Dis
verkiesingstyd en almal is op die een of ander manier besig met
keuses en besluite. Party doen dit aktief en hulle veg vir
standpunte, terwyl ander dit passief doen en sê: “stem reg, bly weg”.
Nog ander neem net deel uit gewoonte, ander omdat hulle glo dit is
wat hulle móét doen. Ander neem nie deel nie, want hulle glo dit
help niks nie – hulle kyk na die tekens en besluit om terug te staan.
Pred 11:1-6
Werp jou brood op die water, eendag kry jy dit terug.
Hou jou besittings op sewe, selfs ag plekke, want jy weet nie watter
teëspoed oor die land kan kom nie.
As die wolke vol water is, reën hulle leeg op die aarde; of 'n boom
nou suid of noord val, dit bly lê waar dit geval het.
Wie die wind bly dophou, saai nie, wie na die wolke bly kyk, oes nie.
Net so min as wat jy kan verstaan hoe gees en liggaam by mekaar
uitkom in die skoot van 'n swanger vrou, net so min kan jy die werk
van God verstaan. Hy doen dit alles.
Saai jou saad in die môre, gaan in die laatmiddag daarmee voort. Jy
weet nie watter van die twee sal 'n oes lewer nie en of altwee ewe
goed sal wees nie.
‘n Pragtige skrifdeel wat praat van geloof, besluite
neem, berekenend werk. Hier in die middel van hierdie gedeelte staan:
“wie die wind bly dophou, saai nie, wie na die wolke bly kyk, oes
nie”. Sjoe, vir my sê dit:
1) vertrou
2) neem besluite
3) gebruik waagmoed
4) gaan teen die stroom op
5) gebruik jou verstand
6) moenie passief wees nie
7) oppas dat jy te gou moed opgee
Ek dink hierdie teks praat juis vandag kliphard,
a.g.v. politiek, werkloosheid, wêreldse ekonomiese krisis, slegte
verhoudinge, ens.
“Wie die wind bly dophou, saai nie, wie na die wolke
bly kyk, oes nie”. ‘n “Loser” sê: Hier is ‘n storm aan die kom,
alles gaan verwoes word; ‘n wenner sê: dis okei, daar is ‘n storm,
maar dis nou-nou weer verby. ‘n “Loser” sê: Oe, hier is ‘n
verskriklike wind wat waai; die wenner sê: Wow, kyk die wind, span
die seile.
Dit lyk my mense reageer nou maar eenmaal verskillend
in verskillende situasies; dit hang net af van waar jou fokus lê.
Ek glo die Here het vir ons genoeg kennis en
inligting gegee sodat ons berekende besluite kan neem. So weet die
boer wanneer hy moet plant, want hy weet dat die Here volmaakte orde
geskep het. Hy plant vóór die reënseisoen, hy spandeer sy insetkoste
voordat hy weet wat die oes gaan oplewer. Hy móét dus optree in
vertroue op die Here. Die film “Faith like Potatoes”, is so ‘n
skitterende voorbeeld van geloof, waagmoed en uiteindelik sukses.
Die boer het besluit om verby die wind en die wolke te kyk. Hy het
nie pateties gaan sit en “vertrou” nie, nee, hy was aktief besig
terwyl hy vertrou het. Ons het al voorheen gesê God se wagkamer is
nie ‘n passiewe, patetiese plek nie. Ek wil iemand aanhaal wat
eenmaal gesê het: “Hou op bid, moet glad nie bid nie – totdat jy
alles gedoen het wat jy móét doen en kán doen in jou situasie”. Doen
en bid. Nou ja, jy moet hierdie stelling in die regte perspektief
sien. Natuurlik neem jy nie blindelings jou besluite nie, en
natuurlik bid jy vir wysheid. Die punt is net, kom jou
verantwoordelikheid na. Die Here gebruik ook jou gesonde verstand om
bepaalde uitkomste te bereik, daarom is dit soms nodig dat jy waag,
en nie net vir die wind en die wolke kyk nie.
‘n Vriend het eendag vir my gesê dat hy al so lank
bid vir ‘n ander werk, maar die Here hou die deure toe. Ek het die
volgende stelling gemaak: “As jy op die water wil loop, moet jy uit
die boot klim”. Hy het begin om sy CV uit te stuur, en toe het die
Here begin “werk”. Jy sien, van passief na aktief. Van passief sit
en bid, tot aktief sokkies optrek en begin beweeg en jou kant bring
in die situasie. Natuurlik dompel die ekonomiese situasie ons in
ernstige probleme – maar hoe sal jy optree as die boot omval? Ek kry
nogal baie oproepe van mense wat in nood is. Party vat die passiewe
pad, en bly vassteek by “bid vir my”, terwyl ander sal sê: “Ek wil
iets probeer doen aan die situasie. Hoe klink hierdie en daardie vir
jou?” – daar is nogal ‘n verskil in die uitgangspunt, of hoe?
Weet jy dat van die mees suksesvolle besighede uit
nood gebore is? Dinge wat mense gedink het nooit sou werk nie, wat
doodgebore is, projekte wat teen logika ingaan – dis juis hier waar
mense sukses behaal het, omdat hulle nie na die wind en die wolke
bly kyk het nie, maar hulle het die Here dopgehou. Is jy ongelukkig
in jou werk? Sit jy al jare in slegte omstandighede? Die groot vraag
is: Wat doen jy daaraan? Kla jy heeldag? Stuur jy duisende e-posse
om vir ander te vra om vir jou situasie te bid? Versuur jy jou gesin
se lewe omdat jy sleg behandel word? Neem jy ander se gebedstyd in
beslag met iets waarvoor hulle nie ‘n gebedslas het nie? ….. terwyl
jy self niks aan die situasie doen nie. Waarna kyk jy? Die wolke of
die Here?
En nou is die verkiesingstyd. Die wolke pak saam, die
stormwinde waai … dis nag! Jy sê dalk: nee, ek gaan nie stem nie,
dit help niks, alles is verlore, zoem-zoem, en doef – weg is ons.
Shame, is dit jou grootste storm? Is dit die mees verwoestende wind
wat jy al sien waai het? Onthou jy so ‘n maand gelede toe ons ‘n
gebedsdag gehad het vir die verkiesing en vir ons land? Ek dink die
Here sê vandag: “Ek sal doen wat Ek moet doen. Doen jy net wat jy
moet doen, en vertrou My vir die res”. My vriend, ek sê vir jou, ek
plant in hierdie land, en ek gaan oes in hierdie land. Dit gaan nie
oor my nie, maar oor wat die Here hier wil doen. As die Here wou,
sou die hele wêreld een groot Mauritius gewees het – idillies,
volmaak, probleemvry. Net jammer dat ons net na die mooi en goeie
van die Utopia’s kyk – weet jy hoeveel armoede is in Mauritius? St
Lois is ‘n goor plek. Die Here het in jou en my soveel krag, en
wysheid en kennis ingebou. Pred 11:6 sê: “Saai jou saad in die
môre, gaan in die laatmiddag daarmee voort. Jy weet nie watter van
die twee sal 'n oes lewer nie”. Klink nie vir my soos ‘n saaier
wat pateties terugstaan nie. Pred 11:2 “Hou jou besittings op
sewe, selfs agt plekke, want jy weet nie watter teenspoed oor die
land kom nie”. Sien jy? Die Here skryf in Sy Woord, dat slegte
tye gaan kom, oeste gaan misluk. En jy … móét aksie neem.
Is die lewe vir jou verdoem? ‘n Mislukking? Het jy
opgegee? Kyk jy net na die wind en die wolke? Of, is die lewe vir
jou ‘n uitdaging, sien jy geleenthede, het jy nuwe idees, voel jy
dis tyd om jou sokkies op te trek, en die breinselle in te span?
My vriend, geniet hierdie lewe, geniet hierdie land
van melk en heuning. Kyk hoe die Here besig is, sien sy werk raak.
Neem deel aan die lewe, ek herhaal: neem deel aan die lewe!
|