SATAN
– 6 Julie 2009
Hoe praat mens
oor iets wat die slegste moontlike entiteit op aarde is? Dié party wat
die meeste vernietiging denkbaar saai, wat die bron van álles is wat
onvolmaak is, wat absoluut niks goed bevat nie… mens kan dalk wonder
hoekom mens hoegenaamd oor só iets wil praat. Wel, as mens jou vyand se
stategie ken, sy sterkpunte en swakhede, kan jy seker enige situasie waar
dié een is beter hanteer.
Wat noem die
Bybel hom? Die aanklaer, die bose, die god van hierdie wêreld, dier uit
die see, dier uit die aarde, draak, duiwel, moordenaar, owerste van
hierdie wêreld, slang van ouds, vader van die leuen, verleier, versoeker,
vors van hierdie wêreld, vors van die onsigbare magte. Sy naam? Satan.
Lelike naam, vloekwoord, verskrikking! Vyand nommer 1. Nou ja, ek hou nie
daarvan om oor hom te praat nie, ek verwys selde na hom, ek is nie bang
vir hom nie, en verkies om geensins eer aan hom te gee nie.
Wel, so sleg as
wat die kalant is, verkies ek gewoonlik om my te distansieër van
praatjies waar hy die skuld gegee word vir alles wat sleg is. Die volgende
hoor mens gereeld: Satan het my sonde laat doen; hy het my gekeer om dit
of dat te doen; hy het gemaak dat my wekker nie afgaan nie, toe verslaap
ek; hy het in die klankstelsel by die kerk ingevaar; hy het my kar laat
breek oppad na ‘n goeie geleenteid toe. Mmmm … soms wonder ek –
darem maklik om iemand die skuld te gee vir my eie swakhede, of wanneer ek
dinge nalaat, ens. Karre breek maar, weet jy? Klankstelstels ook – die
goed raak oud, en kan onklaar raak op ongeleë tye. En verslaap? Party
mense verslaap gereeld in die naam van die bose. Sonde? Nee, as ek besluit
om sonde te doen, kan ek dit nie eers voor sy deur gaan lê nie. Dis ‘n
keuse. Die feit dat sonde so aan ons vaskleef, is ons eie keuse.
Openb 12:7-9
Daar het toe oorlog gekom in die hemel: Migael en sy engele moes oorlog
voer teen die draak. Die draak en sy engele het oorlog gevoer, maar
hulle is verslaan. In die hemel was daar geen spoor meer van hulle te vind
nie, want die groot draak, die slang van ouds, wat die duiwel en die Satan
genoem word en wat die hele wêreld verlei, is uit die hemel uit gegooi.
Hy is op die aarde gegooi en sy engele saam met hom.
2 Pet 2:4
God het selfs die engele wat gesondig het, nie gespaar nie. Hy het
hulle in die hel gestort en hulle laat boei om in die duisternis gevange
gehou te word vir die oordeel.
Sien, dis
laaankal wat hierdie ou met sy streke besig is. Hy was ‘n engel ... van
alle dinge! In die hemel begin hy met sy truuks, en verloor sy hemelse
tuiste. Onthou, Jesus was nog altyd daar – alles is deur Hom en vir Hom
geskep. Toe Satan die stryd verloor, het hy verseker nie vir hom ‘n
pizza-oond gaan bou om hom en sy vriende warm te broei nie. Nee, TOE breek
daar oorlog uit. Selfs ook toe Jesus op aarde met sy openbare bediening
begin, was Satan heel eerste by.
Matt 4:1-11
Toe is Jesus deur die Gees die woestyn in gelei om deur die duiwel
versoek te word. Veertig
dae en veertig nagte het Hy niks geëet nie en naderhand het Hy honger
geword. Die versoeker het toe gekom en vir Hom gesê: "As U die Seun
van God is, sê hierdie klippe moet brood word." Maar Hy antwoord:
"Daar staan geskrywe: 'n Mens leef nie net van brood nie maar van
elke woord wat uit die mond van God kom. Daarna neem die duiwel Hom na die
heilige stad toe en laat Hom op die hoogste punt van die tempel staan en sê
vir Hom: "As U die Seun van God is, spring af! Daar staan mos
geskrywe: Hy sal sy engele oor jou opdrag gee en: Op hulle hande sal hulle
jou dra, sodat jy nie jou voet teen 'n klip sal stamp nie. Jesus sê vir
hom: "Daar staan ook geskrywe: Jy mag die Here jou God nie op die
proef stel nie. Toe neem die duiwel Hom na 'n baie hoë berg toe, wys Hom
al die koninkryke van die wêreld met hulle prag en sê vir Hom: "Dit
alles sal ek vir U gee as U neerval en my aanbid." Maar Jesus sê vir
hom: "Gaan weg, Satan, want daar staan geskrywe: Die Here jou God
moet jy aanbid en Hom alleen dien. Daarna
het die duiwel Hom met rus gelaat, en daar het engele gekom en Hom
versorg.
Vers 8: “Toe
neem die duiwel Hom na 'n baie hoë berg toe, wys Hom al die koninkryke
van die wêreld met hulle prag en sê vir Hom: "Dit alles sal ek vir
U gee as U neerval en my aanbid."”
– Satan is só arrogant dat hy selfs iets vir Jesus aanbied wat
nie eens aan hom behoort nie.
Openb 12:9 praat
van die slang van ouds. In Genesis IN die paradys was hy teenwoordig.
Verstommend waar hy dit waag om sy kop uit te steek, nê? Skrik vir niks.
Vandag is die
Satan verseker ook baie aktief. Daar is een ding wat ons goed moet weet:
hy háát jou. Met alles wat in hom is. Hy haat die Here, hy haat elke
Christen, en hy haat selfs elke Satanis wat op hierdie aarde loop. Nogal
jammer Sataniste verstaan dit nie. En dis nogal baie keer só dat mense
wat nooit liefde ervaar nie, hulle toevlug neem tot iemand wat hulle meer
haat as enige iemand anders.
Wat doen hy
vandag?
- Volgens 1 Joh 5:19 beheer hy die sondige wêreld. Daar staan “Ons weet dat ons aan God behoort en dat die hele sondige wêreld in die mag van die duiwel is” Wel, onder wie se beheer is jy? Net een van 2: of jy behoort aan God, of aan die Satan. Dis wat hierdie deel sê. Lyk my daar is niks tussen-in nie.
- Hy probeer om die saad (van die Woord) wat in mense se harte gesaai word, weg te vat. Matt 13:19: “Die bose kom by elkeen wat die woord van die Koninkryk hoor, maar dit nie verstaan nie, en vat dan weg wat in sy hart gesaai is”. Dis nogal erg, nê? Dis hoekom selfs hoogsgeleerdes soms die pad byster raak.
- Hy smag om aanbid te word. Matt 4:9: “En hy sê vir Hom, dit alles sal ek vir U gee, as U neerval en my aanbid”. Jesus het nie vir sy truuks geval nie, en jy en ek hoef ook nie.
- Hy probeer daagliks om ons te oorrompel. 2 Kor 2:11: “Die Satan moet nie die oorhand oor ons kry nie. Ons ken sy planne maar alte goed” Sien jy? Hy is besig … dag en nag.
Nou waar los dit
ons dan?
- Met Jesus by jou, hoef jy NIKS te vrees nie. 1 Joh 3:8: “En die Seun van God het juis gekom om die werk van die duiwel tot niet te maak”. Verstaan jy dat die werk van Satan tot niet gemaak is, al in ons nog sondige wesens? Want juis omdat ons nie volmaak kan wees nie, het Jesus sy werk tot niet kom maak.
- Joh 12:31: “Nou kom die oordeel oor hierdie wêreld, nou sal die owerste van hierdie wêreld uitgegooi word buitentoe”. Hier praat Jesus oor Sy kruisiging. Die kruisiging wat Satan moontlik gedink het is die finale spyker in sy vyand (Jesus) se doodskis. Maar, hy het nie rekening gehou met Jesus se opstanding en hemelvaart nie. Kan jy sien waarom geen wedergebore Christen die opstanding en hemelvaart in twyfel trek nie? Dis deel van die kern van ons geloof. Net ‘n wedergebore, nuutgemaakte mens verstaan dit. En daarom, as hoogsgeleerdes dit in twyfel trek, en as waarheid verkondig, praat hulle nie uit Jesus se mond nie.
- Die finale oorwinningstrompet blaas vir jou en my. Rom 16:20: “God wat vrede gee, sal die Satan spoedig onder julle voete verpletter. Die genade van ons Here Jesus is by julle”
Sien jy? Geen vrees is nodig. Geen knie-buig voor hom nie. Hy is klaar oorwin. Jesus sê: “Tetelestai”