerk probeer uitroei. Hy het van huis tot huis gegaan,
mans en vrouens laat uitsleep en hulle in die tronk laat sit.
Maar shame, nie lank gehou nie.
Hand 9 : 1 - 5
1 Intussen het Saulus soos 'n besetene voortgegaan om die volgelinge van
die Here met die dood te dreig. Hy het na die hoëpriester toe gegaan
2 en van hom bekendstellingsbriewe aan die sinagoges in Damaskus gevra. Sy
doel was om al die aanhangers van die leer van die Here wat hy daar kry,
mans sowel as vrouens, gevange te neem en na Jerusalem toe te bring.
3 Toe hy op reis naby Damaskus kom, het daar skielik 'n lig uit die hemel
op hom gestraal.
4 Hy het op die grond neergeval en 'n stem vir hom hoor sê: "Saul,
Saul, waarom vervolg jy My?"
5 "Wie is U, Here?" vra hy toe."Ek is Jesus," antwoord
Hy. "Dit is vir My wat jy vervolg"
Wie is U, Here? Ek is Jesus. Wow, hoe ongelooflik, die manier wat Jesus Homself openbaar. Nie, "Ek is die Here" of "Ek is God" nie. Nee "Ek is Jesus, die een wat jy vervolg". Paulus het nog altyd in God geglo, en Hom verdiep in sy godsdiens, maar hy het vir Jesus se volgelinge vervolg. En dis Jesus wat op hom afkom. Amazing!!
Nou ja, die res is (soos hulle sê), geskiedenis. Saulus word Paulus, later Hand 13 : 9 (En Paulus, dit is Saulus) begin onder die nie-Jode werk. Sy hooftaak waarvoor God hom oproep. Maar boeta, dit was nie maklik nie!!
2 Kor 11 : 21b - 31
21 Laat my dan maar tot my skande erken dat ons vir sulke dinge te swak
was!Nou praat ek soos 'n dwaas: enigiets waarop iemand aanspraak maak om
te roem, daarop kan ek ook roem.
22 Is hulle Hebreërs? Ek ook. Is hulle Israeliete? Ek ook. Stam hulle van
Abraham af? Ek ook.
23 Is hulle dienaars van Christus? En nou praat ek asof ek van my verstand
af is: ek nog meer! Ek het harder gewerk, ek was meer in die tronk, ek is
meer dikwels geslaan, ek was dikwels in doodsgevaar.
24 Vyf maal het ek van die Jode die gebruiklike straf van nege en dertig
houe gekry,
25 drie maal het ek lyfstraf gekry, en een maal is ek met klippe gegooi.
Drie maal het ek skipbreuk gely en een maal het ek 'n dag en 'n nag in die
oop see deurgebring.
26 Ek was dikwels op reis en in gevaar: daar was gevare van riviere,
gevare van rowers, gevare van my volksgenote en gevare van heidene; gevare
in die stad en gevare in die veld; gevare op see en gevare onder vals
broers.
27 Daar was vir my harde werk en swaarkry, dikwels nagte sonder slaap,
dikwels honger en dors; en dikwels was ek sonder kos, sonder skuiling of
bedekking teen die koue.
28 Behalwe dit alles was daar nog die daaglikse bekommernisse, die
besorgdheid oor al die gemeentes.
29 As iemand swak is, voel ek asof ek self ook swak is; as iemand in sonde
val, voel ek asof ek ook deur vuur gaan.
30 As daar dan geroem moet word, sal ek roem, maar dan oor my swakhede.
31 Die God en Vader van die Here Jesus weet dat ek nie lieg nie. Aan Hom
kom die lof toe tot in ewigheid!
Vyf maal die 39 houe straf = 195 houe op sy lyf - met 'n sweep met staalpunte. Elke hou het sy liggaam oopgekloof, oor sy hele lyf. Wat waarskynlik met sulke dik, opgehewe letsels gesond geword het. Hemel man, die man moes soos 'n jigsaw puzzle gelyk het. 195 hale. Drie maal lyfstraf - by die Romeine - hulle het nie soos die Jode getel tot 39 nie ('n Joodse wet dat 40 nie oorskrei mag word nie). Die Romeine het geslaan om dood te slaan. Net waar hulle plek kry. Gestenig, hongersnood, seerowers, amper op 'n skip vergaan. Sonder bedekking teen die koue.
En eventueel het hy gesterf vir sy geloof. Hoekom het hy dit gedoen? Why bother. Eers vervolg hy christene, met die hele gesags- en regstelsel agter hom, en dan draai alles om, en sy aardse lewe verander in hel.
Hoekom op aarde doen hy dit?
Hoekom so swaar kry? Paulus gee self die antwoord. 1 Kor 9 : 16 "As ek die Evangelie verkondig, is dit nie vir my 'n rede om te roem nie. Ek verkondig die Evangelie omdat ek moet, en wee my as ek dit nie doen nie".
Fil 1 : 21 "….. want om te lewe, is vir my Christus, en om te sterwe, is vir my wins".
Dis hoekom Paulus dit doen. Toe Jesus aan hom verskyn, toe verstaan hy. Solank hy lewe, kan hy Christus verkondig, maar as hy sterwe, is hy in die hemel, by Christus.
Paulus is reeds vir 2000 aardse jare, saam met Jesus in die hemel.
Paulus het net een lewenstaak gehad, en dit was om siele vir Christus te wen. Hoe vaar ek en jy? Hoeveel hale is op jou lyf? Wat is jou skip wat vergaan het se naam? Al koud en geskrap vir die Evangelie? Of gestenig? Hoeveel keer het ek en jy honger gaan slaap vir die evangelie? Siestog, dan sê ons ons Christene begin meer en meer vervolg word!!
Raak moeeeeilik om 'n Christen te wees. Sou ons 'n Paulus-toets slaag? Ek glo nie.
Maar kom ons gaan saai ook die saad, dis vreeslik maklik - hier in Suid-Afrika.