|
 Wat
maak jy nou? Op hierdie oomblik? Tensy dit naweek is, (en dalk maak
dit nie eers saak nie), is jy nou by die werk, of op pad soontoe,
of pas terug. Werk, werk, werk! Hoop nie jy lees hierdie op pad werk
toe nie!
Vraag is, hoe voel jy daaroor om vandag werk toe te
gaan? Is jy lus daarvoor, sien jy uit, moeg daarvoor, haat jy jou
baas? Het jy gister goed afgesluit en is jy reg om vandag goed te
begin? Mmm... ek glo die meeste mense voel nie régtig lus daarvoor
nie, of hoe?
Gen 3 : 17 - 19 Vir die mens
het die Here God gesê: "Omdat jy na jou vrou geluister het en geëet
het van die boom waarvan Ek jou verbied het om te eet, is die aarde
deur jou toedoen vervloek; met swaarkry sal jy daaruit 'n bestaan
maak, jou lewe lank; die aarde sal vir jou dorings en dissels laat
uitspruit, en jy sal veldplante eet; net deur harde werk sal jy kan
eet, totdat jy terugkeer na die aarde toe, want daaruit is jy geneem.
Stof is jy, en jy sal weer stof word."
O koek, daar eet Adam en Eva ons toe nou in die
werkplek in. Lyk nogal so as mens net na hierdie teks kyk, maar dis
nie waar nie, want die opdrag om te werk kom van vóór die sondeval
af.
Gen 1 : 27 – 28
God het die mens geskep as sy verteenwoordiger, as beeld van God het
Hy die mens geskep, man en vrou het Hy hulle geskep. Toe het God
hulle geseën en vir hulle gesê: "Wees vrugbaar, word baie, bewoon
die aarde en bewerk dit. Heers oor die vis in die see, oor die voëls
in die lug, oor al die diere van die aarde, ook oor die diere wat op
die aarde kruip."
Die opdrag om te werk kom dus van voor die sondeval
af. Ons as mensdom het egter maar hierdie ding om te dink die gras
is altyd groener aan die ander kant, en ons sukkel met entoesiasme
as dit by werk kom. Totdat ons dit verloor, nè?
As ons egter eerlik daarna kyk moet ons sekerlik
saamstem dat:
-
Werk is nie ALTYD sleg is nie
-
Dis nie NET sleg is nie, daar ís lekker elemente ook
-
Ons kan verseker ons werk geniet
-
Dit hang alles van ons eie houding af
-
Daar is baie mense wat graag ons werk sou wou hê, as ons dit dan
nie self wil hê nie
Hoekom gaan jy werk toe? Wat motiveer jou?
Volgens die Bybel is dit 'n opdrag, en as jy dit nie
wíl doen nie, gaan jy swaar kry!
Spr 6 : 6 – 11 Gaan kyk na
die mier, luiaard, kyk hoe hy werk, en leer by hom. Hy het nie 'n
leier nie, nie 'n opsigter of 'n regeerder nie, tog maak hy sy
kosvoorraad reg in die somer, versamel hy sy voedsel in die oestyd.
Hoe lank gaan jy nog lê, luiaard, wanneer gaan jy opstaan? Nog 'n
bietjie slaap, nog 'n bietjie sluimer, nog 'n bietjie handevou en
bly lê, en daar oorval die armoede jou soos 'n rower, daar oorrompel
die gebrek jou soos 'n inbreker.
2 Tess 3 : 10 Toe ons nog by
julle was, het ons vir julle uitdruklik gesê: "As iemand nie wil
werk nie, moet hy ook nie eet nie."
Hierdie gedeelte in Spreuke oor die miertjies is
regtig 'n baie kosbare stukkie. Miskien het Salomo eendag langs 'n
miershoop gaan sit en hierdie klein gediertes dopgehou en gedink,
sjoe, hierdie goedjies is merkwaardig. Hulle werk onverpoos, sonder
enige persoonlike voordeel, ongeskoold, onopgelei, sonder 'n
toesighouer of 'n baas, sonder dat hulle gedreig word, maar hulle
wérk. Boonop is hulle nog geweldig sterk ook. As jy sy grootte in ag
neem teenoor dit waartoe hy in staat is, is hy waarskynlik een van
die sterkste dierasies op aarde. Hy kan byvoorbeeld 'n stokkie dra
wat maklik tien maal sy eie lengte is (kan ons dit doen?).
Nou sê die Bybel, gaan leer by die mier. Kyk wat
staan daar:
·
Hy is nie lui nie.
·
Hy werk sonder toesig, onverpoos.
·
Hy het ongelooflike dissipline. Al
gesien hoe loop hulle in reguit rye?
·
Hy werk met een uitsluitlike doel, nl.
oorlewing!
·
Hy sorg vir sy “toekoms” - Hh versamel
sy voedsel in die oestyd, maak sy kosvoorrade bymekaar in die somer.
·
Hy werk met beplanning, dissipline en
'n toekomsvisie.
Nou ja, as die Here dan vir ons uitstip hoe ons werk
daar moet uitsien, moet ons seker net bietjie aan ons houding
werk. As jou werk vir jou 'n straf is, gaan soek 'n ander een....
of: miskien is dit net beter om dinge bietjie in 'n beter lig te
sien.
As jy net werk om “skatte” bymekaar te maak, gaan die
rotresies jou mal maak. As jy net werk omdat jy moet, gaan jy elke
dag haat. Maar... as jy werk met die volgende gedagte, kan dit dalk
goed wees:
Ps 37 : 3 Vertrou liewer op
die Here en doen wat goed is, woon en werk rustig voort.
Baie dinge in hierdie paar woorde opgesluit. “Woon en
werk rustig voort”.
Dit lyk egter vir my of ons eerder deesdae vasgevang
is in iets soos dié:
Maar die koning van Egipte het vir hulle gesê: "Moses
en Aäron, waarom hou julle die volk van hulle werk af weg? Gaan
terug na julle werk toe! Julle mense is alreeds te veel en nou wil
julle hulle ook nog laat ophou werk!" Dieselfde dag nog het die
farao die slawedrywers van die volk en hulle opsigters beveel: "Julle
mag nie meer soos vroeër vir die volk strooi gee om bakstene mee te
maak nie. Laat hulle self gaan strooi bymekaarmaak, en julle moet
van hulle dieselfde hoeveelheid stene as tevore bly eis. Julle mag
niks verminder nie! Hulle is net lui, daarom hou hulle aan met neul:
'Ons wil vir ons God gaan offer.' Die werk moet vir die manne so
swaar wees en hulle so besig hou dat hulle nie hulle ore uitleen vir
allerhande leuens nie." Toe het die slawedrywers en die opsigters
van die volk vir hulle gaan sê: "So sê die farao: Julle kry nie meer
strooi nie. Loop haal dit self waar julle dit ook al kan kry, maar
aan die hoeveelheid werk word niks verminder nie." Die volk het toe
dwarsoor Egipte stoppels bymekaargemaak, en die slawedrywers het
hulle aangejaag en gesê: "Julle moet nog elke dag net soveel lewer
soos toe daar nog strooi verskaf is." Boonop het die farao se
slawedrywers die Israelitiese opsigters geslaan en vir hulle gesê: "Waarom
het julle nie vandag net soos vroeër dieselfde hoeveelheid stene
gemaak nie?" Die Israelitiese opsigters kom kla toe by die farao: "Waarom
maak u so met u werksmense? Daar word nie meer strooi aan ons
verskaf nie, en tog bly die drywers vir ons sê: 'Maak bakstene!' Ons
word mishandel, maar eintlik lê die fout by ú mense." Toe sê die
farao: "Julle is lui! Lui! Dit is dié dat julle bly sê: 'Ons wil vir
die Here gaan offer.' Loop! Gaan werk! Hulle sal nie meer vir julle
strooi gee nie, maar julle kwota bakstene sal julle lewer."
Klink nogal bekend. Die werk neem só toe dat dit ons
van die Here af weghou.
Waar is die balans tussen werk en leef? Ons soek maar
almal daardie goue middeweg tussen werk, gesin, sosiale lewe,
huwelik, kinders, ens.
Hier is 'n paar dinge om aan te dink:
·
Wees baie, baie dankbaar as jy werk
het, en kán werk. Daar is baie mense wat hierdie mislike “joppie”
van jou sou wou opraap as jy dit nie meer wil hê nie.
·
Weet wanneer genoeg, genoeg is. Sê soms
maar bietjie vir die baas “nee”, soos wat jou kinders gereeld hoor.
En wanneer het jy genoeg opgegaar met al daardie oortyd? Ja,
natuurlik is dit meesal bloot vir oorlewing, maar nie vir almal nie.
Spr 30 : 7 – 9 Net twee dinge vra ek van U;
moet my dit tog nie weier nie; daarna kan ek sterf: moenie toelaat
dat ek vals is en lieg nie; moet my nie arm maak of ryk nie, gee my
net die kos wat ek nodig het, sodat ek nie te veel het en U verloën
en sê: "Wie is die Here?" nie, en sodat ek nie arm word en steel en
my God se Naam oneer aandoen nie.
·
Wees 'n goeie, betroubare rentmeester
met dit wat aan jou toevertrou is. As jy jou Godgegewe gawes in jou
werkplek gebruik, moet jy mos werk asof jy dit net vir die Here doen,
of hoe?
·
Geniet jou werk. Hou tog op om alewig
swartgallig te wees, nét die slegte in alles te sien, die baas
alewig af te breek, en jou heeldag bloot te stel aan negatiewe
praatjies. Jy ken mos “Skinner” straat. Daar waar baie mense té veel
tyd spandeer aan die soeke na “vars” lug. So om die hoekie waar dit
gons van die skinderpraatjies. Nee wat, dis genoeg om enige mens sy
werk te laat haat.
·
Besef dat niemand jou niks skuld nie,
al dink ons dikwels so. Weet jy hoe werk lojaliteit? Ons dring mos
daarop aan dat ons so lojaal is. Wel, as jy “lojaal” was, en hard
gewerk het deur die maand, was jy lojaal. Verseker. Maar, as die
baas jou betaal het soos ooreengekom, het hy sy lojaliteit afgedek,
en begin die siklus van vooraf. Lojaliteit strek net oor 31 dae.
Kom ek vra jou. Het jy al gewens jy kan voltyds vir
die Here werk? Dis mos waar vir baie mense, hulle het so 'n passie
vir die Here, dat hulle alles wil opskop en voltyds “in die diens
van die Here” gaan werk. Klink dit bekend? Wel, as jy graag wil, wil
ek vir jou help. Hier is net die geleentheid waarop jy gewag het.
STAAN OP EN GAAN WERK! Want dáár waar jy is, is jy mos in “work
place ministry”. Hoekom wil jy anders wees in die sendingveld as by
jou huidige werk? Wie gaan jy makliker bereik as daar waar jy in elk
geval is? Met wie het jy alreeds 'n beter verhouding as met jou
huidige kollegas?
Gaan maak 'n verskil aan ander mense se lewens, want
jy kan. Weet jy, dis geen kuns om soos almal te wees nie, soos almal
te kla nie, so negatief soos almal te wees nie. Die kuns is om
ánders te wees. Om so op te tree soos wat Jesus dit sou doen. Gaan
bid vir mense, spreek 'n bemoedigende woord, gaan bou mense op, neem
hulle by die hand, leer hulle van die Here. Dan is jy mos voltyds in
Sy diens.
Wat gaan jy VANDAG doen om dit beter te maak vir
jouself, en ander?
|
