Terug
na HOOFBLAD
VOLSTRUIS
IN DIE WINDPOMP – 5 Augustus 2009
Wat is die
grootste en goorste krisis wat jou al getref het? Waar in jou lewe het die
onaangenaamste ding denkbaar jou getref? Of is jy vrygestel van alle vorms
van swaarkry, teenspoed of moeilikheid? Ek twyfel. Ek dink ons elkeen het
iewers al in iets sleg beland. Hetsy jy dit oor jouself gebring het, of
dat dit deur iemand anders teweeggebring is. Nou ja, daar is ‘n goeie
spreekwoord daarvoor: wanneer die pawpaw die fan strike, in Afrikaans
vertaal: wanneer die volstruis in die windpomp invlieg. Kan jy daardie dag
onthou? Of dae? Of tydperk? … toe die volstruis in jóú windpomp
ingevlieg het. Dalk was dit trauma a.g.v. lewensverlies, of toe jy hoor jy
het kanker, of toe jy in hegtenis geneem is, of toe jou man of vrou jou
met ‘n hamerhou tussen die oë klits deur te sê: “ek is klaar met
jou, ek wil nie meer voortgaan nie”. Onthou jy hoe dit gevoel het of jou
lewe in skerwe spat? Bitter onlekker… toe dit voel of alles inmekaar
val, en niks meer sin maak nie. Onthou jy hoe jy gevoel het, die sukkel om
dit te verwerk, daardie onbeskryflike bang, die gevoel dat niks is in
beheer is nie. En … as dit
nog nie met jou gebeur het nie , wees dankbaar, baie dankbaar. Party sal
dit dalk vir altyd vryspring. Maar … ongelukkig, vir party kan ons sê:
“the cheque is in the mail”. Het jy ‘n “survival kit” gereed vir
daardie dag?
Wat sê die Bybel
van die volstruis-in-die-windpomp-dae? Praat die Bybel enigsins oor
moeilike tye, of glo jy die mense wat so roekeloos sê dat slegte goed
nooit met Christene kan gebeur nie?
Ps 23
Die Here is my herder, ek kom niks kort nie. Hy laat my rus in groen
weivelde. Hy bring my by waters waar daar vrede is. Hy gee my nuwe krag.
Hy lei my op die regte paaie tot die eer van sy Naam. Selfs al gaan ek
deur donker dieptes, sal ek nie bang wees nie, want U is by my. In u hande
is ek veilig. U laat my by 'n feesmaal aansit, terwyl my teëstanders moet
toekyk. U ontvang my soos 'n eregas, ek word oorlaai met hartlikheid. U
goedheid en liefde sal my lewe lank by my bly en ek sal tuis wees in die
huis van die Here tot in lengte van dae.
Klink hierdie
Psalm na een wat nét voorspoed uitbeeld? Of maak dit ook voorsiening vir
moeilike tye? “Selfs al gaan ek deur donker dieptes, sal ek nie bang
wees nie, want U is by my. In U hande is ek veilig.” Hoor wat sê vers
1: “Die Here is my herder, ek kom niks kort nie”. Daar staan nie “ek
het alles in oorvloed” nie, daar staan “ek kom niks kort nie”. Daar
is nogal ‘n verskil. “Ek kom niks kort nie”, klink vir my na tevrede
wees met my omstandighede en situasie.
Vir Job was dit ‘n GROOT volstruis, en ‘n woeste windpomp … miskien
was daardie volstruis boon-op swanger … met ‘n eier! Groot probleme
wat hom getref het … hy het alles verloor, diere, besittings, slawe,
kinders, en later tref die allerverskriklikste siekte hom…
Job 1:20-22
Toe het Job opgestaan en sy klere geskeur. Hy het ook sy hare afgeskeer.
Daarna het hy op die grond gaan lê en gesê: "Sonder iets het ek in
die wêreld gekom en sonder iets gaan ek daaruit. Die Here het gegee en
die Here het geneem. Prys die Naam van die Here." Onder alles het Job
nie gesondig of God iets verwyt nie.
Die
Here het gegee, en die Here het geneem. Prys die Naam van die Here. Hoe
hou jy daarvan? Toe die hare waai (of is dit nou die vere daar in die
windpomp?), toe prys hy die Naam van die Here. Die Here laat die ergste
dinge denkbaar toe in Job se lewe, maar Job sê: “Prys die Naam van die
Here”…. “As ons die goeie van God aanvaar, moet ons nie ook die
slegte aanvaar nie?” (Job 2:10). Kan jy die Here prys daar waar jy in
sak en as sit? Op die ashoop? Sonder werk?
Besig om te skei? In die gevangenis? Sonder ‘n sent op jou naam?
By die graf van ‘n geliefde? Kan jy sê: “Here, niks werk uit nie,
maar ek prys U Naam”?
Hab
3:17-19
Al sou die vyeboom nie bot nie en daar geen druiwe aan die wingerde wees
nie, al sou die olyfoes misluk en die lande geen oes lewer nie, al sou
daar geen kleinvee in die kampe meer wees nie en die beeskrale sonder
beeste wees, nogtans sal ek in die Here jubel, sal ek juig in God, my
Redder. Die Here my God
gee vir my krag. Hy maak my voete soos dié van 'n ribbok, op hoë plekke
laat Hy my veilig loop.
In
sy boekie “Prison to Praise” sê Merlin Carothers jy moet net aanhou
om die Here te prys, ongeag die omstandighede. Jy kry nogal ‘n
interessante perspektief op jou probleme as jy dit begin doen, want dan
erken jy dat die Here steeds (of liewer juis) in die prentjie is. Want jy
besef eers dat die Here al is wat jy nodig het, as Hy al is wat jy oorhet.
Dan erken jy die feit dat Hy steeds groter is as die probleem.
Jes
41:10
Moenie bang wees nie, Ek is by jou, moenie bekommerd wees nie, Ek is
jou God. Ek versterk jou, Ek help jou, Ek hou jou vas, met my eie hand red
Ek jou.
Hy is daar. Nou.
Ten spyte van… al voel Hy ver. Die lewe is ‘n snaakse plek … dit gaan vir
dekades lank goed,en dan een dag, styg daar ‘n volstruis op. Eintlik
lanseer hy, en dan is dit nag! Die menslike natuur is om uit te roep:
“Waar is U, Here?” So asof die Here weg is. Maar … as jy Hom prys en
loof, gee jy erkenning aan die feit dat Hy daar is, dat Hy in beheer is,
dat Hy jou vashou en versterk.
Toe ons kinders
was, het ons elke jaar gaan vakansie hou by Illovo aan die Suidkus, met so
‘n groot, groen seiltent. Ons het menige maal aan daai tentpale
gehang soos vinke as daar ‘n storm opkom. Al wat jy moes doen, was om
verbete te klou tot die storm bedaar het. En dis wat ek en jy vandag moet
doen: staan vas, kap hakke in die grond in, anker jouself aan Jesus met
sterk toue van geloof, en
klou verbete. En weet een ding: dit
maak nie saak hoe woes die storm woed nie, as jou geloofs-ankertoue sterk
is, gaan niks jou omdop nie, want Jesus wat jou anker is, gaan nêrens
heen nie. Maak nie saak of jy self verantwoordelik is vir die storm nie,
Hy bly die anker. As dinge ondraaglik raak, bly Hy steeds die anker. As
dit voel of die toue enige oomblik gaan breek, hou aan glo, dan word daai
toue net dikker en sterker. Intussen: prys die Naam van die Here. Dis in
hierdie tye wat jou kennis van God toeneem, veral as jy antwoorde in Sy
Woord gaan soek. Jy sal nie weet hóé sterk die anker is as jy hom nog
nie getoets het nie.