WAAR
WOON DIE HERE? – 3 Junie 2009
Waar woon die
Here? Waar is Sy huis? Sy hoofkwartiere? Waar beplan Hy Sy strategie? Hoe
lyk Sy kantoorure? Het Hy 'n oopdeur-beleid? Het Hy 'n klompie raadgewers
nodig om Hom by te staan met besluite?
Wel, ek dink ons
as mense lei nogal aan hierdie ding dat ons glo ons kan die Here beperk
tot 'n plek, 'n denkrigting, 'n seker metodiek, 'n vaste uitkyk op die
lewe. Ons probeer die Here so maklik beperk tot ons gedagte wereld.
Maar... waar is Sy huis?
2 Sam 7:1–11
Toe koning Dawid in sy eie huis woon, nadat die Here hom rus gegee het
van al sy vyande in die omgewing, sê hy vir die profeet Natan: "Kyk,
ek woon in 'n huis wat met sederhout versier is, maar die ark van God
staan in 'n tent." Natan het die koning geantwoord: "Doen gerus
alles wat u in gedagte het. Die Here is by u." Dieselfde nag het daar
egter iets gebeur: die woord van die Here het tot Natan gekom en vir hom
gesê: "Gaan sê vir my dienaar Dawid: So sê die Here: Wil jy vir My
'n huis bou om in te woon? Vandat Ek die Israeliete uit Egipte laat trek
het tot nou toe het Ek nog nooit in 'n huis gewoon nie. Ek het in tent en
tabernakel rondgeswerf saam met al die Israeliete. Het Ek ooit vir een van
die stamme wat Ek beveel het om die leiding van my volk Israel op hom te
neem, gesê: 'Waarom bou julle nie vir My 'n huis wat met sederhout
versier is nie?' "Nou
moet jy vir my dienaar Dawid sê: So sê die Here die Almagtige: Ek het
jou uit die weiveld agter die kleinvee weggevat om oor my volk Israel te
heers. Oral waar jy gegaan het, was Ek by jou; al jou vyande het Ek voor
jou oë uitgedelg. Ek het jou so beroemd gemaak soos die grotes op die
aarde. Ek het 'n woonplek aan my volk Israel gegee en hom gevestig, sodat
hy sonder vrees in sy plek kan woon. Slegte mense sal hom nie meer verdruk
soos voorheen toe Ek leiers oor my volk Israel aangestel het nie. Ek sal
jou rus gee van al jou vyande. Ek maak aan jou bekend dat Ek vir jou 'n
koningshuis gaan vestig.
Lyk my Dawid het
met dieselfde ding gesukkel. Hier lê Dawid een aand knus in sy bed en
wonder so oor al die weelde van sy bestaan, en rus na 'n stywe dag by die
werk. Klink of hy 'n lekker sarsie oorlog gevoer het en heerlik uitrus na
so 'n paar swaardgevegte.
Toe dink hy so by
homself:- “My jitte, hier lê ek in my huis (paleis), versier met
sederhout, maar die Here moet tevrede wees met 'n plekkie in 'n yskoue,
onpersoonlike tent. En woeps, daar kom die skuldgevoelens. Ek in my
paleis, God in 'n tent. Tipies koning Dawid, besluit hy sommer daar en dan
dat hy gou 'n plan sal maak, sal sommer dadelik die planne optrek. Plaas
dat hy daaraan dink om die Here in sy eie huis (of hart) innooi, wil hy
Hom as buurman hê. Ek wonder nogal presies wat hy in gedagte gehad het.
Moes die huis dan nou groter, en weelderiger wees as sy eie huis, of min
of meer dieselfde? 'n Groot huis met die verbondsark in. Lyk my hy het so
half gedink die Here se bestaan is beperk tot die verbondsark.
Waar woon die
Here? Toe Dawid nie mooi weet wat om te doen nie, wend hy hom tot die
profeet Natan. En Natan, soos talle sogenaamde “profete” vandag, sê
sommer die eerste ding wat in sy kop opkom. “Doen gerus alles wat u in
gedagte het, die Here is by u”. Klink tog so bekend, of hoe? Mense gee
so maklik ondeurdagte raad wat goed sal klink in 'n bepaalde situasie,
sonder om te gaan hoor by die Here, sonder om te gaan bevestig. Terwyl
Dawid so lê en planne bedink, gebeur 'n snaakse ding. Die Woord van die
Here kom tot Natan in sy slaap. (2 Sam 7:4-5) Toe Natan stil word voor die
Here, en homself instel op die stem van die Here, toe hoor hy dit,
Stilword, wag, luister. Net so moet iemand waar waarlik die gawe van
profesie het, gaan bevestig of sy gedagtes van die Here kom. Bevestig by
die Here, bevestig by ander mense, bevestig in die Skrif.
Toe besluit die
Here Hy gaan vir Dawid iets mooi laat verstaan; Hy woon beslis nie in 'n
tent nie, of in die verbondsark nie! Hy is nie beperk tot strukture nie.
Hy woon in en by Sy kinders. Hy het saam met hulle
rondgeswerf in die woestyn. Hy was heeltyd daar. Hy sê in vers 6:- “Ek
het nog nooit in 'n huis gewoon nie”. Hy woon in ons, en ons in Hom. Vir
altyd.
Waar woon die
Here? In Sy kinders, en hulle in Hom.
Vers 9 sê :- “Orals waar jy gegaan het, was Ek by jou”.
Eintlik nogal vreesaanjaend as mens so daaraan dink. Dawid, die Here was
by die Israeliete in die woestyn, Hy was by die Israeliete in die oorlog,
elke oomblik. Dawid, Hy was by jou toe jy op die balkon vir Batseba
afgeloer het. En ook toe jy haar in jou kamer ingebring het. Hy was by jou
toe jy vir haar met wellus gestaan en bekyk het. Hy was verseker nie in
die tent toegezip nie. Hy was by jou Dawid, selfs toe jy haar man laat
vermoor het. As ons werk toe gaan, en as ons daar droogmaak, Hy is daar.
Sien alles, beleef alles, hoor alles, alomteenwoordig!!! Hy is nie beperk
tot 'n plekkie waar Hy toegemaak kan word nie. Orals, altyd, en ja,
natuurlik het sy tempel, die kerk, 'n besondere plek in ons Geestelike
lewens en Geestelike groei. Dis 'n spesiale plek vir aanbidding met mede
gelowiges, plek vir koinonia met ander Christene. Maar... dis nie ons primêre
ontmoetingsplek met die Here nie. Ons kan Hom nie Sondae agterlaat in die
kerk, die deur toesluit, en doen wat ons wil nie.
Ps 84:1–6
Vir die koorleier: met musiek. Van die Koragiete. 'n Psalm. Hoe lief
het ek u woning, Here, Almagtige!Ek versmag van verlange na die tempel van
die Here; met alles wat ek is, wil ek jubel oor die lewende God. Selfs 'n
mossie het 'n nes en 'n swaeltjie 'n plek vir haar kleintjies daar by u
altare, Here, Almagtige, my Koning en my God! Dit gaan goed met mense vir
wie u huis 'n tuiste is: hulle hou nie op om U te prys nie. Sela. Dit gaan
goed met mense wat hulle krag in U vind en graag na u tempel toe gaan.
Wonderlike plek,
of hoe?
Waar woon die
Here? In ons en by ons, altyd, ten spyte wat omstandighede. Dawid wou vir
die Here 'n huis bou, maar in vers 27 staan daar:- “Here, Almagtige,
God van Israel, U het nadruklik vir U dienaar gese:- “Ek sal vir jou 'n
koningshuis vestig, en daarom het U dienaar die vrymoedigheid gehad om
hierdie gebed tot u te rig”.
Dawid het nie vir
die Here 'n huis opgerig nie, die Here het vir Dawid 'n koningshuis
opgerig. Net so is die Here
se woonplek vandag steeds in ons. Waar Hy gaan, sal ek gaan, wat ek doen
sal Hy sien, wat ek dink, sal Hy weet.
Dan gee Hy
spesifieke opdragte van wat Hy verwag:
1 Kor 3:16–17
Weet julle nie dat julle die tempel van God is en dat die Gees van God
in julle woon nie? As iemand die tempel van God beskadig, sal God hom
straf, want die tempel van God is heilig, en die tempel is julle.
Ek dink die
gedeelte in 2 Sam sê vandag vir ons:- Moenie My jou buurman probeer maak
deur my in 'n ander huis langs jou te laat woon nie. Ek sal sommer in jou
hart My intrek kom neem, Ek is nie ver nie, Ek is by jou en in jou, selfs
in jou woestynpad, en in jou oorlog, jou swaarkry en jou moedeloosheid. Ek
wil die Eregas wees in jou tempel. As jy My soek, soek in jou hart, en as
jy My nie daar kry nie, doen wat Openbaring 3: 20 sê:- “Kyk, ek
staan by die deur en Ek klop. As iemand My stem hoor, sal Ek by Hom ingaan
en saam met hom die feesmaal hou, en hy saam met My”.
Daar by die kerk
sal ons Hom kry, saam met ons medegelowiges. In die tempel het Jesus,
Petrus, Paulus en ander dissipels die mense gaan leer. Die kerk is 'n
wonderlike plek, dis 'n plek vir saambid, dis die plek waar ons lofsange
weerklink. Ps 22:4 sê:- “U
is tog die Heilige wat woon waar die lofsange van Israel weerklink”.