OM GOD SE STEM TE HOOR
Het jy al God se stem gehoor? Het jy al ervaar dat God met jou praat? Om vir jou 'n spesifieke woord, of opdrag, of 'n woord van bemoediging te gee? Ek is seker dat ons almal sekerlik op een of ander manier God se stem gehoor het. En ek is seker ons almal smag daarna dat die Here spesifiek met ons praat. Wel, dit gebeur, en dis reg so. God praat met Sy kinders. Op verskillende maniere. Ek wil eers so 'n bietjie negatief begin deur te vra:- "Hoekom wil ons God se stem hoor? Wat wil ons hoor? Wat moet Hy vir ons sê? Waaroor moet Hy met jou praat? Wat is ek en jy bereid om te doen met dit wat Hy vir ons wil sê?" Ongelukkig is dit so dat ons soms net wil hoor wat ons pas. En nog meer, soms soek ons so 'n bietjie toekomsvoorspelling sodat die Here vir ons kan vertel dat daar lekker voorspoed wag, en dalk op die koop toe so 'n bietjie finansiële gewin. Dan gaan klop mense sommer maklik by sogenaamde profete aan.
Jer 23 : 16 - 17
16 So sê die Here die Almagtige: Julle moenie luister na wat die profete
sê nie, die profete wat vir julle as profete optree. Hulle wek vals
verwagtings by julle, hulle praat oor visioene wat hulle self uitdink, nie
oor wat die Here sê nie.
17 Hulle hou aan om vir dié wat My minag, te sê: "Die Here sê daar
sal vrede vir julle wees." Vir dié wat hardkoppig is, sê hulle:
"Daar sal nie 'n ramp oor julle kom nie."
Moeilike een die. Oppas!! Sulke mense vertel maklik stories wat hulle self opdis. Alles wat mense sê, kom nie noodwendig van die Here af nie. As iemand iets in die Naam van die Here sê, vra eers "Sê wie?"
Hoor die stem van die Here. Hoe? Kom ons kyk so bietjie terug in die geskiedenis.
Eks 3 : 1 - 6
1 Moses het die kleinvee van sy skoonpa Jetro, 'n priester van Midian,
opgepas. Hy het die kleinvee diep die woestyn in gejaag totdat hy by
Horeb, die berg van God, gekom het.
2 Toe verskyn die Engel van die Here aan hom in 'n vlam binne-in 'n
doringbos. Terwyl hy kyk, sien hy dat die doringbos aanhou brand, maar nie
uitbrand nie.
3 En Moses sê vir homself: "Ek wil tog 'n bietjie nader gaan om
hierdie wonderlike verskynsel te bekyk. Waarom brand die doringbos dan nie
uit nie?"
4 Toe die Here sien dat hy nader kom om te kyk, roep God na hom uit die
doringbos: "Moses! Moses!" En hy antwoord: "Hier is
ek."
5 Die Here sê toe vir hom: "Moenie nóg nader kom nie. Trek uit jou
skoene, want die plek waarop jy staan, is gewyde grond."
6 Verder sê Hy: "Ek is die God van jou voorvaders, die God van
Abraham, die God van Isak, die God van Jakob." Toe maak Moses sy
gesig toe, want hy was bang om na God te kyk.
'n Baie baie spesiale en gewyde oomblik toe God met Moses praat. Stem jy saam dat dit 'n baie besondere en heilige oomblik was? Nie sommer so in die 'stride' nie? Ons wil die Here se stem hoor. Kan ons verwag dat God met ons moet praat soos met Moses? Ons ontleed dit so bietjie:-
1. God praat op Sy tyd, Sy metode en Sy terme met
Moses. Hy het besluit wanneer Hy met Moses gaan praat.
2. Hy verskyn op 'n bonatuurlike manier aan Moses. In 'n bos wat nie
uitbrand nie.
3. Hy sê vir Moses: "Trek uit jou skoene, want die plek waarop jy
staan, is gewyde grond". Sien jy dat dit 'n absolute heilige oomblik
is? Nie sommer so "skreeu oor die draad" gesprek nie.
4. Hy openbaar Homself baie baie duidelik aan Moses. "Ek is die God
van jou voorvaders, Abraham, Isak, Jakob."
5. Moses beleef die oomblik so intens dat hy sy gesig moes toemaak.
Inderdaad, dit lyk of 'n ontmoeting met die Oppermagtige God 'n baie baie spesiale oomblik is. En toe gee God vir Moses boonop 'n opdrag waarvoor hy nie baie lus was nie.
Hoor jy God se stem? Hoe hoor jy dit? Wat wil jy hoor?
Kan ons vandag God se stem hoor? Ja, verseker!! Ek vra net "Is jy bereid om God se opdragte uit te voer wat Hy aan jou openbaar? Het die woorde: "En toe sê die Here vir my", dalk so bietjie goedkoop geword nie? Ons hoor dit deesdae nogal baie. Klink nogal goed en spesiaal. Maar kom dit regtig van die Here af? My vriend, moet nooit die Here aanhaal vir iets wat Hy nie gesê het nie!!
Hoe hoor ons Sy stem?
· Soms in 'n gedagte wat by jou opkom wat maar net
nie wil weggaan nie. En soms word dit op verskeie maniere bevestig.
· Soms onder gebed. Wanneer jy 'n gewaarwording kry wat net bonatuurlik
sin maak.
· Soms deur eksterne situasies. Iets wat iemand sê, of 'n insident wat
sterk aanhaak by dinge waaroor jy in elk geval wonder - of tob.
· En ja, soms deur iets wat iemand sê. Partykeer praat die Here met jou
deur die oop- en toemaak van deure.
· Verseker deur gesigte, of drome en visioene. Gebeur definitief vandag.
· Baie keer deur 'n preek, of iets wat jy lees, of deur iemand anders se
gebed.
· En dan natuurlik - deur Sy Woord.
Hoe praat Hy deur Sy Woord? Wel, jy moet dit lees. Die grootste geheim! Iemand sê eendag vir 'n ds: "Ek staan op die Woord". Toe sê die ds: "Klim af en lees dit".
Probeer bietjie hierdie:-
Neem in jou stiltetyd 'n gedeelte in die Bybel. Nie 'n lang stuk soos 'n hoofstuk nie.
Lees die stuk so drie keer stadig deur, sonder om dit te probeer verklaar, of selfs om die presiese konteks te verstaan.
Neem dan 'n pen en 'n notaboek en vra jouself die vraag:- Wat wil die Here VANDAG vir MY deur hierdie gedeelte sê. Begin om die gedagtes wat in jou kop opkom neer te skryf. Lees die stuk weer, bid dat die Here vir jou dit sal oopbreek, en wees bereid om alles te doen wat God dalk vir jou mag sê. Skryf in ek-taal, bv die Here vra vandag vir my of ek Hom waarlik liefhet. Gaan lees dan agerna 'n paar keer wat jy geskryf het. Jy gaan nogal verstom staan hoe die Here met jou praat.
Jy sien, die Here praat op baie maniere met mense, maar ons moet soms gaan toets of dit regtig Sy stem is wat ons gehoor het. Hoe? Toets dit aan die Woord. Toets by ander mense.
1. Soms, moet ons wag!! Wees geduldig om God se
stem te hoor!!
2. Wees bereid om God se antwoord op 'n versoek te aanvaar. Soms sê Hy
nee!!
3. Gaan doen wat Hy sê jy moet doen!
4. Om met die Oppermagtige God in gesprek te wees, is 'n heilige oomblik!!