Die kamp was ‘n onvergeetlike ervaring, vir ons, as helpers. Om net weer opnuut te kon besef wat dit beteken om te glo soos ‘n kind. Ons het God se teenwoordigheid op ‘n nuwe wyse ervaar en besef wat dit beteken om met onvoorwaardelike toewyding aan Hom te leef. Ek het daar aangekom met die ingesteldheid dat ek soveel het om te bied, maar ek het daar weggegaan met die wete dat ek soveel  meer ontvang het. As iemand, wat nie self deur ‘n gestremdheid geraak is nie, dink mens baie maal jy is beter af as die wat wel fisies of verstandelik nie dieselfde vermoëns as jy het nie. Hierdie kamp het egter weer opnuut my oë oopgemaak en ek het ondervind dat daar soveel is om te leer, by hierdie baie spesiale mense. Die belangrikste daarvan, is onvoorwaardelike liefde en aanvaarding. Ek is innig dankbaar dat ek die geleentheid gehad het om die kamp by te woon. Ons het soveel wonderlike mense ontmoet en ek kyk nou met ander oë na die lewe – dankbaar vir alles wat ek het en dankbaar dat God sulke spesiale mense op my pad sit.

Erica Erlank

"Soos gewoonlik gaan kyk ek heel eerste op Heuning of daar nie dalk ‘n vars druppel is om mee te “kickstart” nie. Ek haak toe vas by die foto’s van die gestremdes van julle afgelope kamp … 

My gemoed skiet sommer vol as ek daarna kyk. Ek kan nie help om ongemaklik te voel in die teenwoordigheid van (veral verstandelik) gestremde persone nie. Wat ek egter nooit sal doen, is om op hulle neer te sien nie – ek wil glo dat as ons eendag in die Hemel kom, gaan die “verhoog” vol van hierdie (verstandelik) gestremdes wees, maar dan gaan hulle “gesond” wees, en hulle gaan daar voor sit as die prefekte/leerlingraad. Hulle gaan beslis een-of-ander ereplek hê!"
 

Woensdae oggende kom ons in die kapel bymekaar,  ons noem dit “Assembly”. Almal wat by die kamp was wou graag vorentoe gaan en hulle leeus wys. Dit is toe gedoen en Bryn  het toe so kortliks vertel wat ons gedoen het. Dit is met ‘n luide handegeklap beloon. Nou wil almal gaan!   Dankie aan almal wat dit so aangenaam gemaak het.

Namens al die Smalbergers wil ek vir julle baie dankie sê vir die wonderlike kamp. Na die kamp voel dit of ons "ander" mense is - vervul met die liefde van die Here, liefde van vriende (oues en nuwes) Die kamp was werklik goed beplan - van al die baie eet en die program wat julle aangebied het. Daar was geen vervelige oomblik nie. Kan jy groot asseblief my dank oordra aan almal van julle wat betrokke was: Willem, jouself, Dennis, Marietjie, Noddy, Wally en sy span.

Stephan Smalberger

Hierdie kamp was voorwaar baie goed vir my ingesteldheid op die lewe om positief te leef!  Dit was my tweede keer op die kamp en ek hoop daar gaan nog vele wees.  “Ons is tot alles in staat as die Leeu van Juda ons koning en verlosser is.”, dis wat ek van die kamp af in my hart weggevat het.  ‘n Glimlag was die resultaat van samesyn van die begin af. 

Toe ek daar aankom was ek verwelkom deur bekende stemme wat klaar ‘n spontane glimlag op my gesig gesit het, wat end-uit gebly het.  Toe ons eers met die aktiwiteite begin het en kennis gemaak het met al die nuwe gesigte, was dit asof niks anders saak gemaak het as die hede nie.  Daar is ruimte vir elkeen om homself uit te leef met die verskillende uitdaging waarmee elkeen saamleef.  Ek ervaar altyd aanvaarding en steun van almal as ek op so kamp gaan en die keer was glad nie anders nie!  Almal help almal en ons het soveel pret saam dat jy vergeet van dit wat jy nie het nie en vir die tyd saam, net gefokus bly op wat jy het.  Dis ‘n baie awesome ervaring wat mens nie kan bekostig om mis te loop nie.  Partykeer voel dit of jy in ‘n gat verval deur al die geswoeg en sweet van die lewe en soms vat dit aan mens se selfbeeld, maar die awesome ding van die kamp is dat jy nie hoef voor  te gee nie, om net jouself te wees is die geheim om verryk te word.  Almal straal liefde uit, dis waarlik ‘n opbouende ervaring! 

Die temas is altyd baie toepaslik.  Ek wil die moed van ‘n Leeu hê en deur die leiding van die Heilige Gees my gedrag en leefstyl tot eer van die Here uitleef.  Ek span my ook in om riglyn aan hand van die Woord gefokus te hou.  As ons mekaar kan bemoedig om te volhard om in die waarheid te leef, soos ons dit op die kampe so goed regkry, dan is ons tot baie meer in staat as wat ons dink.  Dit is my inspirasie wat ek gekry het.  Baie dankie aan tannie Wilna en oom Willem wat sulke kampe vir ons reël en ons met soveel hartlikheid ontvang , ek weet almal waardeer dit baie.  Ek is ook baie dankbaar vir almal wat die kamp moontlik maak vir ons, dis ‘n groot voorreg!  Die kamp was baie lekker!!

Marita Erlank

Dit was weereens 'n heerlike, verrykende, inspirerende ervaring om nog 'n naweek te kon deurbring saam met ’n groep gestremde vriende. Ek kan getuig dat ek baie liefde beleef het, wedersydse aanvaarding ondervind het, skaterlag gehoor het, geestelike versterking ervaar het, dankbaarheid gesien het en geïnspireer is deur positiewe houdings van mense met groot uitdagings in die lewe. Ek het huis toe gekom met groot dankbaarheid teenoor ons getroue span werkers, teenoor borge wat onselfsugtig bydra en teenoor die Here wat dit alles moontlik gemaak het. Ons beplan sommer alreeds weer ons volgende kamp wat 18-19 Oktober sal plaasvind.

Wilna Botha

|Terug na Heuning Hoofblad|