Eks.
20:1-7
Toe het God al hierdie gebooie aangekondig: “Ek is die Here jou
God wat jou uit Egipte, uit die plek van slawerny, bevry het. Jy mag
naas My geen ander gode hê nie. “Jy mag nie vir jou 'n beeld of
enige afbeelding maak van wat in die hemel daarbo of op die aarde
hieronder of in die water onder die aarde is nie. Jy mag hulle nie
vereer of dien nie, want Ek, die Here jou God, eis onverdeelde trou
aan My. Ek reken kinders die sondes van hulle vaders toe, selfs tot
in die derde en vierde geslag van dié wat My haat, maar Ek betoon my
liefde tot aan die duisendste geslag van dié wat My liefhet en my
gebooie gehoorsaam. “Jy mag die Naam van die Here jou God nie
misbruik nie, want die Here sal die een wat sy Naam misbruik, nie
ongestraf laat bly nie.
Dit is die wet van God, soos wat
die Here dit vir Moses gegee het.
God, die Oppergesag, hoogste gesag,
Skepper van alles, die enigste God, ’n God van liefde, ontferming,
deernis, sagtheid, ’n vriend, ’n lewende God. Hy is ernstig oor sy
skepping, oor sy skepsels. Hy is egter ook ’n jaloerse God wat ons
as sy eiendom toeëien. Hy soek jou, Hy soek jou hart, Hy wil jou
naby Hom hê en Hy wil alles van jou hê. Hy eis onverdeelde trou.
Hoekom is Hy jaloers? Hy besit jou
mos, of hoe? Of is dit nie waar nie? Ongelukkig is dit per definisie
nie waar nie, want jy moet kies of jy aan Hom behoort of nie. In die
tien gebooie stip Hy presies uit wat Hy van hierdie verhouding
verwag: “Ek, die Here jou God, eis onverdeelde trou aan My”. Hy eis
onverdeelde trou, maar Hy dwing dit nie af nie. Onverdeelde trou is
soos in ’n huwelik: ek het één vrou en elke enkele element wat met
’n vrou te doen het, sal en moet ek op haar uitstort. Nie net 50%,
80% of 99% nie, maar 100%. En net so eis die Here my onverdeelde
trou. Dit beteken dat ek 100% vír Hom is, of niks. Dis my en jou
keuse. As jy vandag wonder wat Hy van jou verwag, dan kan jy weer
Eks. 20 lees, want dit is presies net so geldig vandag as ’n paar
duisend jaar gelede.
Het God my en jou onverdeelde trou?
Weet jy, ons leef in ’n wêreld waar daar ’n totale roekeloosheid
hieroor heers. Dis algemeen, dit raak modern om jou geloof af te
sweer. Ek lees die kommentaar van ’n eks-predikant wat spog dat hy
twee jaar gelede sy geloof afgesweer het en nou vier hy dié dag. As
jy dit lees sal jou hare regop staan. Dan verklaar hy dat hy nie sy
geloof verloor het nie, hy het dit afgesweer en weggegooi... baie
dapper! Maar, die skrif is aan die muur. Ek is seker jy ken hierdie
spreekwoord en dat dit beteken jou doppie is geklink! Alles is verby.
Dan 5:1-7
Koning Belsasar het 'n groot ete gegee vir sy duisend
hoofamptenare en saam met hulle wyn gedrink. Toe hy onder die
invloed van die wyn was, het hy die goue en die silwerbekers wat
deur sy voorganger Nebukadnesar uit die tempel van Jerusalem
weggevoer is, laat haal sodat hy en sy hoofamptenare, sy vrouens en
sy byvrouens daaruit kon drink. Toe is die goue en die silwerbekers
gebring wat weggevoer is uit die tempel van God in Jerusalem, en die
koning en sy hoofamptenare, sy vrouens en sy byvrouens het daaruit
gedrink. Hulle het wyn gedrink en die gode van goud, silwer, brons,
yster, hout en klip geprys. Meteens verskyn daar toe 'n mensehand
wat op die gepleisterde muur van die paleis skryf, reg teenoor die
kandelaar. Die koning het die hand gesien terwyl dit skryf. Toe het
die koning bleek geword, hy was baie bang, sy bene het gebewe en hy
was lam van die skrik. Hy het hard geroep dat die voorspellers, die
sterrekykers en die besweerders ingebring moes word en hy sê toe vir
hulle, sy raadgewers: “Enigiemand wat kan lees wat hier geskrywe is
en dit vir my kan uitlê, sal 'n koninklike kleed aangetrek word en
'n goue halsketting omgehang word, en hy sal as derde in rang regeer.”
Ons lees dat Daniël ingeroep word
om dié onverstaanbare woorde vir die koning uit te lê. Die koning
word bang en beangs en het geen idee wat hier gebeur nie. Hoe sou jy
opgetree het as jy skielik hierdie hand sien wat begin skryf? Hoekom
is hy bang? Want hy is roekeloos met God, hy het saak met die Here
en sy heiligheid. Hy het die silwer en goue bekers wat uit die
tempel in Jerusalem kom gebruik vir ’n reuse-partytjie wat hy gehou
het. Dit was items wat ’n heilige betekenis gehad het en hy gebruik
dit om sy eie fees te hou. En dit, lyk dit vir my, moes hy nie
gedoen het nie. En daai hand skryf en Belsasar begin beangs en
paniekerig raak.
Dan 5:22-30
Maar u, Belsasar wat hom opgevolg het, u het u nie verootmoedig
nie, alhoewel u dit alles weet. U het verwaand opgetree teenoor die
Here in die hemel: die bekers uit sy tempel is na u toe gebring en u
en u hoofamptenare, u vrouens en u byvrouens het daaruit wyn gedrink.
U het die gode van silwer en goud, en van brons, yster, hout en klip
geprys, gode wat nie kan sien nie en nie kan hoor nie en niks weet
nie. U het nie die God geëer van wie u die lewensasem ontvang en wat
oor u lewe beskik nie. Daarom is die hand deur Hom gestuur en is
hierdie woorde geskrywe. “Dit is die woorde wat geskrywe is: ‘Getel,
getel, geweeg en verdeel.’ En dit is die betekenis van die woorde: ‘Getel’:
God het die jare van u koningskap getel en 'n einde daaraan gemaak.
‘Geweeg’: u is geweeg en te lig bevind. ‘Verdeel’: u koninkryk is
verdeel en aan die Mediërs en die Perse gegee.” Daniël is toe op
bevel van Belsasar 'n koninklike kleed aangetrek en 'n goue
halsketting omgehang, en hy is uitgeroep as regeerder, derde in rang
in die koninkryk. Daardie nag is koning Belsasar van die Galdeërs
vermoor.
Hy het God getart, Hom nie geag en
geëer nie; hy het hom nie voor God verootmoedig nie en dan kom
hierdie woorde: Getel. Getel. Geweeg en verdeel. Hy is geweeg en te
lig gevind. Jy sien, hierdie ding gaan nie oor gewoonweg sonde doen
nie. Dit gaan nie oor ’n swakheid van ’n mens wat dinge doen waaroor
hy later berou kry nie. Hierdie gaan oor ’n roekelose, Goddelose
lewenstyl, ’n lewe waar God weggestoot word, beledig word en getart
word.
Kom ons sê jy vat my Noritake
eetgerei, of ’n goue beker en gooi die hond se kos daarin en roep
vir Wagter en Wagter smul uit die beste eetgerei. As jy dit doen,
kom die bord niks oor nie, maar jy betoon minagting teenoor my. Weet
jy hoe maklik is dit om God te minag? “Daardie nag is koning
Belsasar van die Galdeërs vermoor” (vers 30). Hy was roekeloos met
God en toe skryf die hand: geweeg en te lig gevind.
Het die Here op hierdie manier vir
Belsasar om die lewe gebring, of was dit maar toevallig dat hy
vermoor is? Dit was nie toevallig nie. Die Here het sy lewe geneem
omdat hy Hom nie geëer het nie. Waar staan ek en jy? Wat sal die
hand teen die muur skryf?
Ek dink ons moet gereeld
introspeksie doen en besin of die Here sentraal staan in ons lewens.
God se genade is oneindig groot, maar Sy oordeel is oneindig fel vir
dié wat roekeloos met Hom omgaan en Hom uittart.
Ek veroordeel nie hierdie
eks-leraar van wie ek gepraat het nie, hy veroordeel homself. Die
Here is ’n werklikheid en ’n lewende God. Ja, verseker is Hy ’n God
van liefde, maar onthou dat Hy ook ’n jaloerse God is.
Ek wil nie ’n hand teen my muur sien skryf nie, maar miskien is ek
ook soms roekeloos met Hom. Daar is verskeie manier hoe ons Hom
oneer kan aandoen, bv.
1.