... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)

Ek kan nie meer nie korporaal... 
Kyk, dis nou ses woorde wat jy onder geen omstandighede in die weermag geuiter het nie, al het dit gevoel of jy jou laaste van laaste stukkie energie opgebruik het. Ek onthou dat ek in my weermagtyd dit seker een of twee keer gehoor het. Dit was die woorde van 'n "looser" wat nie vasbyt gehad het nie. Daardie woorde het jou gebrandmerk as 'n sissie en het vir altyd by jou gebly. 
Ongelukkig kom ons almal een of ander tyd by daardie punt wat die lewe te veel raak en ons nie kans sien vir nog 'n dag nie. Ek sien hoe depressie, werksomstandighede, egskeiding, slegte finansies, siekte en eensaamheid mense by daardie punt bring wat hulle so misrabel voel dat hulle eerder smag na die einde van hierdie lewe. Dan kom daar nog mense met hierdie absurde woorde : "Ruk jouself reg man"
Kyk wat skryf Jeremia in Jer 20:14-16
"Vervloek is die dag waarop ek gebore is, die dag waarop my ma my in die wêreld gebring het; mag dié dag altyd sonder seën wees. Vervloek is die man wat vir my pa die berig gebring het: "Jy het 'n seun," 'n berig wat hom baie bly gemaak het"

Moedeloos, magteloos, hulpeloos, hooploos. Dis dan wat die mens uitroep : Waar sal my hulp vandaan kom?
Wel, die antwoord ken jy : Ps 121:2 "My hulp kom van die Here wat hemel en aarde gemaak het". 
Die vraag is : Hoeveel kan 'n mens verduur? Wel, baie, vreeslik baie, maar nie onbeperk nie. Dit hang af vir wie jy voor oë het, op wie jy vertrou, en hoe lank jy kan wag vir uitkoms.
Hier is 'n paar beloftes :
Jos 1:5 "Soos Ek by Moses was, so sal Ek by jou wees. Ek sal jou nie in die steek laat nie, jou nie verlaat nie." 
Kan jy DIT glo?
Ps 91:15 "Wanneer hy My aanroep, sal Ek sy gebed verhoor, in sy nood sal Ek by hom wees. Ek sal hom red en in sy eer herstel". Klink hierdie belofte goed?
Jes 41:10 "Moenie bang wees nie, Ek is by jou, moenie bekommerd wees nie, Ek is jou God. Ek versterk jou. Ek help jou, Ek hou jou vas, met My eie hand red Ek jou"

Vlug in die Here se arms in, hulle is altyd oop. ~ Willem Botha, 27/10/2015

“Moenie bang wees dat ’n ramp jou skielik sal oorval nie ...” (Spr. 3:25) Ek kan partykeer nogal in sulke negatiewe gedagtes vasval, dan sê ek vir myself: sê nou maar ek kry ’n ernstige siekte, sê nou maar my man gaan dood, sê nou maar ons besigheid faal, sê nou maar een van die kinders kom iets oor, sê nou maar rowers oorval ons ... ens. ens.! Kan ek enige van hierdie situasies voorkom? Nee. Het ek beheer oor enige een van hierdie dinge? Nee. Bekommernis oor hierdie dinge waaroor ek geen beheer het nie, kan my net onnodig paniekerig maak, onnodig laat stres, onnodig depressief maak, onnodig planne laat maak vir iets wat heel moontlik nie eens gaan gebeur nie. Ek wil myself liewer programmeer met dié wete dat die Here in beheer is, dat ek altyd op Hom kan vertrou vir beskerming, versorging en uitkoms wanneer daar ’n krisis opduik. “Jy weet mos die Here is altyd by jou. Jy kan altyd op Hom vertrou. Hy sal jou beskerm.” (Spr. 3:26) Stop worrying about what can go wrong, and get excited about what can go right! ~ Wilna Botha, 26/10/2015

'n Volmaakte wêreld

Jitte hierdie wêreld raak amper ondraaglik.  Sê nou ek vra vir jou 'n definisie van 'n volmaakte wêreld,  hoe sou jy dit beskryf?  Ek glo daar sal seker baie verskillende definisies uitkom, en ek het vandag vir myself so 'n prentjie aanmekaarsit van wat ek dink 'n paar probleme sou oplos.
Ek het onlangs  weer 'n fliek van Jim Carrey gesien met die naam "Liar Liar",  waar 'n seuntjie wens dat sy pa net vir een dag nie kan lieg nie. Die film is skreeusnaaks,  want die pa is 'n prokureur en hy kon net eenvoudig nie sy werk soos altyd doen nie.  Daar is 'n klomp lewenslesse in die fliek.  Sê nou net niemand lieg nooit weer nie? Ek dink ons sou naby aan 'n vomaakte wêreld kom.
Matt 5: 34 - 37
"Maar Ek sê vir julle: Moet glad nie 'n eed aflê nie, nie by die hemel nie, want dit is die troon van God; nie by die aarde nie, want dit is die rusplek vir sy voete; nie by Jerusalem nie, want dit is die stad van die groot Koning. Jy moet ook nie jou kop op die spel plaas as jy 'n eed aflê nie, want jy kan nie een haar wit of swart maak nie.Laat julle ‘ja’ eenvoudig ‘ja’ wees en julle ‘nee’, ‘nee’. Wat meer gesê word as dit, kom van die Bose.”
Besef jy dat die regsberoep totaal oorbodig sal raak? Mense sal  met 'n handdruk 'n transaksie beklink en dit sal bekragtig word. Ons sal ons politieke leiers kan vertrou en respekteer,  besigheid sal 'n wonderlike karakter aannneem en daar sal ongekende welvaart  wees want almal sal eerlik hulle werk na die beste van hulle vermoë doen.  Daar sal geen misdaad wees nie en ons sou kon slaap met ons deure oop.
En dan 'n baie netelige een: Huwelike sal hou, want die huweliksbeloftes sal nagekom word. Kinders sal nie meer die slagoffers wees van die haat tussen die mense wat beweer dat hulle lief is vir die kind, wat hulle uit liefde verwek het nie.
Hoe wonderlik moet dit nie wees om in so 'n samelewing te wees nie. Besef jy dat daar waarskynlik nie sonde sou wees nie?
So was dit in die paradys,  voordat die groot leuenaar die mens kom leer lieg het.

Laat jou ja jou ja wees! ~ Willem Botha, 15/10/2015

“Dis net ’n baie dom mens wat kan dink dat God nie daar is nie.” (Ps. 53:2) “Dom” (of “dwaas”, soos wat dit in ’n ander vertaling sê) beteken hier beslis nie iemand met ’n lae IK, of iemand wat nie ’n universiteitsgraad het of nie gevorder het op skool nie. Dit verwys na iemand wat God se bestaan ontken en méér nog, dit verwys na iemand wat reken dat hy die Here nie nodig het nie. Dit verwys na iemand wat nie erkenning gee aan sy Skepper, sy Helper, sy Raadgewer nie. So ’n persoon volg sy eie pad, doen wat hy wil, leef roekeloos en selfgerig. Die uiteinde van sy dwase lewenswyse is selfvernietiging, ongelukkigheid en onvrede. Dis seker hoekom die Bybel elders sê dat wysheid begin met die dien van die Here. Ons moet ons inspan in die universiteit van die lewe om hierdie soort wysheid te bekom - wysheid wat my op God se pad vat, wysheid wat my nederig en afhanklik van die Here maak, wysheid wat die lewe laat sin maak. “Wysheid is soos ’n boom. Wie daaronder skuil, vind vreugde. (Spreuke 3:18) ~ Wilna Botha, 12/10/2015

Ou kar baas Willie 
Ons het eens 'n kostelike huishulp gehad vir wie ons baie lief was en sy is ontydig oorlede. As jy sou kla oor 'n skeet of 'n stywe been sou sy altyd sê: "Jaaaa baas Willie, ou kar". Inderdaad nogal waar né, hou ouer die ding word hoe meer moet jy aan hom werk, maar ry moet jy ry. Iemand het ook eendag gesê ons gaan nou in die Metaal - stadium in. Silwer in die hare, goud in die tande en lood in die voete! Oudword is nie vir sissies nie.

So lees ons in Prediker 12 die swaar van die oudword proses. Maklik is dit nie. Prediker beskryf hoe alles begin ingee, die bene, arms, oë, ore en ook jou gemoed. Lees dit verkieslik in Die Boodskap. 
Die hoofstuk begin so : Prediker 12:1
Dink aan jou Skepper in jou jong dae voor die swaar dae kom, die jare aanbreek waarvan jy sal sê: “Ek het daar niks aan nie.”
En dan naby die einde: Prediker 12:7
"...die tyd wanneer die stof na die aarde toe terugkeer soos dit was, en die gees na God terugkeer wat dit gegee het."
Dis nou maar hoe die lewe is, hoe ouer die "kar" hoe meer gaan jy aan hom werk. Die gedeelte wat regtig uitstaan is vers 1: Dink aan jou Skepper in jou jong dae... "
Ek sien 'n paar dinge hier raak , asook elders in Prediker :
* Lewe jou hele lewe deur saam met die Here 
* Besef dat ons lewe op aarde begin uitloop die dag van jou geboorte
* Daar gaan swaar tye kom 
* Weet dat God vir jou met oop arms inwag 
* Geniet jou LEWE voluit, moenie net asemhaal en bestaan nie 
* Werk maar aan daai ou kar, diens hom, "baby" hom, maar RY hom ~ Willem Botha, 07/10/2015

'n Reënboog en 'n letsel
Jy sal onthou dat ek onlangs vertel het dat ek my hand erg beseer het met 'n "angle grinder". Wel, drie weke is verby en alles is nou weer reg, behalwe vir 'n letsel. Meer daaroor netnou.

Die Here het moeg geword vir die verdorwenheid van die mens, bykans alle lewe op aarde vernietig deur die groot vloed en vir Noag en Sy gesin gered. Daarna het Hy vir die mens die reënboog gegee as herinnering van Sy belofte dat Hy nooit weer die aarde met 'n vloed sal vernietig nie. 
Gen 9:16
"Die reënboog sal in die wolke wees, en wanneer Ek dit sien, sal Ek dink aan die ewige verbond tussen My en al die lewende wesens op die aarde". 'n Wonderlike belofte in die reënboog as teken, sigbaar vir jou en my. 
Na Jesus se opstanding verskyn Hy aan die dissipels, maar Tomas sê dat Hy net sal glo as Hy die letsels sien. 
Joh 20:27
Daarna sê Hy vir Tomas: “Bring jou vinger hier en kyk na my hande; en bring jou hand en steek hom in My sy; en moenie langer ongelowig wees nie, maar wees gelowig.”
Die letsels was vir hom 'n teken, en Hy glo en hy roep uit: "My Here en my God."
Ek het 'n letsel oorgehou na my ongelukkie, maar dis Al wat oorgebly het. Ek sal elke dag van die res van my lewe 'n teken dra van God se beskerming, want dit kon SOVEEL erger gewees het. Hierdie letsel dien ook as 'n teken dat God die groot Geneser is. Ek beskou dit as 'n reuse voorreg om my eie, sigbare "reënboog" saam met my te dra en ek sal onthou om gedurig die Here daarvoor te prys. ~ Willem Botha, 05/10/2015

Hierdie ou prentjies beeld so mooi uit van ons gebrekkige verstaan van hoe die Here werk. Ons kan nie begryp dat ons dan gebid het vir die Here se beskerming en dan gebeur daar iets sleg met ons in die loop van die dag nie. Intussen wéét ons nie waarmee die Here besig was nie. Hy het dalk baie groter rampe en probleme van jou af weggehou waarvan jy nie eens bewus is nie, Hy het dalk gewerk aan ’n groter plan, Hy het dalk gewerk daaraan om jou karakter te vorm en jou sterker te maak. Ons kan altyd die sekerheid hê dat die Here aan die werk is in ons lewe, selfs al lyk en voel dit nie so nie. Ons kan altyd weet dat Sy tydsberekening perfek is, selfs al lyk dit of hy van ons vergeet het. Ons moet aanhou glo dat ons vir Hom belangrik is, dat niks sal gebeur wat buite sy plan vir ons lewe is en dat alles ten goede sal uitwerk, al sien ons nou nog niks daarvan raak nie. Ons moet vertrou dat die Here die hele prentjie het, dat Hy weet wat Hy doen en dat Sy liefde en genade vir ons onbeperk is, al gaan dit ons verstand te bowe.  “Wie kan dit waag om God se oordeel te bevraagteken? Wie is in staat om sy optrede te verklaar? Wie ken God se planne? Is daar iemand wat vir Hom kan voorskryf wat om te doen? ... Van God af kom alles wat bestaan. Hy hou alles in stand. Alles is daar om sy Naam groot te maak. Vir altyd.” (Rom 11:33-36) ~ Wilna Botha, 02/10/2015

Klik hier vir nog meer heuningdruppels >