Is
jy 'n pa duisend? Weet jy, die norm waarteen ek en jy dié dinge kan
meet, is om onsself as aardse pa's, te meet teen ons hemelse Pa. 1
Joh 4 : 8 "Wie nie liefhet nie, het geen kennis van God nie, want
God is liefde".
'n Pa duisend, is een wat sy kinders liefhet!!
Job 1 : 1 - 5 In die land Us was daar 'n man met
die naam Job. Hy was vroom en opreg en het God gedien en die kwaad
vermy. 2 Hy het sewe seuns en drie dogters gehad 3 en was ook die
eienaar van sewe duisend stuks kleinvee, drie duisend kamele, vyf
honderd paar trekosse, vyf honderd donkies en baie slawe. Onder die
mense in die ooste was hy die belangrikste man. 4 Sy seuns het om
die beurt partytjies gehou in mekaar se huise. By sulke geleenthede
het hulle dan hulle drie susters genooi om saam met hulle fees te
vier. 5 Ná so 'n reeks partytjies het Job dan sy seuns en dogters
beveel om hulle vir die bring van offers te reinig, en vroeg die
môre het hy vir hulle almal 'n brandoffer gebring, want, het Job
gesê: miskien het my kinders gesondig en God in hulle gedagtes
gevloek. Job het dit elke keer gedoen.
Job was 'n pa wat omgee. 'n Pa wat sy kinders so
liefgehad het, dat hy so dikwels as hy kon, vir sy kinders by God
ingetree het.
Luk 15 : 20b - 24 Toe hy nog ver aankom, het sy
pa hom al gesien en hom innig jammer gekry. Hy hardloop hom tegemoet,
omhels hom en soen hom. 21 Toe sê die seun vir hom: "Pa, ek het teen
God en teen Pa gesondig. Ek is nie meer werd om Pa se seun genoem te
word nie." 22 Maar sy pa roep sy werksmense: "Maak gou! Bring klere,
die beste, en trek dit vir hom aan; sit vir hom 'n ring aan sy
vinger en trek vir hom skoene aan! 23 En bring die vetgemaakte kalf,
slag hom, en laat ons eet en feesvier! 24 Hierdie seun van my was
dood, en hy lewe weer; hy was verlore, en ek het hom teruggekry."
Toe het hulle begin feesvier.
Nog 'n pa duisend. Een wat ongelooflik seergemaak is
deur sy kind, maar steeds die "ultimate" van genade betoon het en
vergifnis aangebied het.
Nou ja, waar staan ek en jy in ons vaderskap? Hoe
maak ons seker dat ons ook 'n pa duisend is? Hoe lyk jou verhouding
met jou kinders, wat sien hulle as hulle jou sien?
Dalk gaan daar nou 101 dinge deur jou kop. Dalk is
jy geskei en jou kinders bly nie meer by jou nie. Dalk is jou
kinders al self pa's. Dalk voel jy dat jy gefaal het as pa. My
vriend, dit is nie te laat om die drade op te tel nie. 'n Verhouding
word deur woorde gebreek, en deur woorde reggemaak. Ek wil 'n paar
punte uitlig wat ons dalk kan help om "'n Pa duisend" genoem te
word:
1. Voorbeeld:
Daar is geen manier beter as om vir jou kind 'n
voorbeeld te wees nie. Dink net bietjie, hoeveel van jou pa se
karaktertrekke en maniere, metodes, is in jou? As daar negatiewe
dinge is, wil jy nie dalk die een wees om hierdie bose ketting te
breek nie? As jy slegte herinneringe het, verander die geskiedenis.
Ons sê maklik: "moenie maak soos ek maak nie, maak soos ek sê". Dit
werk nie so nie. Alles wat jy doen, sal jou kind doen. Alles wat jy
is, sal hy wees. Kan jy regtig sê: "moenie rook of drink", as jy dit
self doen nie. As ek en jy ons vrouens hardhandig hanteer, raai wat
gaan met jou skoondogter gebeur!
Het jou kind jou al sien bid? Dalk daar in jou
binnekamer, of jou stiltetyd plekkie. Jou voorbeeld vryf af.
2. Leer hom:
Spr 29 : 17 "Gee jou seun 'n goeie opvoeding en
jy sal gerus wees oor hom, hy sal jou baie vreugde verskaf".
Deut 6 : 6 - 7 "Hierdie gebooie wat ek jou vandag
gegee het, moet in jou gedagtes bly. Jy moet dit inskerp by jou
kinders en met hulle daaroor praat as jy in jou huis is en as jy op
pad is en as jy gaan slaap en as jy opstaan"
Leer jou kinders die weë van die Here. Ek wil jou
vra, as jy jou kinders gedoop het toe hulle klein was (of ingeseën
het), dink jy ooit nog aan daardie belofte, kom jy enigsins daardie
belofte na?
3. Tugtig hom
Spr 13 : 24 "Wie sy seun nie straf nie, het hom
nie lief nie. As hy hom liefhet, sal hy hom straf wanneer dit nodig
is"
As jy jou kinders tug, wys dit jy is betrokke. Op
die regte manier, nie doodslaan, vloek of uitskel nie. Ek praat van
reëls neerlê en daarby hou.
4. Bemoedig hom
Kol 3 : 21 "Vaders, moenie gedurig by julle
kinders fout soek sodat hulle moedeloos word nie"
Aanmoediging en bemoediging beteken nie om
ondraaglike eise (akademies, sport, ens.) aan jou kind te stel nie.
5. Wees lief vir jou kind se ma – respekteer haar in
alle opsigte
Iemand het gesê: "Die beste wat jy vir jou kind kan
doen, is om vir sy ma lief te wees". Miskien is jy geskei -
respekteer dan ten minste jou kind se ma.
Kom ons vat saam:
· Het jy al vir jou kind gesê jy is lief vir hom?
Begin daarmee, sê dit elke dag. Stuur sommer nou 'n SMS, al is hy
dalk al uit die huis uit.
· As daar dalk 'n breuk met jou kind is, wil jy dit nie vandag
regmaak nie? Moenie eendag langs sy graf staan en dan is dit te laat
nie.
· Moenie vir jou kind te veel geld gee nie. Dikwels doen 'n pa dit
as 'n afkoopboete omdat hy nie betrokke is nie; ek sê vir jou: dit
is fataal.
· Seën jou kinders. Lees Gen 49 : 22 waar Jakob vir Josef seën.
Gebruik hierdie woord, of jou eie en spreek ’n seën oor jou kind
uit.
· Bid vir jou kind - ook voor hom. Bid die krag en redding van God
oor hom af.
· Wees lief vir sy / haar ma.
... begin vandag!
|