|
|
|
Daaglikse Heuningdruppels
|
|
...
soeter as heuning, as druppels uit 'n heuningkoek (Ps
119:11)
Die daaglikse heuningdruppels is ook op ons
Facebook-groep. Klik hier:
 |
|
|
Duplisering en
verspreiding word toegelaat sonder veranderinge en met verwysing na
die outeur (Wilna / Willem Botha) en webruimte (www.heuning.co.za) |
|
Iets nuuts
HANDELINGE 17:21
"Die Ateners in die algemeen en die uitlanders wat daar
gewoon het, het hulle tyd aan niks anders bestee as om iets nuuts te sê of
te hoor nie."
Hierdie is eintlik nogal 'n kostelike teks. Paulus is in
Atene en hy verkondig die evangelie en hoewel sommige mense tot bekering kom,
is ander maar taai om sy boodskap te hoor. Hulle beskuldig hom daarvan dat
hy vreemde goed verkondig hoewel hy net oor die evangelie van Jesus Christus
praat. Dan lees ons hierdie teks : "Die Ateners in die algemeen en die
uitlanders wat daar gewoon het, het hulle tyd aan niks anders bestee as om
iets nuuts te sê of te hoor nie."
Jitte dit klink so bekend, die evangelie van Jesus Christus
raak vir sommige mense afgesaag en hulle wil iets nuuts hoor, iets wat die
vervelige predikant nog nie oor praat nie. So stukkie nuwe dogma, of so
ietsie van voorspoed waar ons iets hieruit kry, so 'n invalshoek wat jou
opnuut laat lekker voel.
Kyk bietjie hoe mense met 'n nuwe ding vorendag kom, dit uit
die Bybel regverdig en dan word daar aan hulle so bietjie aansien verleen.
Waar een snaar getokkel word dat die biesies bewe. En dikwels maak mense
vinnig 'n gevolg bymekaar.
Dis nou maar eenmaal so, nuwe nuus of kennis is lekkerder as
die dinge waarvan ons die hele dag hoor en wat nie meer nuwe vars elemente
bevat nie.
Ja, ons ontdek inderdaad daagliks nuwe waarhede in die Bybel,
maar die eenvoudige boodskap van die jare toet sal altyd vas bly staan. Dis
ons as mense wat hom so 'n nuwe suikerlagie wil gee.
Die evangelie van Jesus Christus is al wat ons nodig het.
~Willem Botha, 30/11/2015 |
|
“Kind words are powerful. They can heal, elevate,
encourage, advise, inform, instruct and soothe.” Dis ’n aanhaling wat ek ’n
rukkie gelede êrens raakgelees het. Wanneer jy die dag af voel, geknel word
deur ’n swaar las of bekommernis, siek is, raadop is, of as jy dalk die een
of ander fout begaan het, is dit darem maar baie gerusstellend as iemand
begrip toon en iets mooi sê wat jou opbeur, troos of aanmoedig. Dit kan
sommer jou hele uitkyk verander en jou dag positief draai en jou weer moed
gee. Onthou dit ’n bietjie voordat jy weer wegtrek met ’n stortvloed van
woorde teenoor jou kollegas of werknemers, jou man of kinders, iemand wat
jou te nagekom het of die winkel-kassier of petroljoggie wat dalk bietjie te
stadig na jou sin is. Wanneer ek deur Spreuke lees, sien ek dat hierdie
aanhaling nie so uniek is nie ... lees bietjie hier:
“’n Sagte antwoord laat woede bedaar ...” (Spr. 15:1)
“Kalmerende woorde bring lewe ...” (Spr. 15:4)
“Aangename woorde is heuning, soet en geneeskragtig vir die mens.” (Spr.
16:24)
“’n Wyse mens praat verstandig en kies sy woorde so dat hy ander kan leer.”
(Spr. 16:23)
“Die woorde van die regverdige bring lewe en geluk ... (Spr. 10:11)
“Bekommernis druk ’n mens neer; ’n vriendelike woord vrolik hom op.” (Spr.
12:25)
“Words kill, words give life;
they're either poison or fruit - you choose. (Spr. 18:21) ~Wilna Botha,
29/11/2015 |
|
|
Wat nog?
Jes 5:2-4
"Hy het die grond omgespit en die klippe verwyder, dit beplant met veredelde
wingerdstokke. Hy het 'n wagtoring daarin gebou en 'n parskuip uitgekap. Hy
het verwag dat dit goeie druiwe sou dra, maar toe bring dit druiwe voort wat
suur bly. En nou, inwoners van Jerusalem en manne van Juda, beslis tog
tussen My en my wingerd. Wat kan Ek nog vir my wingerd doen wat Ek nie reeds
gedoen het nie? Wat is dan die rede dat dit suur druiwe voortgebring het
terwyl Ek verwag het dat dit goeie druiwe sou dra?"
Sjoe klink dit nie bekend nie? "Wat kan Ek nog vir my wingerd
doen?" Wat moet die Here NOG doen voor ons tevrede gaan wees? Ek is
verskriklik skuldig aan hierdie onvergenoegdheid en word al hoe moeiliker
tevrede gestel. Dis verstommend, ek het totaal die vermoë om my seëninge
raak te sien, verloor. Op 'n tyd was ek tevrede met " 'n dag se brood" in my
besigheid, maar dis mos nou beter om 'n maand vooruit werk te hê. Ons lekker
huis waar ons al baie jare woon voel deesdae soms bietjie knap en die motor
wat so paar jaar gelede " 'n geskenk uit God se hand" was, is nou effe oud,
hoewel hy niks makeer nie.
Weet jy, die Here het deur my lewe vir my ongekende genade gegee, maar ek
vergeet dag vir dag gister se seëninge. Dit sou lekkerder wees as dit net
bietjie meer was.
Wat kan Ek nog vir my wingerd doen? Wel, dit lyk my ek sal eers wakker word
as ek alles verloor!
Jes 5:5-6 "Ek maak julle nou bekend wat Ek met my wingerd
gaan doen: Ek gaan die doringheining verwyder en verbrand, sy muur afbreek,
sodat die wingerd vertrap kan word. Ek gaan hom tot niet maak. Hy sal nie
meer gesnoei of geskoffel word nie, maar ingeneem word deur doringbosse en
onkruid. Ek sal die wolke verbied om daarop te reën."
Wat 'n verskriklike waarskuwing! Ek gaan hom tot niet maak...
Here help my om daagliks te besef wat ek het. ~ Willem Botha, 26/11/2015 |
|
|
“Die hele Skrif is deur
God geïnspireer.” (2 Tim 3:16) Ek sien in die Strong’s Hebrew and Greek –
woordeboek dat “geïnspireer” beteken “divinely breathed”. Dis vir my
insiggewend om te dink God het dus as’t ware sy asem in die woorde van die
Bybel geblaas. Soos wat Hy sy asem in Adam ingeblaas het sodat hy kon lewe,
só het Hy die woorde van die Bybel lewendig laat word. Die Woord kom van God
af en die waarheid en die gesag daarvan staan dus vas. Ek het hierdie in ’n
Bybelkommentaar gelees: “That the
scripture was given by inspiration of God appears from the majesty of its
style, - from the truth, purity, and sublimity, of the doctrines contained
in it, - from the harmony of its several parts, - from its power and
efficacy on the minds of multitudes that converse with it.”
Die Bybel is nie net woorde op papier nie,
dit dra ’n boodskap van hoop en lewe, dit vertel van goeie nuus. Dit is nie
net woorde op papier nie, dit is ’n praktiese riglyn vir die lewe. Moenie
dit net lees nie, laat toe dat God jou lewe daardeur verander. Moenie dit
net lees nie, lééf dit prakties in jou daaglikse lewe. “Wat God sê, is nie
maar net dooie woorde nie ...” (Heb 4:12, Die Boodskap) ~ Wilna Botha,
25/11/2015 |
|
|
Elke knie sal buig...
ROMEINE 14:11 “So seker as Ek lewe, sê die Here, voor My sal elke knie buig,
en elke tong sal bely dat Ek God is.”
Hierdie is 'n vreeslike kragtige teks, en ek het altyd verstaan dat alle
Christene saam die knie voor die Here sal buig. Ek het so 'n prentjie gekry
van mense wat saam in die kerk of by 'n byeenkoms die Here aanbid en dat die
Here met 'n sagtheid hierdie lofprysing aanvaar.
Totdat ek eendag besef het dat daar 'n baie groter en amper meerskrikwekkende
waarheid agter hierdie teks lê. Daar staan ELKE knie sal buig, elke soos in
elke mens op aarde, hetsy of jy 'n gelowige is of nie. Vir ons as Sy kinders
is dit 'n wonderlike oomblik as jy die knie voor Hom buig en bely dat Hy God
is, maar vir die ongelowige wat sterwe sonder die Here is daardie buig van
die knie 'n skrikwekkende oomblik.
Ons lees in Luk 16 die verhaal van Lasarus en die ryk man, waar die ryk man
in die hel beland en dan smeek vir 'n druppel water omdat hy verskriklik ly,
en dan vir vader Abraham smeek om sy broers te gaan waarsku sodat hulle nie
ook daar beland nie.
Luk 16:27-30
Toe sê hy: ‘Ek smeek u dan, vader, stuur hom tog na my pa se huis toe.Ek
het nog vyf broers. Laat hy hulle dringend gaan waarsku sodat hulle nie
ook in hierdie plek van pyniging beland nie.’ Maar Abraham sê: ‘Hulle
het die woorde van Moses en die profete. Laat hulle daarna luister.’ Hy
antwoord egter: ‘Nee, vader Abraham, maar as iemand uit die dood na
hulle toe gaan, sal hulle hulle bekeer.
Sjoe, dis nogal erg om te dink dat daar
nie een ongelowige in die hel is nie! Hulle buig die knie met pyniging
en lyding, maar ons buig die knie met genot en dankbaarheid. OF jy doen
dit in hierdie lewe as jy jou lewe aan die Here oorgee, OF jy doen dit
wanneer dit te laat is, maar buig sal jou knie buig. ~ Willem Botha,
24/11/2015
|
|
|
My dogter en ’n klompie vriendinne het gister aan die
Warrior Race deelgeneem. Dit bestaan uit 5 km se draf, afgewissel met ’n
stuk of 15 verskillende hindernisse – bo-oor, onderdeur, klouter, spring,
kruip, glibberige modderwalle, waterpoele ens. Dit eindig met ’n sprong van
’n hoë stellasie af, genoem “Tower of Rage” – nogal skrikwekkend vir die ma
wat van onderaf moet kyk. Op die baniere is die slagspreuk “be brave”. En jy
hét moed, dapperheid en deursettingsvermoë nodig om al dié hindernisse te
trotseer! Ek kon nie help om te dink hoedat die lewe ook maar so ’n wedloop
is en ons daagliks moet beur en sukkel oor al die hindernisse nie. Mag ons
almal deurdruk en vas bly staan te midde van die hindernisse wat ons wil
terughou. Mag ons almal dapper vorentoe beur en onthou dat ons krag en
vaardigheid van die Here af kom. Mag ons almal enduit volhard en ons
oorwinnaarskroon van Jesus ontvang. “Julle geloofsvertroue moet julle dus
nie prysgee nie: dit hou ’n groot beloning in. Volharding is wat julle nodig
het om die wil van God te doen en te ontvang wat Hy beloof het.” (Heb.
10:35) Wees sterk, wees dapper, druk deur! ~ Wilna Botha, 23/11/2015 |
|
Kom tot rus
Gen 2:2-3
"Op die sewende dag was God reeds klaar met die skeppingswerk
en het Hy gerus na al die werk wat Hy gedoen het. Hy het die sewende dag as
gereelde rusdag geheilig, want op daardie dag het Hy gerus na al die
skeppingswerk wat Hy gedoen het."
Rus, kom tog net tot rus. Rus 'n bietjie, skakel bietjie af
want jy brand jouself uit, ontspan vir 'n slag, gee jou liggaam 'n blaaskans,
skep 'n bietjie asem, raak net rustig. Is jy ook moeg na 'n jaar se geswoeg,
kan jy ook nie wag vir Desember nie? Ja jong, dis tyd om tot stilstand te
kom. Ek is seker jy kan hiermee assosieer en voel nou sommer 'n bietjie af.
Wel, jy is gemaak om te werk, maar die Here het vir ons
ritmes gegee sodat ons die geleentheid kan gebruik om te rus. Na 'n dag se
werk rus ons vir 'n nag lank. Na 'n week se werk rus ons vir die naweek, na
'n paar maande neem ons dalk bietjie verlof en doen iets lekker en na 'n
jaar se werk breek Desember aan en sommiges is gelukkig genoeg om goed uit
te rus.
Maar dis ongelukkig nie altyd die hele storie gaan. Die
realiteit lyk 'n effe anders. Wie dink jy is die grootste rus - dief? Mmm...
kan seker 'n paar goed wees, maar jou werk wen gewoonlik loshande. Word jy
vir oortyd betaal? Waarskynlik nie. En daai bekommernis oor die werk in die
nag, daardie dinktyd wat jou nagrus bederf? Nee, jy doen dit ook gratis. En
wat van Saterdae wat jy langs jou kind se sportveld moet deurbring en rustig
moet wees saam met dit gesin? Nee, Mnr Werk kom eerste. Word mense wat 'n
hartaanval kry agv werkspanning vergoed daarvoor? Nee, inderdaad nie, in
plaas van vergoed word, word jy vervang. Daardie rus wat jy die hele tyd
verruil vir die werk; waarborg dit dat jy nie afgelê word nie? Nee wat.
JY MOET RUS! Jou liggaam skreeu daarvoor en jou gesin skreeu
daarvoor. Die Here gun dit vir jou, jy moet dit vir jouself gun. Dis tyd om
dalk net jouself so bietjie eerste te stel, ter wille van jou gesin en ter
wille van jouself. Weet jy wat gebeur as jy die nie doen nie? Jou kinders
leer daardie selfde patrone aan en jy sit naderhand jou kinders onder
dieselfde druk as wat jou werkgewer op jou sit. Nee, die lewe is te kort.
Raak bietjie rustig. ~ Willem Botha, 22/11/2015 |
|
|
“Watter vervolging moes ek nie alles verduur nie! ... Almal
wat in Christus Jesus toegewy aan God wil lewe, sal ook vervolg word.” (2
Tim 3:11-12) Ek het al dikwels oor hierdie teks gewonder, omdat ons nie
swaarkry ter wille van Christus en nie ly as gevolg van ons geloof, omdat
ons nie vervolging beleef soos wat Paulus het en soos wat baie ander
Christene vandag beleef nie. Ons word nie verwerp, gemartel en doodgemaak
vir ons geloof nie. Ek het vandag by ons Bybelstudiegroep nuwe insig gekry
oor wat hierdie lyding en swaarkry kan beteken. Wanneer ons kies vir Jesus
en werklik toegewy en gehoorsaam aan Hom wil lewe, moet ons dikwels
ongewilde keuses maak wat ongelowiges glad nie verstaan nie, moet ons baie
keer ’n moeilike en eensame pad stap. Ons moet dinge opoffer en ons moet
gereeld onsself “benadeel” omdat ons die korrekte lewenswyse wil volg. Ons
sal bv. nie wit leuentjies vertel om onsself te red nie, ons sal nie die
spoedgrens oorskry as ons laat is vir ’n afspraak of ander verkeersreëls
breek of omkoopgeld aanbied nie, ons sal nie oneerlik besigheid doen nie,
ons sal vergewe en vergeet ten koste van onsself, ons sal die minste wees en
ander bo onsself stel, ons sal van ons goed en ons geld weggee om ander te
help. Dit is alles dinge wat die lewe as’t ware vir ons “moeilik” maak, wat
maak dat ons verwerp en uitgelag word, dít is ons lyding en swaarkry omdat
ons toegewy aan die Here wil lewe. “Dra jou deel van die ontberings soos ’n
goeie soldaat van Christus Jesus.” (2 Tim 2:3) ~ Wilna Botha, 19/11/2015 |
|
Mnr Suid-Afrika
Elke jaar word die Mnr Suid-Afrika kompetisie aangebied. Daar
word flink ingeskryf vir hierdie kompetisie en dis baie eksklusief. Dink gou
gou watse beeld by jou opkom vir hierdie manne. Hoe lyk die ideale kandidaat?
Dink gou of die fris geboude boerseun met sy plaas hoed wat met sy vuil
vellies en vuil 4x4 bakkie sou inpas? Nee wat, daar is nie 'n manier nie.
Mnr kandidaat is fyn besnaar, baie aantreklik en hy pas presies in die
boksie wat hom uiters gewild
sal maak by die mense. Benewens dit moet sy optrede, maniere en karakter net
dit wees wat die aanhangers wil hê.
Maar besef jy hoe mense dieselfde rol vir God kies? Ons wil iemand hê wat (soos
Mnr Suid-Afrika) in ons diens is, wat sal optree soos ons dit wil hê en dat
Hy die gewildheids kompetisie moet wen sodat ons gemaklik met Hom sal wees.
Ons wil nie hoor dat Hy soms ongewilde voorskrifte het nie en dat Hy soms
nie van ons geite hou nie. Maar God is soewerein, Hy is sag en liefdevol,
maar ook streng oor Sy voorskrifte en daar is dinge wat totaal onaanvaarbaar
vir Hom is, al is dit nie gewild by ons as mense nie.
Jes 55 : 8 - 9 "My gedagtes is nie julle gedagtes nie, en julle optrede nie
soos Myne nie; soos die hemel hoër is as die aarde, so is My optrede verhewe
bo julle optrede en My gedagtes bo julle gedagtes."
As ek so hieroor dink, is dit dat dít die enigste beeld is van wat ek van
God wil hê. As God die skoene van 'n "People pleaser" sou vol staan, sou Hy
nie meer soewerein wees nie. ~ Willem Botha, 18/11/2015 |
|
|
Iemand sê nou die dag: As die hiernamaals vir ewig sal
duur, duur hierdie lewe by wyse van spreke net vir ’n oomblik. Die Here gee
vir ons ’n besef van tyd - “He has put a sense of eternity in people's
minds.” (Pred. 3:11). Tog sukkel ons om onsself in te dink hoe lank “vir
ewig” regtig gaan wees, of hoe kort ons lewe regtig is. Die woord sê ons
moenie op Christus vertrou net vir hierdie lewe nie, ons hoop moet op Hóm
wees om vir ons die ewige lewe te gee, ’n lewe na die dood. (kyk 1 Kor.
15:19) Ons het hierdie ewigheidsperspektief nodig om ons te help om te fokus
op dinge wat vir altyd waarde gaan hê en om nie so oordrewe bekommerd te
wees oor die hier en nou dinge nie, om nie onsself so onder druk te plaas om
suksesvol te wees en besittings bymekaar te maak nie. Hierdie dinge gaan
verby en is tydelik – dit duur as’t ware net ’n oomblik gemeet teenoor die
ewigheid. Waar jy die ewigheid gaan deurbring, word egter in hierdie oomblik
bepaal. Neem Jesus aan as Verlosser - Hy is die weg tot die ewige lewe, Hy
het jou toegangskaartjie met sy bloed verseker. Plaas jou vertroue en
geloof in Hom alleen. Volg Hom. Gehoorsaam Hom. Volhard op die smal weg wat
na die ewigheid lei. “Kyk, nou is dit die regte tyd, nou is dit die dag van
redding.” (2 Kor. 6:2) ~Wilna Botha, 17/11/2015 |
|
Aan Jesus se voete
In Matteus 5 lees ons van die bergpredikasie.
Matt 5:1 - 2 "Toe Jesus die menigte mense sien, het Hy teen
die berg opgegaan. Nadat Hy gaan sit het, het sy dissipels na Hom toe gekom
en Hy het hulle geleer..."
As ek dit lees kry ek die prentjie van 'n rustige toneel waar
hierdie skare mense teen die hang van die berg gaan sit, die kinders speel
daar rond, mense het dalk iets by hulle om aan te peusel en hulle sit net en
luister. Dit klink of Jesus in 'n rustige bui is en sonder hoogdrawende
woorde die mense begin leer. Rustig, sonder om driftig te raak vertel Hy vir
hulle dinge, Hy leer hulle dat die wet eintlik meer vra as wat mens op
sigwaarde raak lees. Hy leer hulle hoe om te bid, Hy sê vir hulle wat goed
en wat skadelik is vir hulle. Ek dink dit was die beste "preek" ooit en het
vir hulle baie stof tot nadenke gegee.
Dit moes 'n wonderlike ervaring wees om net so rustig by Sy
voete te sit en aan Sy lippe te hang. Dit was toe, maar wat van nou?
Wel, vandag het ek en jy die voorreg om presies dieselfde te
doen. Ons kan enige tyd, op enige plek stil word by Sy voete, sommer net
rustig in Sy teenwoordigheid deurbring, met Hom praat soos 'n vriend, jou
hart voor Hom uitstort en deur Sy Woord Sy gedagtes vir jou te hoor. Ons sê
so maklik ons gebede slaan teen die plafon vas, maar ons moet dalk leer om
nie net altyd ons behoefte - lysie voor Hom uit te pak nie, maar sommer net
te gesels. En nog meer, om minder te praat en meer te luister. ~Willem
Botha, 16/11/2015 |
|
|
Ek
verstaan nie eintlik hoekom dit gebeur nie, maar my rekenaar raak soms so
stadig, reageer so traag op instruksies en dit lyk of hy sommer net ander
dinge staan en dink as wat ek wil hê hy moet doen. Die beste medisyne is dan
maar om te “shut down” en te “restart” om alles weer flink te kry. Op die
oomblik lyk dit vir my of baie ouens se hardeskywe vol is en dinge bietjie
hakerig gaan. Ek dink dis seker maar soos die jaar se stres en druk nou sy
tol begin eis, of soos almal net moeg is vir die sieldodende daaglikse
roetine en onmoontlike eise wat aan hulle gestel word. “Shut down” en
“restart” is vir ons net so nodig soos vir die rekenaar – moenie eers wag
tot Desember vakansie of Nuwejaarsdag nie, maak ’n sinvolle tyd in elke dag
om tot bedaring te kom en rustig te wees, om te herlaai en te fokus op wat
werklik saak maak.
"Step out of the traffic!
Take a long, loving look at Me, your High God, above politics, above
everything." (Ps. 46:10, The Message) ~ Wilna Botha, 15/11/2015 |
|
Vasbyt
Steve Farrar skryf in sy boek "Finishing Strong" van vier
pastore in Amerika wat baie jare gelede as jong dinamiese predikers, die
kerke aan die brand gepreek het. Die een wat die swakste spreker was het
maar deurgedruk, hoewel hy nie naastenby soveel in aanvraag was as die res
nie. Van die vier is hy egter die enigste een wat in sy oudag kon vasbyt en
deurdruk. Sy naam is vandag wêreldwyd bekend, dis Billy Graham. Die ander
drie het met tyd verval in egskeidings, drankmisbruik
en armoede.
Dink aan 'n seuntjie van so 5 jaar. Hy is sorgeloos, die wêreld is sy
speelplek en alles in die lewe is pret. Dan sien ons hoe hy 'n
toppresteerder word, goed doen op universiteit en 'n goeie posisie losslaan.
Maar dan sien ons hoe so baie van hulle 30 jaar later totaal uitmekaarval.
Huwelik lê aan skerwe, werk verloor, en sy waardigheid is daarmee heen. Hy
kon nie goed klaarmaak nie. Die jare na 30 raak geweldig moeilik, en om op
koers te bly is regtig 'n reuse uitdaging. Vernaam as jou geld en gesondheid
oppak. En dan volg depressie en soms die ergste wat kan gebeur, nl selfdood.
Rom 5:3-5
"Dit is egter nie al nie. Ons verheug ons ook in die swaarkry, want ons weet:
swaarkry kweek volharding, en volharding kweek egtheid van geloof, en
egtheid van geloof kweek hoop; en dié hoop beskaam nie, want God het sy
liefde in ons harte uitgestort deur die Heilige Gees wat Hy aan ons gegee
het."
Die geheim is om net dag vir dag een tree op 'n slag te vat, soms deur die
woestyn en soms op gladde waters, maar beur maar nogtans vorentoe. Finish
strong, al gaan dit swaar en stadig. Die beloning daarvoor is baie groot. ~
Willem Botha, 13/11/2015 |
|
|
“And a man shall be ... like the shadow of a
great rock in a weary land.” (Jes. 32:2) Terwyl dit deesdae so bloedig warm
en dor is, kan ons dalk bietjie beter verstaan wat dit beteken dat Jesus vir
ons hierdie “shadow of a great rock in a weary land” is. Hy is die enigste
skuilplek wanneer dinge om ons té warm, té dor, té swaar is. Wanneer dit
voel of alles om ons buite beheer is, of alles vernietig word in die hitte
van die stryd, of as aanslae net té vel is, onthou dan dat daar skuiling,
rus en verkwikking in Sy teenwoordigheid is. Moet dit nie net opsoek as
dinge te warm raak nie - skuil altyd daar, want dis waar jy beskerming,
versorging en troos sal ervaar. Kom tot rus is sy skaduwee en word verfris
met nuwe lewe, nuwe hoop en nuwe vrede. ~ Wilna Botha, 11/11/2015 |
|
Hoekom Here?
Jy het seker ook honderde kere die vraag : Hoekôôôm? gehoor
toe jou kinders klein was. Hoekom dit, hoekom dat, tot vervelens toe, totdat
jy naderhand net volhard met : Sommer! Want ek sê so! Ja, die mens eis van
kleins af antwoorde en dis goed so want dit help ons om dinge te verstaan
wat moeilik is om vir jouself vas te maak.
Net so vra ons dikwels vir die Here ook: hoekom? Vernaam as
dit swaar gaan en dinge net nie sin maak nie. Dalk is jy tans ook in "hoekom
- tyd", terwyl die Here tjoepstil bly en dit lyk of Hy jou ignoreer of
vergeet het. Dis sleg, want dit voel of jy waardeloos en eensaam is en
alleen deur jou swaarkry moet worstel.
Ons hoekoms kom in vreemde tye. Ons vra hoekom as 'n kind onnatuurlik sterf,
maar nie hoekom as 'n bejaarde sterf nie. Ons vra hoekom as ons 'n
ongeneeslike siekte kry, maar nie hoekom as ons vrot van die griep in die
bed lê nie. Hoekom as ek my werk ontydig verloor, maar nie hoekom as ons dag
van pensioen aanbreek nie. Dit lyk vir my "hoekom" breek aan as dinge buite
my beheer is, of ek voel ek gaan dit nie kan hanteer nie, of as ek voel dis
die einde van my pad. Hoekom gebeur dit met my? Wel, hoekom nie? Hoekom
eerder met iemand anders? Dis moeilik, maar soms bly die Here se antwoorde
weg.
Weet egter net één ding : die Here vergeet ons nie, Hy is daar by jou, Hy
gee krag vir die volgende treë, Hy vou jou toe in Sy arms en Hy huil selfs
saam met jou, soos toe Jesus gehuil het toe Lasarus sterf.
"Ek versterk jou, Ek help jou, Ek hou jou vas, met my eie hand red Ek jou
..." (Jes 41:10) ~Willem Botha, 10/11/2015 |
|
|
“Moenie ’n enkele oomblik agteroor sit nie. Daar is nie
meer tyd om te mors nie. Sorg dat julle geloof in Christus elke dag sterker
word.” (2 Pet. 1:5, Die Boodskap) Sjoe, dit klink nogal dringend nè? Ek wíl
graag hê dat my geloof sterker moet word en dat ek groei-spronge moet maak
in my Geestelike lewe. Maar hoe? As ek verder lees in 2 Pet. 1 sien ek ’n
paar eenvoudige stappe – nie ingewikkelde goed waarvoor ek ’n
teologie-kursus nodig het nie, nie hoendervleis wonderwerke waarvoor ek
buitengewone gawes nodig het nie, net die volgende: lees die Bybel sodat ek
die Here beter kan leer ken; lees die Bybel en dóén wat dit sê; lê
selfbeheersing aan die dag om “nee” te sê vir sondige begeertes, gedagtes en
dade; hou aan glo ten spyte van omstandighede en ten spyte van wat almal om
my doen; maak die Here se Naam groot in alles wat ek doen; betoon
daadwerklike liefde aan medegelowiges en gee om vir almal met wie ek elke
dag te doen kry ... daar is nie meer tyd om te mors nie
~ Wilna Botha, 09/11/2015 |
|
|
Tog skyn de son...
Soms kom iemand op met 'n paar woorde wat jou vir altyd sal bybly. Ek loop
een van my kliënte raak en ons praat oor die sukkelende ekonomie en die
onsekerheid oor alles wat in die land gebeur en hy sê : Ons Belge het die
spreekwoord "En tog skyn de son". Is dit nie waar nie? Ten spyte van alles,
hoe moeilik ookal, skyn die son steeds oor ons almal.
Dis soveel te meer waar as ons weet wie ons bron van lig en krag is.
Jes 60 :20 "Jou
son en jou maan is die Here, Hy gaan nie onder nie en word nie dof nie. Die
Here sal vir jou 'n ewige lig wees, jou dae van smart is verby."
Tog skyn de son... Die Here jou God sal jou pad verlig, die warmte wees in
koue tye, Hy sal sorg dat jy nie struikel oor die klippe op die pad nie, Sy
warm strale sal jou toevou en jou koester en beskerm. ~ Willem Botha,
08/11/2015 |
|
|
“Fight for what you can do; don’t convince yourself of what you cannot do.”
Hierdie is ’n lewensmotto wat ek baie gestremdes prakties sien uitleef. Op
die kamp wat ons verlede naweek gehad het, het iemand
juis opgemerk dat niemand van hulle “gestremd” is nie, hulle beleef net
almal verskillende uitdagings. Party moet harder werk om van punt A na B te
kom as ander, party moet harder konsentreer om iets te verstaan, of om
hulleself verstaanbaar te maak of om die vingers te laat vasvat en ander
moet dalk alternatiewe sintuie inspan om oor die weg te kom. So het ons
almal, al is ons nie gestremd nie, die een of ander uitdaging waarmee ons
lewe. Gebruik voluit dit wat jy tot jou beskikking het , doen die beste met
wat jy het en moenie wegkruip agter dit wat jy nié kan doen nie. Wees
tevrede met jouself en jou eie vermoëns en gebruik dit tot eer van God en
tot opbou van ander. Moenie jouself met ander vergelyk of te veel van
jouself dink of op ander neerkyk nie. “Ek wil dit met die beeld van ’n
liggaam verduidelik. ’n Liggaam bestaan uit baie ledemate. Ons is Christus
se liggaam hier op aarde. Net soos die verskillende liggaamsdele elkeen sy
eie funksie het, het ons as gelowiges ook verskillende funksies ... God het
dit aan ons elkeen uitgedeel soos Hy goedgedink het.” (Rom 12:4-6) ~ Wilna
Botha, 05/11/2015 |
|
|
Dis nou hoe dit is
'n Paar jaar gelede ontmoet ons 'n egpaar. Die man ly aan een of ander
siekte en die dokters sukkel om dit te diagnoseer, maar dit blyk toe op die
einde dat die man sterwend was aan kanker. Hy was 'n wedergebore Christen en
in sy laaste dae vrae 'n predikant vir hom hoe hy voel oor die saak. Sy
woorde was eenvoudig : "Dis nou hoe dit is." Hy het in daardie vrede gesterf.
Ek het 'n groot les daaruit geleer, en dit is dat kinders van
die Here deur dieselfde
lot as ander getref word, maar hulle gaan anders daarmee om. Herman en sy
familie en vriende het intens gebid vir genesing, maar daar het 'n dag gekom
dat hy gelate aanvaar het dat God se besluit vir hom aanvaarbaar is. God is
soewerein en hy gee nie altyd vir ons redes vir Sy besluite nie, maar Sy
besluite is steeds Sy besluite. Dis reg dat ons volhard in gebed vir die
sake wat ons voor Hom bring, maar iewers moet ons soos Paulus die Here se
laaste woord oor 'n saak aanvaar.
2 Korintiërs 12:9 "My genade is vir jou genoeg. My krag kom juis tot volle
werking wanneer jy swak is ..."
Dis nou hoe dit is... ~Willem Botha, 04/11/2015 |
|
|
“Gelowiges wat nie voluit vir die Here leef nie, is
soos mense met ’n oogprobleem. Hulle kan nie goed sien nie. Nog erger, hulle
is heeltemal blind. Hulle het klaar vergeet hoe Christus al hulle sondes
vergewe het toe hulle tot bekering gekom het.” (2 Pet. 1:9., Die Boodskap)
Ek vra myself baie keer af of ek nou regtig voluit vir die Here lewe, of Hy
regtig die middelpunt van my lewe is, of ek regtig binne Sy wil lewe, of ek
regtig alles doen wat Hy van my verwag. Ek dink ek wil die antwoord té
ingewikkeld maak, die inspanning om voluit vir Hom te lewe té groot maak, ek
wil té hard probeer om Hom tevrede te stel en dit kan mens mens “blind” maak.
Jou eie pogings laat jou vergeet hoe groot en diep die Here se genade is wat
Hy alreeds aan jou bewys het. Jy vergeet dat Hy jou geroep het sodat Hy Sy
liefde en goedheid op jou kan uitgiet. Jy vergeet dat Hy sy hand na jou toe
uitgesteek het toe jy in die modder rondgeploeter het. Jy vergeet dat Sy
vergifnis verniet is en dat jy niks daarvan verdien nie. Word rustig en kom
kry vandag weer gratis oogsalf by Hom, maak weer jou hart (en jou oë) oop
en ontvang ’n gratis, nuwe, vars porsie van Sy genade en Sy vrede en leef
voluit vir Hom. ~Wilna Botha, 03/11/2015 |
|
|
God - expat
God is landuit, moeg vir al die strooi, ons net so gelos, en kon nie Sy
beloftes oor ons land nakom nie. Wie kan Hom kwalik neem? Hy het al soveel
keer gewaarsku dat ons moes terugdraai maar ons wou nie, ons hou aan in ons
afvalligheid en sondes en dryf dag vir dag verder weg. Nou het Hy groener
weivelde gaan soek. Waarheen Hy is weet ek nie!
Dis natuurlik glad nie waar nie, maar ek gaan BAIE BAIE
eerlik met jou wees, daar is dae wat ek presies so voel, en vanoggend word
ek gekonfronteer met hierdie vraag toe ek kyk na 'n insetsel op TV van Louie
Giglio , toe hy gevra word of daar nog hoop is vir Suid-Afrika. Ek kom toe
met 'n skok agter dat hy meer hoop het vir ons land as ek, want as
buitestaander sien hy dinge wat ek miskyk en hy noem dinge wat my verstom
laat staan. Jy sien, ek laat te veel toe dat die dag tot dag dinge in die
land my negatief stem en ek wil wil hoop verloor. Maar God sien die prentjie
totaal anders, en sy mening is verseker heeltemal anders as myne, want Hy is
in beheer, en al lyk of voel dit nie so, Hy kan die land herstel.
Ek dink egter steeds dat die sleutel hiertoe in ons eie hande lê:
2 Kron 7:14
"As My volk oor wie My naam uitgeroep is, berou toon en bid, en vra na My
wil en terugdraai van hulle bose weë af, sal Ek luister uit die hemel en
hulle sonde vergewe, en hulle land herstel."
Dit vraag wat ek myself afvra, is wanneer gaan ek hiermee begin? ~ Willem
Botha, 02/11/2015 |
|
|
Ama krokko krokko
Ps 139:13 - 15
"U het my gevorm, my aanmekaargeweef in die skoot van my moeder. Ek wil U
loof, want U het my op 'n wonderbaarlike wyse geskep. Wat U gedoen het,
vervul my met verwondering. Dit weet ek seker: geen been van my was vir U
verborge toe ek gevorm is waar niemand dit kon sien nie, toe ek
aanmekaargeweef is diep in die moederskoot."
Ons het die afgelope naweek ons 15 de kamp (tot op die datum)
vir gestremdes gehou sedert 1Nov 2009. Ons bied hierdie kampe gratis aan met
die hulp van donateurs wat net onbaatsugtig dit moontlik maak. Amazing mense!
Dit was weereens 'n ervaring wat moeilik in woorde beskryf kan word, want
hierdie wonderlike mense bring vir jou met 'n slag terug aarde toe! Daar was
op die kampe al mense met elke denkbare vorm van gestremdheid, en ons sien
deursettingsvermoë wat absoluut ondenkbaar is! Ons leer so baie by hierdie
kosbare vriende. Hier is so paar gedagtes :
* Liggaamlik krom en skeef, maar hulle loop 'n reguit pad met die Here.
* Hulle kry ongelooflik swaar, maar hulle lag altyd
* Sommiges is redelik hulpeloos, maar hulle is nooit hooploos nie
* Ek het nog nooit een enkele een ontmoet wat die Here verwyt vir hulle
omstandighede nie
* Hulle is intens dankbaar vir die kleinste dinge, en dit wat ander vir
hulle doen
* Hulle verhouding met die Here is ongekompliseerd en kinderlik, net soos
die Bybel sê dit moet wees.
* Hulle manier van liefde vir die medemens is iets waarby ons SOVEEL kan
leer. Dis opreg!
Kyk gerus hier vir
meer
>>
En, o ja, het jy gesê jy kry bietjie swaar? ~ Willem Botha,
01/11/2015 |
|
|
Klik
hier vir nog meer heuningdruppels > |
|
|
Duplisering en verspreiding
word toegelaat sonder veranderinge en met verwysing na die outeur en webruimte (www.heuning.co.za) |
|
|
|
